06 October, 2025 09:03:13 PM
വീടിനുള്ളിൽ അതിക്രമിച്ചു കയറി വീട്ടമ്മയുടെ മാല പൊട്ടിച്ച് കൊണ്ടുപോയ കേസിലെ പ്രതി പിടിയിൽ
ഏറ്റുമാനൂർ: വീടിനുള്ളിൽ അതിക്രമിച്ചു കയറി വീട്ടമ്മയുടെ മാല പൊട്ടിച്ച് കൊണ്ടുപോയ കേസിലെ പ്രതി പിടിയിൽ. വെള്ളിലാപ്പള്ളി ചക്കാമ്പുഴ കരോട്ടു കാവാലംകുഴിയിൽ വീട്ടിൽ ഗോപാലൻ മകൻ നിഖിൽ കെ. ജി. (33) എന്നയാളെയാണ് ഏറ്റുമാനൂർ പോലീസ് അറസ്റ്റ് ചെയ്തത്. 24-09-2025 തീയതി വൈകുന്നേരം 7 30 മണിയോടെ ഏറ്റുമാനൂർ കിഴക്കുംഭാഗം മന്നത്തൂർ കോളനി ഭാഗത്ത് വീടിന്റെ ഹാളിൽ അതിക്രമിച്ചു കയറിയ പ്രതി വീട്ടമ്മയുടെ കഴുത്തിൽ ഉണ്ടായിരുന്ന ഉദ്ദേശം രണ്ടു പവനോളം തൂക്കം വരുന്നതും ഒരു ലക്ഷത്തി എഴുപത്തിഅയ്യായിരം രൂപ (175000/-) വില വരുന്നതുമായ സ്വർണമാല പൊട്ടിച്ചുകൊണ്ടു പോവുകയായിരുന്നു. സംഭവത്തിൽ കേസെടുത്ത് അന്വേഷണം നടത്തിവരവേ പ്രതിയായ നിഖിലിനെ കാണ്മാനില്ല എന്ന നിഖിലിന്റെ ഭാര്യയുടെ പരാതിയിലും ഏറ്റുമാനൂർ പോലീസ് കേസെടുത്തു. അന്വേഷണം പുരോഗമിക്കവേ എറണാകുളം ജില്ലയിൽ പള്ളിമുക്ക് എന്ന സ്ഥലത്ത് വെച്ച് 05-10-2025 തീയതി അന്വേഷണസംഘം പ്രതി നിഖിലിനെ അറസ്റ്റ് ചെയ്യുകയായിരുന്നു. കഴിഞ്ഞ എട്ടു മാസക്കാലമായി പ്രതി സംഭവസ്ഥലത്തിനടുത്ത് തന്നെ വാടകയ്ക്ക് താമസിച്ചു വരികയായിരുന്നു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
