25 August, 2023 11:10:18 AM
മദ്യപിച്ച് കാറോടിച്ച് കെഎസ്ആർടിസി ബസിനെ ഇടിച്ചു; പൊലീസുകാരനെ നാട്ടുകാർ പിടികൂടി
മൂവാറ്റുപുഴ: മദ്യ ലഹരിയിൽ കാറോടിച്ച് അപകടം സൃഷ്ടിച്ച പൊലീസ് ഉദ്യോഗസ്ഥനെ പിടികൂടി നാട്ടുകാർ പൊലീസിൽ ഏൽപ്പിച്ചു. കരിങ്കുന്നം പൊലീസ് സ്റ്റേഷനിലെ സിവിൽ പൊലീസ് ഓഫീസർ ചെമ്പകപ്പാറ പാടലംകുന്നേൽ അജീഷ് കുര്യനെ (40) യാണ് നാട്ടുകാർ പിടികൂടിയത്.
ഇന്നലെ വൈകിട്ട് എംസി റോഡിലാണ് സംഭവം. മദ്യലഹരിയിലായിരുന്ന അജീഷ് ഓടിച്ചിരുന്ന കാർ കെഎസ്ആർടിസി ബസിൽ ഇടിക്കുകയായിരുന്നു.അപകടം ചോദ്യം ചെയ്ത ബസ് ജീവനക്കാരുമായി അജീഷ് തർക്കിക്കുകയും ബഹളം വയ്ക്കുകയും ചെയ്തു.
തുടർന്ന് നാട്ടുകാർ പിടികൂടി ഇയാളെ പൊലീസിൽ ഏൽപ്പിക്കുകയായിരുന്നു. പൊലീസ് വൈദ്യ പരിശോധനയ്ക്കു ശേഷം അജീഷിനെതിരെ മദ്യപിച്ചു വാഹനം ഓടിച്ചതിനു കേസ് രജിസ്റ്റർ ചെയ്തിട്ടുണ്ട്. റൂറൽ ജില്ലാ പൊലീസ് മേധാവിക്കു റിപ്പോർട്ടു സമർപ്പിക്കുകയും ചെയ്തു.
