28 February, 2022 05:09:25 PM
കോട്ടയം ശീമാട്ടി റൗണ്ടാന ജംഗ്ഷനിലെ ആകാശപ്പാത: അന്വേഷണവുമായി വിജിലൻസ്
കോട്ടയം: ശീമാട്ടി റൗണ്ടാന ജംഗ്ഷനിലെ ആകാശപ്പാതയുടെ നിർമാണത്തിലെ അപാകതകള്‍ അന്വേഷിച്ച് വിജിലൻസ്. ആകാശപാതയുമായി ബന്ധപ്പെട്ട് 2020 -ലുണ്ടായ പരാതിയിലാണ് കഴിഞ്ഞ ദിവസം അന്വേഷണവും പരിശോധനയും നടത്തിയത്. ആകാശപാതയ്ക്ക് ആവശ്യമായ സ്ഥലം ഏറ്റെടുക്കാതെ നിർമാണം ആരംഭിച്ചെന്നാണ് പരാതി.
പരാതിയുടെ അടിസ്ഥാനത്തിൽ കഴിഞ്ഞ ദിവസം സ്ഥലത്ത് എത്തിയ വിജിലൻസ് ഉദ്യോഗസ്ഥരും പൊതുമരാമത്ത് വകുപ്പ് ഉദ്യോഗസ്ഥരും നിര്‍മ്മാണം മുടങ്ങിയ ആകാശപാത പരിശോധിച്ചു. പാതയുടെ രൂപരേഖ പ്രകാരം നഗരസഭ ഓഫീസിനു മുമ്പിലും ബേക്കർ ജംഗ്ഷനിലേക്കുള്ള റോഡിലും ടെബിൾ റോഡിലും ശാസ്ത്രി റോഡിലുമാണ് ലിഫ്റ്റ് വിഭാവനം ചെയ്തിട്ടുള്ളത്. നഗരസഭയുടെ സ്ഥലം വിട്ടുകൊടുത്തിട്ടുണ്ടെങ്കിലും മറ്റിടങ്ങളിൽ സ്ഥലം കിട്ടിയിട്ടില്ല. ഇക്കാര്യത്തിലെ അവ്യക്തതയും അന്വേഷണവിധേയമാക്കുന്നുണ്ട്.
