01 July, 2023 07:15:34 PM
കാപ്പാ നിയമം ലംഘിച്ച് നാട്ടിലെത്തി; കാണക്കാരി സ്വദേശി 'മാവോ' അറസ്റ്റില്‍
ഏറ്റുമാനൂര്‍: കാപ്പാ നിയമപ്രകാരം നാടുകടത്തപ്പെട്ട പ്രതി നിയമം ലംഘിച്ചതിനെ തുടർന്ന് പോലീസ് അറസ്റ്റ് ചെയ്തു. അതിരമ്പുഴ കാണക്കാരി മാവേലിനഗര്‍ ഭാഗത്ത് വലിയതടത്തിൽ വീട്ടിൽ മാവോ എന്നു വിളിക്കുന്ന മെല്‍ബിന്‍ ജോസഫ് (26) എന്നയാളെയാണ് ഏറ്റുമാനൂര്‍ പോലീസ് അറസ്റ്റ് ചെയ്തത്.
നാലു വര്‍ഷം മുന്‍പ് പട്ടിത്താനത്ത് വെച്ച് എക്സൈസ് ഉദ്യോഗസ്ഥരെ ആക്രമിച്ചിട്ട് കടന്നുകളഞ്ഞ സംഘത്തിലെ ഒരാളാണ് മാവോ. കൊലപാതകശ്രമം, അടിപിടി, കവർച്ച തുടങ്ങിയ നിരവധി ക്രിമിനൽ കേസുകളിൽ പ്രതിയായ ഇയാളെ കോട്ടയം ജില്ലാ പോലീസ് മേധാവി കെ. കാർത്തിക്കിന്‍റെ റിപ്പോർട്ടിന്‍റെ അടിസ്ഥാനത്തിൽ കാപ്പാ നിയമപ്രകാരം നാടുകടത്തിയിരുന്നു.
എന്നാൽ ഇയാൾ ഈ നിയമം ലംഘിച്ച് കോട്ടയത്ത് എത്തിയിട്ടുണ്ടെന്ന് ജില്ലാ പോലീസ് മേധാവിക്ക് ലഭിച്ച രഹസ്യ വിവരത്തെ തുടർന്ന് ഏറ്റുമാനൂര്‍ പോലീസ് ഇയാളെ അറസ്റ്റ് ചെയ്യുകയായിരുന്നു. ഏറ്റുമാനൂര്‍ പോലീസ് സ്റ്റേഷൻ എസ്.എച്ച്.ഓ പ്രസാദ്‌ അബ്രഹാം വര്‍ഗീസ്, എസ്.ഐ പ്രശോഭ് , സി.പി.ഓ മാരായ പ്രവീൺ പി.നായർ , രതീഷ് , സ്മിതേഷ്, രഞ്ജിത്, നിതാന്ത്, ബോബി സ്റ്റീഫൻ എന്നിവർ ചേർന്നാണ് ഇയാളെ പിടികൂടിയത്.
