13 June, 2023 08:56:34 PM
കോട്ടയത്ത് പെയിന്‍റ് കടയിൽ മോഷണശ്രമം: ബംഗാൾ സ്വദേശി പിടിയിൽ
കോട്ടയം: പെയിന്‍റ് കടയിൽ കയറി മോഷണം നടത്താൻ ശ്രമിച്ച കേസിൽ ബംഗാൾ സ്വദേശിയെ പോലീസ് അറസ്റ്റ് ചെയ്തു. വെസ്റ്റ് ബംഗാൾ സ്വദേശി നജീബുൾ മൊല്ല (35) എന്നയാളെയാണ് കോട്ടയം വെസ്റ്റ് പോലീസ് അറസ്റ്റ് ചെയ്തത്. ഇയാൾ കഴിഞ്ഞ മാസം 25 ആം തീയതി രാത്രി 11 മണിയോടുകൂടി അയ്മനം സ്വദേശിയുടെ കോട്ടയത്ത് പ്രവർത്തിക്കുന്ന വിജയാ ട്രേഡ് സെന്‍റർ എന്ന പെയിന്‍റ് കടയുടെ ഓട് പൊളിച്ച് അകത്ത് പ്രവേശിച്ച് മാനേജർ കൗണ്ടറിന് സമീപമുള്ള ഇരുമ്പ് സേഫ് കുത്തിപ്പൊളിക്കാൻ ശ്രമിക്കുകയായിരുന്നു.
കടയുടമയുടെ പരാതിയെ തുടർന്ന് കോട്ടയം വെസ്റ്റ് പോലീസ് കേസ് രജിസ്റ്റർ ചെയ്യുകയും, ശാസ്ത്രീയമായ പരിശോധനയിലൂടെ ഇയാളാണ് മോഷണ ശ്രമം നടത്തിയത് എന്ന് കണ്ടെത്തുകയും തുടർന്ന് ഇയാളെ അറസ്റ്റ് ചെയ്യുകയുമായിരുന്നു. കോട്ടയം വെസ്റ്റ് സ്റ്റേഷൻ എസ്.എച്ച്.ഓ പ്രശാന്ത് കുമാർ കെ.ആർ, എസ്.ഐ ശ്രീജിത്ത് ടി, സിജു കെ സൈമൺ, സി.പി.ഓ മാരായ ജോർജ് എ.സി, ശ്യാം എസ് നായർ, ഷൈൻ തമ്പി എന്നിവർ ചേർന്നാണ് ഇയാളെ അറസ്റ്റ് ചെയ്തത്. ഇയാളെ കോടതിയിൽ ഹാജരാക്കി.
