25 October, 2025 07:55:35 PM
വിഷൻ 2031; സഹകരണ വകുപ്പ് സെമിനാർ ചൊവ്വാഴ്ച ഏറ്റുമാനൂരിൽ
കോട്ടയം: സംസ്ഥാനത്തെ സഹകരണ മേഖലയിൽ 2031ഓടെ സംഭവിക്കേണ്ട ക്രിയാത്മക മാറ്റങ്ങൾ സംബന്ധിച്ച ആശയസമാഹരണത്തിനായി സഹകരണ വകുപ്പ് സംഘടിപ്പിക്കുന്ന 'വിഷൻ 2031' ഏകദിന സെമിനാർ ഒക്ടോബർ 28 ( ചൊവ്വാഴ്ച) ഏറ്റുമാനൂരിൽ നടക്കും.
ഏറ്റുമാനൂർ ഗ്രാന്റ് അരീന കൺവെൻഷൻ സെന്ററിൽ രാവിലെ 9.30 ന് സഹകരണം-തുറമുഖം- ദേവസ്വം വകുപ്പ് മന്ത്രി വി.എൻ. വാസവൻ സെമിനാർ ഉദ്ഘാടനം ചെയ്യും. സർക്കാർ ചീഫ് വിപ്പ് ഡോ. എൻ. ജയരാജ് അധ്യക്ഷത വഹിക്കും. കഴിഞ്ഞ പത്തു വർഷം സഹകരണ വകുപ്പ് കൈവരിച്ച നേട്ടങ്ങൾ സഹകരണ വകുപ്പ് സ്‌പെഷ്യൽ സെക്രട്ടറി വീണ എൻ. മാധവൻ അവതരിപ്പിക്കും.
സഹകരണ മേഖലയിൽ യുവജനങ്ങളുടെ പ്രാതിനിധ്യം ഉറപ്പുവരുത്തൽ, പൊതുജനാരോഗ്യം, വിനോദസഞ്ചാരം, ഊർജ്ജം, വിദ്യാഭ്യാസം , കൃഷി, പ്രവാസി ക്ഷേമം, ആധുനികവത്കരണം തുടങ്ങിയ മേഖലകളിൽ സഹകരണ വകുപ്പിന്റെ പ്രവർത്തനവും പങ്കാളിത്തവും ഊർജ്ജിതമാക്കുന്നതിനുള്ള നടപടികളെക്കുറിച്ച് സെമിനാർ ചർച്ച ചെയ്യും.
എം.പിമാരായ ജോസ് കെ. മാണി, ഫ്രാൻസിസ് ജോർജ്, എം.എൽ.എമാരായ തിരുവഞ്ചൂർ രാധാകൃഷ്ണൻ, മോൻസ് ജോസഫ്, ജോബ് മൈക്കിൾ, സി.കെ.ആശ, ചാണ്ടി ഉമ്മൻ, സെബാസ്റ്റ്യൻ കുളത്തുങ്കൽ, മാണി സി. കാപ്പൻ, ജില്ലാ പഞ്ചായത്ത് പ്രസിഡൻറ് ഹേമലത പ്രേംസാഗർ, സഹകരണ സംഘം രജിസ്ട്രാർ ഡോ. ഡി. സജിത്ത്ബാബു, ഏറ്റുമാനൂർ നഗരസഭ അധ്യക്ഷ ലൗലി ജോർജ്ജ് പടികര, സംസ്ഥാന സഹകരണ ബാങ്ക് ചെയർമാൻ ഗോപി കോട്ടമുറിക്കൽ, സംസ്ഥാന സഹകരണ യൂണിയൻ ചെയർമാൻ കോലിയക്കോട് കൃഷ്ണൻ നായർ, സ്വാഗതസംഘം ജനറൽ കൺവീനർ കെ.എം. രാധാകൃഷ്ണൻ എന്നിവർ പങ്കെടുക്കും.
