09 April, 2022 09:41:03 PM
"ഇന്ത്യയിലെ ഉരുക്കു മനുഷ്യരിൽ ഒരാൾ": പിണറായിയെ പുകഴ്ത്തി തമിഴ്നാട് മുഖ്യമന്ത്രി എം.കെ. സ്റ്റാലിൻ
കണ്ണൂർ: മുഖ്യമന്ത്രി പിണറായി വിജയനെ പ്രകീർത്തിച്ച് തമിഴ്നാട് മുഖ്യമന്ത്രി എം.കെ. സ്റ്റാലിൻ. കണ്ണൂരിൽ 23ാമത് സിപിഎം പാർട്ടി കോൺഗ്രസ് സെമിനാറിൽ സംസാരിക്കുകയായിരുന്നു സ്റ്റാലിൻ. ചടങ്ങിലെ മുഖ്യാതിഥിയാണ് സ്റ്റാലിൻ.
കമ്മ്യൂണിസ്റ്റ് പ്രസ്ഥാനവുമായുള്ള ബന്ധത്തിന് തന്‍റെ പേരു തന്നെ തെളിവാണെന്ന് ഓർമിച്ചായിരുന്നു സ്റ്റാലിന്‍റെ പ്രസംഗം. കമ്മ്യൂണിസ്റ്റ് , ദ്രാവിഡ ബന്ധം സിപിഎം സെമിനാറില്‍ പങ്കെടുക്കാനുള്ള ഒരു കാരണമാണെന്നും അദ്ദേഹം പറഞ്ഞു.
ആവേശത്തോടെയാണ് താൻ സെമിനാറിൽ പങ്കെടുക്കാനെത്തിയത്. ഇന്ത്യയിലെ ഉരുക്കു മനുഷ്യരിൽ ഒരാളാണ് കേരളത്തിന്‍റെ മുഖ്യമന്ത്രി പിണറായി വിജയൻ. മതേതരത്വത്തിന്‍റെ പ്രതീകമാണ് അദ്ദേഹമെന്നും സ്റ്റാലിൻ പുകഴ്ത്തി.
ബിജെപിയെയും സ്റ്റാലിൻ രൂക്ഷമായി വിമർശിച്ചു. നാനാത്വം അട്ടിമറിച്ച് ഏകത്വം നടപ്പാക്കാനാണ് ബിജെപിയുടെ ശ്രമം. ബ്രിട്ടീഷുകാർ പോലും നടപ്പാക്കാത്ത നയമാണ് മോദി സർക്കാരിന്‍റേത്. കെട്ടുറപ്പുള്ള രാജ്യത്തിനായി എല്ലാ പാർട്ടികളും ഒന്നിക്കണമെന്നും സ്റ്റാലിൻ പറഞ്ഞു.
