31 May, 2022 04:11:52 PM
വിജയ് ബാബുവിന് ആശ്വാസം: അറസ്റ്റ് തടഞ്ഞ് ഹൈക്കോടതി; പൊലീസിന് തിരിച്ചടി
കൊച്ചി: നടിയെ ബലാത്സംഗം ചെയ്ത കേസില്‍ നടനും നിര്‍മാതാവുമായ വിജയ് ബാബുവിന്റെ അറസ്റ്റ് തടഞ്ഞ് ഹൈക്കോടതി. വിദേശത്ത് നിന്ന് തിരിച്ച് എത്തുമ്പോള്‍ വിജയ് ബാബുവിനെ അറസ്റ്റ് ചെയ്യരുത് എന്ന് കോടതി പറഞ്ഞു. നാട്ടിലെത്തിയാല്‍ അന്വേഷണ ഉദ്യോഗസ്ഥന് മുന്നില്‍ ഹാജരാകണം എന്ന് വിജയ് ബാബുവിനോടും കോടതി നിര്‍ദേശിച്ചു. വിജയ് ബാബുവിനെ ഒരു മാസമായിട്ടും എന്തുകൊണ്ട് അറസ്റ്റ് ചെയ്തില്ലെന്ന് കോടതി ചോദിച്ചു. പൊലീസും വിജയ് ബാബുവും തമ്മില്‍ ഒത്തുകളിക്കുന്നുവെന്ന സംശയവും കോടതി പ്രകടിപ്പിച്ചു.
ആള്‍ സ്ഥലത്തില്ലാത്തതിനാല്‍ കേസ് മെറിറ്റില്‍ കേള്‍ക്കാനാവില്ലെന്നും എന്നാല്‍ കോടതിക്ക് മുന്നില്‍ വിജയ് ബാബു സാധാരണക്കാരന്‍ മാത്രമാണെന്നും കോടതി പറഞ്ഞു. വ്യാഴാഴ്ച വരെ വിജയ് ബാബുവിനെ അറസ്റ്റ് ചെയ്യരുതെന്നാണ് ഹൈക്കോടതിയുടെ നിര്‍ദ്ദേശം. ഇക്കാര്യം ഇമിഗ്രേഷന്‍ വിഭാഗത്തെ അറിയിക്കാനും ഹൈക്കോടതി നിര്‍ദ്ദേശിച്ചിട്ടുണ്ട്. വിജയ് ബാബുവിന്റെ മുന്‍കൂര്‍ ജാമ്യാപേക്ഷ വ്യാഴാഴ്ച വീണ്ടും പരിഗണിക്കും.
