14 September, 2022 07:18:31 PM
സോളാര്‍ സ്ട്രീറ്റ് ലൈറ്റുകളുടെ ബാറ്ററികള്‍ മോഷ്ടിക്കുന്ന സംഘത്തിലെ മൂന്ന് പേര്‍ അറസ്റ്റില്‍
പാലാ: സോളാര്‍ സ്ട്രീറ്റ് ലൈറ്റുകൾക്ക് ഉപയോഗിക്കുന്ന ബാറ്ററികളുടെ മോഷണവുമായി ബന്ധപ്പെട്ട് മൂന്നുപേർ അറസ്റ്റിൽ.
എറണാകുളം പല്ലാരിമംഗലം അടിവാട് ഭാഗത്ത് പ്ലാന്തടത്തിൽ വീട്ടിൽ ആനന്ദ് മകൻ ജിഷ്ണു ആനന്ദ് (21),ഇയാളുടെ സഹോദരനായ വിഷ്ണു ആനന്ദ് (23) എറണാകുളം പല്ലാരിമംഗലം അടിവാട് ഭാഗത്ത് ആലക്കോട്ടിൽ വീട്ടിൽ ബഷീർ മകൻ ബാദൂഷ(18) എന്നിവരെയാണ് പാലാ പോലീസ് അറസ്റ്റ് ചെയ്തത്.
ജില്ലാ പോലീസ് മേധാവി കെ കാർത്തിക്കിന്റെ നേതൃത്വത്തിൽ രാത്രി പരിശോധന ശക്തമാക്കിയതിനെ തുടർന്ന് ഇന്ന് പുലർച്ചെ സംശയാസ്പദമായ രീതിയിൽ കാണപ്പെട്ട കാർ പരിശോധിക്കുകയും കാറിനുള്ളിൽ ഒളിപ്പിച്ചുവച്ച നിലയിൽ എട്ടു ബാറ്ററികൾ കാണപ്പെട്ടതിനെ തുടര്‍ന്ന് പോലീസിന്റെ ചോദ്യം ചെയ്യലിൽ ഇത് മോഷ്ടിച്ചുകൊണ്ട് വന്നതാണെന്ന് കണ്ടെത്തുകയും ചെയ്തു. സോളാര്‍ സ്ട്രീറ്റ് ലൈറ്റുകൾക്ക് ഉപയോഗിക്കുന്ന ബാറ്ററികളാണ് മോഷ്ടിച്ചതെന്ന് പ്രതികൾ പോലീസിനോട് പറഞ്ഞു. പാലാ ഹൈവേ പോലീസ് എസ്.ഐ അനിൽകുമാർ, സി.പി.ഓ മാരായ ശ്രീജിത്ത് രാജ്,സജീവ് കുമാർ എന്നിവർ ചേർന്നാണ് പ്രതികളെ അറസ്റ്റ് ചെയ്തത്.
