16 June, 2023 10:38:34 AM
നുസ്രത്ത് ജഹാൻ ചൗധരി അമേരിക്കയിലെ ആദ്യ മുസ്‌ലിം വനിതാ ജഡ്ജി
വാഷിംഗ്ടൺ: അമേരിക്കയിലെ ഫെഡറൽ കോടതിയിൽ ന്യായാധിപ പദവി അലങ്കരിക്കുന്ന ആദ്യ മുസ്‌ലിം വനിതയായി നുസ്രത്ത് ജഹാൻ ചൗധരി. ചൗധരിയുടെ നിയമനം യുഎസ് സെനറ്റ് വോട്ടിനിട്ട് അംഗീകരിച്ചു.
ന്യൂയോർക്കിലെ ഈസ്റ്റേൺ ഡിസ്ട്രിക്ട് കോടതിയിലെ ജഡ്ജിയായി ചൗധരി ഉടൻ സ്ഥാനമേൽക്കും. അമേരിക്കയിൽ ന്യായാധിപ പദവിയിലെത്തുന്ന ആദ്യ ബംഗ്ലദേശി വംശജയെന്ന റിക്കാർഡും ചൗധരി സ്വന്തമാക്കി.
ജഡ്ജ് സ്ഥാനത്തേക്ക് ചൗധരിയുടെ പേര് ബൈഡന്‍ സർക്കാർ 2022 ജനുവരിയിൽ നാമനിർദേശം ചെയ്തെങ്കിലും വ്യാഴാഴ്ചയാണ് സെനറ്റിന്‍റെ നിയമനാംഗീകാരം ലഭിച്ചത്.
പ്രമുഖ മനുഷ്യാവകാശ സംഘടനയായ അമേരിക്കൻ സിവിൽ ലിബർട്ടീസ് യൂണിയന്‍റെ ഇല്ലിനോയി ശാഖയിൽ ലീഗൽ ഡയറക്ടറായി പ്രവർത്തിച്ചിട്ടുള്ള വ്യക്തിയാണ് ചൗധരി.
