21 March, 2025 04:27:32 PM
കോട്ടയത്ത് പ്രായപൂർത്തിയാകാത്ത മകൻ ഓടിച്ച ബൈക്കിടിച്ച് കാൽനടയാത്രക്കാരി മരിച്ച സംഭവത്തിൽ അച്ഛനെ പ്രതിയാക്കി
കോട്ടയം: കോട്ടയത്ത് പ്രായപൂർത്തിയാകാത്ത മകൻ ഓടിച്ച ബൈക്കിടിച്ച് കാൽനടയാത്രക്കാരി മരിച്ച സംഭവത്തിൽ അച്ഛനെ പ്രതിയാക്കി പൊലീസ് കേസെടുത്തു. ളാലം പയപ്പാർ അന്ത്യാളം ചെരിവുപുരയിടത്തിൽ വീട്ടിൽ രാജേഷ് സി.എം (44) നെ പ്രതിയാക്കിയാണ് കേസെടുത്തത്. ഇയാളുടെ പ്രായപൂർത്തിയാകാത്ത മകൻ ഓടിച്ച ബൈക്കിടിച്ച് കാൽനട യാത്രക്കാരിയായ ളാലം അന്തിനാട് മഞ്ഞക്കുന്നേൽ വീട്ടിൽ മാണിയുടെ ഭാര്യ റോസമ്മ മാണി(80) പരിക്കേറ്റ് ചികിത്സയിലിരിയ്ക്കെ മരണപ്പെട്ടിരുന്നു.
ഫെബ്രുവരി 13ന് രാവിലെ 6ന് പ്രവിത്താനം എംകെഎം ആശുപത്രിയ്ക്കു സമീപമാണ് അപകടം നടന്നത്. അന്നേ ദിവസം 08.30ഓടെ റോസമ്മ മാണിയുടെ മരണം സംഭവിക്കുകയായിരുന്നു. മകൻ ഓടിച്ച ബൈക്കിന്റെ രജിസ്റ്റേഡ് ഉടമ രാജേഷായിരുന്നു. പ്രായപൂർത്തിയാകാത്ത മകന് വാഹനം ഉപയോഗത്തിനായി നൽകിയതിനെത്തുടർന്നാണ് ഇയാളെ പ്രതി ചേർത്ത് കേസെടുത്തത്. അപകടത്തിന് കാരണമായ വാഹനത്തിന്റെ രജിസ്ട്രേഷൻ ഒരു വർഷത്തേക്ക് റദ്ദാക്കുന്നതിനുള്ള നടപടി മോട്ടോർ വാഹന വകുപ്പും സ്വീകരിച്ചു.പ്രായപൂർത്തിയാകാത്ത മകനെതിരെ ജുവനൈൽ ജസ്റ്റീസ് ബോർഡിന് റിപ്പോർട്ട് നൽകും.
മോട്ടോർ വെഹിക്കിൾ ആക്ട് പ്രകാരം പ്രായപൂർത്തിയാകാത്ത (18 വയസിനു താഴെ )ഒരാൾ പൊതുനിരത്തിലൂടെ വാഹനം ഓടിക്കുകയും ഒരു കുറ്റം ചെയ്യുകയും ചെയ്താൽ ആ കുട്ടിയുടെ പിതാവ് അല്ലെങ്കിൽ രക്ഷകർത്താവ് അല്ലെങ്കിൽ വാഹനത്തിന്റെ രജിസ്ട്രേഡ് ഉടമ മോട്ടോർ വെഹിക്കിൾ നിയമ പ്രകാരം രണ്ട് കുറ്റവും ചെയ്തതായി കണക്കാക്കപ്പെടും. 3 വർഷം വരെ തടവും പിഴയും വരെ ശിക്ഷ ലഭിക്കാവുന്ന കുറ്റമാണിത്.
