30 November, 2025 10:30:49 PM
കുമരകത്ത് നിരോധിത പുകയില ഉൽപ്പന്നങ്ങളുടെ വൻ ശേഖരം പിടികൂടി
കുമരകം, ഇല്ലിക്കൽ പരുത്തിയകം ഭാഗത്ത് നിയാസ് എന്നയാളുടെ കെട്ടിടത്തിൽ നിന്നും 19,374 ഹാൻസ് പായ്ക്കറ്റുകളും 2816 എണ്ണം നിരോധിത പുകയില ഉല്പന്നമായ കൂൾ ലിപ്പുകളും, നിരോധിത പുകയില ഉല്പന്നങ്ങൾ വാങ്ങുന്നതിനും വിൽക്കുന്നതിനുമായി സൂക്ഷിച്ചു വച്ചിട്ടുള്ള 7,93,277 രൂപയും പോലീസ് പിടിച്ചെടുത്തു. കുമരകം പോലീസ് സ്റ്റേഷനിൽ ഈ സംഭവവുമായി ബന്ധപ്പെട്ട് കേസ് രജിസ്റ്റർ ചെയ്ത് അന്വേഷണം ആരംഭിച്ചു. കുമരകം എസ്എച്ച്ഓ ഷിജി കെ യുടെ നിർദ്ദേശ പ്രകാരം എസ്.ഐ ബസന്തിന്‍റെ നേതൃത്വത്തിൽ സിവിൽ പോലീസ് ഉദ്യോഗസ്ഥരായ അനീഷ് കുമാർ, ജാക്സൺ, അഭിലാഷ്, പ്രതീഷ് എന്നിവർ അടങ്ങിയ സംഘമാണ് റെയ്ഡ് നടത്തിയത്.
പ്രതിയായ കോട്ടയം വിദ്യാർഥിമിത്രത്തിനു സമീപം തട്ടുകട നടത്തുന്ന തിരുവാർപ്പ് വില്ലേജ് ആമ്പക്കുഴി ഭാഗത്ത് ചേരിക്കൽ വീട്ടിൽ നിയാസിന്‍റെ വീട്ടിലും വാടക ഗോഡൌണിലുമാണ് റെയിഡ് നടത്തിയത്. റെയിഡ് നടന്ന സമയം ഇയാൾ വീട്ടിൽ ഉണ്ടായിരുന്നില്ല. നിയാസ് ഒളിവിൽ പോയിട്ടുള്ളതായി പോലീസിന് വിവരം ലഭിച്ചിട്ടുള്ളതാണ്. ഇയാൾക്കെതിരെ കോട്ടയം വെസ്റ്റ് പോലീസ് സ്റ്റേഷനിൽ 5 ഉം, പാമ്പാടി പോലീസ് സ്റ്റേഷനിൽ ഒന്നും കേസുകൾ നിലവിലുണ്ട്. ശബരിമല മണ്ഡലകാല ഉത്സവത്തോടും, ആസന്നമായിരിക്കുന്ന തദ്ദേശ സ്വയംഭരണ തെരഞ്ഞെടുപ്പുകളോടും അനുബന്ധിച്ച് ജില്ലാ പോലീസ് മേധാവിയുടെ നിർദ്ദേശപ്രകാരം ജില്ലയിലാകമാനം കൂടുതൽ ജാഗ്രതയോടെ ലഹരിക്കെതിരെയുള്ള പരിശോധനകളും നടപടികളും തുടർന്ന് വരികയാണ്.
