11 December, 2025 01:25:57 PM
അതിജീവിതയെ അധിക്ഷേപിച്ച കേസ്; രാഹുല് ഈശ്വർ വീണ്ടും ജയിലിലേക്ക്
തിരുവനന്തപുരം: രാഹുല് മാങ്കൂട്ടത്തില് എംഎല്എക്കെതിരെ പരാതി നല്കിയ അതിജീവിതയെ സാമൂഹിക മാധ്യമത്തിലൂടെ അധിക്ഷേപിച്ചു എന്ന കേസില് രാഹുല് ഈശ്വര് വീണ്ടും റിമാന്ഡില്. കസ്റ്റഡി കാലാവധി തീര്ന്ന പശ്ചാത്തലത്തില് വീണ്ടും ജയിലിലേക്ക് തിരിച്ചയക്കാന് കോടതി ഇന്ന് തീരുമാനിക്കുകയായിരുന്നു. രാഹുല് ഈശ്വറിന്റെ ജാമ്യഹര്ജി 15ന് കോടതി പരിഗണിക്കും. നിലവില് രാഹുല് ജയിലില് കഴിയുന്നത് 12-ാം ദിവസത്തിലേക്ക് കടന്നിരിക്കുകയാണ്.
പരാതിക്കാരിക്കെതിരേ അപകീര്ത്തികരമായ പരാമര്ശങ്ങള് നടത്തിയ രാഹുല് ഈശ്വറിന്റെ നവംബര് 30നായിരുന്നു പൊലീസ് അറസ്റ്റ് ചെയ്തത്. ജാമ്യാപേക്ഷ തിരുവനന്തപുരം എസിജെഎം കോടതി തള്ളിയതോടെ രാഹുൽ ജയിലിൽ നിരാഹാര സമരം ആരംഭിക്കുകയായിരുന്നു. രാഹുല് ഈശ്വര് അന്വേഷണവുമായി സഹകരിക്കുന്നില്ലെന്ന പ്രോസിക്യൂഷന് വാദത്തെ അംഗീകരിച്ചായിരുന്നു കോടതി ജാമ്യം നിഷേധിച്ചത്. സാമൂഹിക മാധ്യമത്തിലെ പോസ്റ്റുകളടക്കം പിന്വലിക്കാമെന്ന് വാദത്തിനിടെ രാഹുല് ഈശ്വര് പറഞ്ഞിരുന്നെങ്കിലും കുറ്റകൃത്യത്തിന്റെ ഗൗരവം ചൂണ്ടിക്കാട്ടി കോടതി ജാമ്യം നിഷേധിക്കുകയായിരുന്നു.
