12 November, 2024 07:50:46 PM
ഏറ്റുമാനൂരിൽ ലോഡ്ജ്, വീട് കേന്ദ്രീകരിച്ച് ചീട്ടുകളി നടത്തിയ സംഘം പിടിയിൽ
ഏറ്റുമാനൂർ: ഏറ്റുമാനൂർ റെയിൽവേ സ്റ്റേഷൻ സമീപം ലോഡ്ജ് കേന്ദ്രീകരിച്ചും, കോടതി പടിക്ക് സമീപം വീട് കേന്ദ്രീകരിച്ചും ചീട്ടുകളി നടത്തിയവർ പിടിയിൽ. ലോഡ്ജ് കേന്ദ്രീകരിച്ച് ചീട്ടുകളി നടത്തിയ 10 പേരെയും, ഇവരിൽനിന്ന് 25,610 രൂപയും പിടിച്ചെടുത്തു. ഇതു കൂടാതെ കോടതിപ്പടി ഭാഗത്ത് വീട് കേന്ദ്രീകരിച്ച് ചീട്ടുകളി നടത്തിയ ഒൻപത് പേരെയും ഇവരിൽനിന്ന് 10,520 രൂപയും പിടികൂടി. ജില്ലാ പോലീസ് മേധാവി ഷാഹുൽ ഹമീദ് ഐ.പി.എസിന് ലഭിച്ച രഹസ്യ വിവരത്തെ തുടർന്ന് ഏറ്റുമാനൂർ പോലീസ് നടത്തിയ പരിശോധനയിലാണ് ചീട്ടുകളി സംഘത്തെ പിടികൂടിയത്. ഏറ്റുമാനൂർ സ്റ്റേഷൻ എസ്.എച്ച്.ഓ അൻസൽ എ.എസ്, എസ്.ഐ മാരായ അഖിൽദേവ്, ജയപ്രകാശ്, തോമസ് ജോസഫ്, സന്തോഷ് മോൻ, എ.എസ്.ഐ ബിജു എം.പി, സിപിഓ മാരായ സാബു, വിനീഷ്, ഡെന്നി, സനൂപ്, ഫ്രജിൻ ദാസ്, ധനേഷ്, അജിത് എന്നിവർ ചേർന്നാണ് ഇവരെ പിടികൂടിയത്.
