17 March, 2025 05:15:00 PM
കാണക്കാരി പഞ്ചായത്ത് മേഖലയിൽ അനധികൃത മണ്ണെടുപ്പ് വ്യാപകമാകുന്നു
- രാജേഷ് കുര്യനാട്
ഏറ്റുമാനൂർ : കാണക്കാരി പഞ്ചായത്തിലെ കുറുമുള്ളൂർ, വേദഗിരി, കല്ലമ്പാറ പ്രദേശങ്ങളിൽ യാതൊരുവിധ സർക്കാർ അനുമതികളും ഇല്ലാതെ മണ്ണെടുപ്പ് വ്യാപകമാകുന്നു. കഴിഞ്ഞ ദിവസം കല്ലമ്പാറ ജംഗ്ഷനു സമീപം നീണ്ടൂർ സ്വദേശിയുടെ 14 സെൻ്റ് സ്ഥലത്തെ മണ്ണ് എടുക്കുവാൻ പഞ്ചായത്തിൽ നിന്നും അനുമതി നേടിയ ശേഷം കോതനല്ലൂർ സ്വദേശികളായ മണ്ണെടുപ്പ് സംഘം 40 സെൻ്റ് പ്രദേശത്തെ മണ്ണെടുത്തത് നാട്ടുകാർ തടഞ്ഞിരുന്നു. ഇവിടെ സ്ത്രീകൾ മാത്രം താമസിക്കുന്ന വീടിൻ്റെ വഴി അടക്കം മാന്തി എടുക്കുകയും ഇത് ചോദ്യം ചെയ്തവരെ ഭീക്ഷണിപെടുത്തുകയും ചെയ്തിരുന്നു. കുറുമുള്ളൂർ മണ്ഡപം ജംഗ്ഷൻ, കരിങ്ങാലിക്കവല, കുറുമുള്ളൂർ കൃഷിഭവൻ റോഡ്, കല്ലമ്പാറ ജംഗ്ഷൻ തുടങ്ങിയ പ്രദേശങ്ങളിൽ രാവിലെ നാലു മണിക്ക് ആരംഭിക്കുന്ന മണ്ണെടുപ്പ് 10 മണിയോടെയാണ് നിർത്തുന്നത്. പ്രധാന റോഡുകളിൽ പോലീസിൻ്റെ അടക്കം സാന്നിധ്യം ഇല്ലെങ്കിൽ മണ്ണെടുപ്പ് ഉച്ചവരെ നീളും. ഇതോടെപ്പം മറ്റ് പഞ്ചായത്തുകളിലെ പാസും ഇവിടെ ഉപയോഗിക്കുന്നുണ്ടെന്നാണ് ആരോപണം. കാണക്കാരിയിലെ പഞ്ചായത്ത്, വില്ലേജ് ഓഫീസുകൾ എം സി റോഡിൽ വെമ്പള്ളിയിൽ ആണ് പ്രവർത്തിക്കുന്നത്. ഇവിടെ പരാതി അറിയിച്ചാൽ ഉദ്യോഗസ്ഥർ എത്താറില്ലാ എന്നും നാട്ടുകാർ കുറ്റപ്പെടുത്തുന്നു.
