21 August, 2022 06:41:44 PM
ജാമ്യത്തിലിറങ്ങി വീണ്ടും കഞ്ചാവ് വില്‍പ്പന; പ്രതിയുടെ ജാമ്യം റദ്ദാക്കി അറസ്റ്റ് ചെയ്തു
കാഞ്ഞിരപ്പള്ളി: നിരവധി കഞ്ചാവ് കേസിലെ പ്രതിയായ തൃക്കൊടിത്താനം പുളിക്കോട്ടപ്പടി തുണ്ടിയിൽ വീട്ടിൽ ജെയിംസ് മകൻ ജെബിജെയിംസ് (31)നെ ജാമ്യം റദ്ദാക്കി കാഞ്ഞിരപ്പള്ളി പോലീസ് അറസ്റ്റ് ചെയ്തു. കഞ്ചാവ് കേസിൽ ജാമ്യത്തിൽ ഇറങ്ങി വരവെ തൃക്കൊടിത്താനം പോലീസ് സ്റ്റേഷൻ പരിധിയിൽ സമാന കേസിൽ പ്രതിയായതിനെതുടര്‍ന്നാണ് നടപടി. ജാമ്യത്തിൽ ഇറങ്ങി വീണ്ടും കുറ്റകൃത്യങ്ങളിൽ ഏർപ്പെടുന്ന പ്രതികളുടെ ലിസ്റ്റ് തയ്യാറാക്കി അത്തരം പ്രവർത്തികൾ ചെയ്യുന്നവരുടെ ജാമ്യം റദ്ദാക്കുവാൻ ജില്ലാ പോലീസ് മേധാവി കെ.കാര്‍ത്തിക് എല്ലാ പോലീസ് സ്റ്റേഷനുകളിലും നിർദ്ദേശം നൽകിയിരുന്നു.
ഇതിന്‍റെ അടിസ്ഥാനത്തില്‍ കാഞ്ഞിരപ്പള്ളി പോലീസ് റിപ്പോർട്ട് സമർപ്പിക്കുകയും കോടതി ഇയാളുടെ ജാമ്യം റദ്ദ് ചെയ്യുകയും ചെയ്തു. തുടർന്ന് കാഞ്ഞിരപ്പള്ളി പോലീസ് പത്തനംതിട്ട ആറന്മുളയിൽ നിന്നും ഇയാളെ അറസ്റ്റ് ചെയ്യുകയായിരുന്നു. ഇയാൾക്ക് കാഞ്ഞിരപ്പള്ളി, തൃക്കൊടിത്താനം, ചങ്ങനാശ്ശേരി എക്സൈസ് എന്നീ സ്റ്റേഷനുകളിലും കേസുകൾ നിലവിലുണ്ട്.
