22 July, 2022 07:09:24 PM
സുഹൃത്തിനെ കൊലപ്പെടുത്താൻ ശ്രമിച്ച കേസില്‍ ഒളിവില്‍ പോയ പ്രതി പിടിയില്‍
കോട്ടയം: സുഹൃത്തിനെ കുത്തിക്കൊലപ്പെടുത്താൻ ശ്രമിച്ച കേസിലും വീട്ടിൽ അതിക്രമിച്ചു കയറി നാശനഷ്ടങ്ങൾ വരുത്തിയ കേസിലും പ്രതിയായിരിക്കെ ഒളിവിൽ കഴിഞ്ഞിരുന്ന യുവാവ് പിടിയിൽ. ളാക്കാട്ടൂർ തോട്ടപ്പള്ളി ഭാഗത്ത് രാജിമോൻ മകൻ ആരോമൽ എന്ന ഉണ്ണിക്കുട്ടൻ(24) നെയാണ് പാമ്പാടി പോലീസ് അറസ്റ്റ് ചെയ്തത്. മുൻപ് കാപ്പാ നിയമ പ്രകാരം ഇയാള്‍ക്കെതിരെ നടപടി സ്വീകരിച്ചിരുന്നു. കാലാവധി കഴിഞ്ഞ് പുറത്തിറങ്ങിയ ഇയാൾ സുഹൃത്തിനെ കുത്തിക്കൊലപ്പെടുത്താൻ ശ്രമിച്ച കേസിൽ പ്രതിയായിരിക്കെ ജാമ്യം ലഭിച്ചു പുറത്തിറങ്ങിയതിനു ശേഷം മറ്റൊരു വീട്ടിൽ അതിക്രമിച്ചു കയറി നാശനഷ്ടങ്ങൾ വരുത്തി. തുടര്‍ന്ന് കോടതി ഇയാളുടെ ജാമ്യം റദ്ദാക്കി. എന്നാല്‍ ഇയാള്‍ ഒളിവില്‍ പോവുകയായിരുന്നു.
കോട്ടയം ജില്ലയിലെ വാകത്താനം, കോട്ടയം ഈസ്റ്റ്, കോട്ടയം വെസ്റ്റ്, പാമ്പാടി എന്നീ സ്റ്റേഷനുകളിലും പത്തനംതിട്ട ജില്ലയിലും ഇയാള്‍ക്കെതിരെ നിരവധി കേസുകൾ നിലവിലുണ്ട്. കോട്ടയം ജില്ലാ പോലീസ് മേധാവിയുടെ നേതൃത്വത്തില്‍ പ്രത്യേക അന്വേഷണ സംഘം രൂപീകരിച്ച് തിരച്ചില്‍ ശക്തമാക്കിയതിനെതുടര്‍ന്ന് പ്രതിയെ തിരുവനന്തപുരത്തുനിന്നും പിടികൂടുകയുമായിരുന്നു. പാമ്പാടി എസ്.എച്ച്.ഓ. പ്രശാന്ത് കുമാർ, എസ്. ഐ. ലെബിമോൻ, സി.പി.ഓ മാരായ ജിബിൻ ലോബോ, ബിജേഷ്, അനീഷ് എന്നിവർ അന്വേഷണ സംഘത്തില്‍ ഉണ്ടായിരുന്നു.
കോട്ടയം ജില്ലയിലെ മുഴുവന്‍ സ്റ്റേഷൻ പരിധിയിലും ഒന്നിൽ കൂടുതൽ കേസുകൾ ഉള്ള പ്രതികളെ അവർ വീണ്ടും കുറ്റകൃത്യങ്ങളിൽ ഏർപ്പെടുന്നുണ്ടോ എന്ന് നിരീക്ഷിക്കുന്നതിനും ഉണ്ടെങ്കിൽ അത്തരക്കാരെ കണ്ടെത്തി അവർക്കെതിരെ ശക്തമായ നിയമനടപടി സ്വീകരിക്കുന്നതിനുമായി മുഴുവൻ ഡി.വൈ.എസ്പി മാർക്കും, എസ്.എച്ച്. ഓ. മാർക്കും നിർദ്ദേശം നൽകിക്കഴിഞ്ഞതായി ജില്ലാ പോലീസ് മേധാവി കെ.കാർത്തിക്ക് അറിയിച്ചു .
