18 March, 2025 11:05:05 AM
താമരശ്ശേരിയില്‍ നിന്ന് കാണാതായ പെണ്‍കുട്ടിയും യുവാവും ബെംഗളൂരുവില്‍
കോഴിക്കോട്: താമരശ്ശേരി പെരുമ്പള്ളിയില്‍ നിന്ന് കാണാതായ പതിമൂന്നുകാരിയായ പെണ്‍കുട്ടിയെയും ബന്ധുവായ യുവാവിനെയും ബെംഗളൂരുവില്‍ കണ്ടെത്തി. ഇന്ന് പുലര്‍ച്ചെ രാവിലെയാണ് ഇവരെ കണ്ടെത്തിയത്. രണ്ടു പേരെയും തിരിച്ചെത്തിക്കാന്‍ താമരശ്ശേരി പോലീസ് ബെംഗളൂരുവിലേക്ക് പുറപ്പെട്ടുവെന്നാണ് വിവരം.
മാര്‍ച്ച് പതിനൊന്നാം തീയതി മുതലാണ് പെണ്‍കുട്ടിയെ കാണാതായത്. പരീക്ഷയെഴുതാന്‍ വീട്ടില്‍ നിന്ന് രാവിലെ ഒന്‍പത് മണിക്ക് സ്‌കൂളിലേക്ക് പുറപ്പെട്ടതായിരുന്നു പെണ്‍കുട്ടി. മകള്‍ പിന്നീട് തിരിച്ചുവന്നില്ലെന്നാണ് പിതാവ് താമരശ്ശേരി പൊലീസ് സ്റ്റേഷനില്‍ പരാതി നല്‍കുകയായിരുന്നു. സംഭവത്തില്‍ താമരശ്ശേരി പൊലീസ് കേസെടുത്ത് അന്വേഷണം ആരംഭിച്ചു.
മൂന്ന് ദിവസങ്ങള്‍ക്ക് ശേഷം പെണ്‍കുട്ടി തൃശ്ശൂരിലെത്തിയതായി കണ്ടെത്തിയിരുന്നു. കഴിഞ്ഞ 14-ാം തിയ്യതി തൃശ്ശൂര്‍ കെഎസ്ആര്‍ടിസി ബസ് സ്റ്റാന്‍ഡിന് സമീപത്തെ ലോഡ്ജിലാണെത്തിയത്. പെണ്‍കുട്ടി നടന്നുവരുന്ന സിസിടിവി ദൃശ്യങ്ങള്‍ പൊലീസ് കണ്ടെടുത്തു. ദൃശ്യങ്ങളില്‍ ബന്ധുവായ യുവാവുമുണ്ടായിരുന്നു.
