16 June, 2023 01:22:32 PM
അടിമാലിയില്‍ മധ്യവയസ്കനെ കുത്തിക്കൊലപ്പെടുത്തിയ യുവാവ് അറസ്റ്റില്‍
അടിമാലി: കൊരങ്ങാട്ടിയില്‍ മധ്യവയസ്കനെ വീട്ടില്‍ കയറി കുത്തിക്കൊലപ്പെടുത്തി. കൊരങ്ങാട്ടി കട്ടിലാനിയ്ക്കല്‍ സാജന്‍ (49) ആണ് മരിച്ചത്. സംഭവത്തില്‍ തലമാലി സ്വദേശി സിറിയക്കിനെ(37) പോലീസ് അറസ്റ്റ് ചെയ്തു. വ്യാഴാഴ്ച രാത്രി 10.30നാണ് സംഭവം. വീടിന്‍റെ വാതില്‍ ചവിട്ടിപ്പൊളിച്ച് അകത്തുകടന്ന സിറിയക്ക് സാജനെ പലതവണ കത്തികൊണ്ട് കുത്തുകയായിരുന്നു. സംഭവസ്ഥലത്തുവച്ച് തന്നെ ഇയാള്‍ മരിച്ചു.
കൊലപാതകത്തിന് കാരണം വ്യക്തിവൈരാഗ്യമാണെന്ന് പോലീസ് അറിയിച്ചു. കാപ്പക്കേസ് ചുമത്തപ്പെട്ട് ജയിലിലായിരുന്ന സിറിയക് മൂന്ന് മാസം മുമ്പാണ് പുറത്തിറങ്ങിയത്. ഇയാള്‍ക്കൊപ്പം യുവതിയും കുട്ടിയും താമസിച്ചിരുന്നു. ഇയാള്‍ ജയിലിലായിരുന്നപ്പോള്‍ സാജന്‍ ഇവരെ ഉപദ്രവിച്ചിരുന്നെന്നും ഇതിന്‍റെ വൈരാഗ്യത്തിലാണ് കൊലപാതകം നടത്തിയതെന്നുമാണ് നിഗമനം.
