15 December, 2020 10:47:16 PM
ഒരു ലക്ഷം രൂപ കൈക്കൂലി; വില്ലേജ് ഓഫീസറും കൂട്ടാളിയും പിടിയിൽ
കൊച്ചി: ഒരു ലക്ഷം രൂപ കൈക്കൂലി വാങ്ങുന്നതിനിടെ വില്ലേജ് ഓഫീസറും കൂട്ടാളിയും പിടിയില്‍. കണയന്നൂര്‍ താലൂക്കിലെ എളംകുളം വില്ലേജ് ഓഫീസര്‍ സജേഷ് (45) ആണ് വിജിലന്‍സിന്‍റെ പിടിയിലായത്. പണം കടത്താന്‍ ശ്രമിച്ച സജേഷിന്‍റെ സുഹൃത്ത് എളമക്കര സ്വദേശിയായ വര്‍ഗീസിനെയും പിടികൂടി. ഇരുവരെയും ബുധനാഴ്ച മൂവാറ്റുപുഴ വിജലന്‍സ് കോടതിയില്‍ ഹാജരാക്കും.
എളംകുളം വില്ലേജിലെ കുമാരനാശാന്‍ നഗര്‍ ഇലത്താട്ടുവീട്ടില്‍ ആന്‍റോ എന്ന ആളില്‍നിന്നാണ് സജേഷ് കൈക്കൂലി വാങ്ങിയത്. ആന്‍റോയുടെ പരേതയായ അമ്മയുടെ പേരിലുള്ള നാല് സെന്‍റ് സ്ഥലത്തിന്‍റെ പോക്കുവരവിനായി 2019 ജൂലൈയില്‍ എളംകുളം വില്ലേജ് ഓഫീസില്‍ അപേക്ഷ സമര്‍പ്പിച്ചിരുന്നു.
നടപടിക്രമങ്ങളൊക്കെ പൂര്‍ത്തിയാക്കിയെങ്കിലും സര്‍ട്ടിഫിക്കറ്റ് നല്‍കാതെ വില്ലേജ് ഓഫീസര്‍ പിടിച്ചുവച്ച് ഒന്നരലക്ഷം രൂപ കൈക്കൂലി ആവശ്യപ്പെടുകയായിരുന്നു. വിജിലന്‍സിന്‍റെ നിര്‍ദേശമനുസരിച്ച് ഇന്ന് വൈകിട്ട് ആറിന് വില്ലേജ് ഓഫീസിലെത്തി ആന്‍റോ ഒരു ലക്ഷം രൂപ സജേഷിനു കൈമാറി. സജേഷ് ഈ പണം വര്‍ഗീസിന് കൈമാറിയപ്പോഴേക്കും വിജിലന്‍സ് സംഘമെത്തി ഇരുവരെയും അറസ്റ്റ് ചെയ്തു.
