12 July, 2021 10:01:19 PM
എം അഞ്ജന സ്ഥാനമൊഴിഞ്ഞു; ഡോ.പി.കെ ജയശ്രീ കോട്ടയം ജില്ലയുടെ പുതിയ കളക്ടര്‍
കോട്ടയം: കോട്ടയം ജില്ലാ കളക്ടറായിരുന്ന എം അഞ്ജന ചുമതലയൊഴിഞ്ഞു. ഡോ. പി കെ ജയശ്രീയാണ് പുതിയ കോട്ടയം കളക്ടര്‍. തൃശൂർ സ്വദേശിനിയായ ഡോ. ജയശ്രീ പഞ്ചായത്ത് വകുപ്പ് ഡയറക്ടറായി സേവനമനുഷ്ഠിക്കവെയാണ് കോട്ടയത്തേക്കുള്ള നിയോഗം. പൊതുഭരണ വകുപ്പ് ജോയിന്‍റ് ഡയറക്ടറായാണ് എം അഞ്ജനയുടെ സ്ഥാനമാറ്റം. ഒപ്പം സാമൂഹ്യക്ഷേമ വകുപ്പ് ഓഫീസറുടെ അധിക ചുമതലയും വഹിക്കും.
1987 ല്‍ കൃഷി വകുപ്പില്‍ ഓഫീസറായാണ് ഡോ. ജയശ്രീ ഔദ്യോഗിക ജീവിതം ആരംഭിച്ചത്. 2000 ല്‍ കേരള അഗ്രിക്കള്‍ച്ചറല്‍ യൂണിവേഴ്സിറ്റിയില് അസി. പ്രൊഫസറായി ഉദ്യോഗക്കയറ്റം ലഭിച്ചു. 2007 ലാണ് വകുപ്പ് മാറി റവന്യു വകുപ്പില്‍ ഡപ്യൂട്ടി കളക്ടറായി കാസര്‍കോട് ചുമതലയേറ്റത്. എന്‍ഡോസള്‍ഫാന്‍ ദുരിതമേഖലകളില്‍ നടത്തിയ സ്തുത്യര്‍ഹമായ സേവനത്തിലൂടെ ഏറെ ശ്രദ്ധിക്കപ്പെട്ടു. 2012 ല്‍ തൃശൂരില്‍ ഡെപ്യൂട്ടി കളക്ടറായി ചാര്‍ജെടുത്തു. ഇക്കാലത്ത് ഏറെക്കാലം തൃശൂര്‍ ജില്ലാ കളക്ടറുടെ ചുമതലയും വഹിച്ചു.
ഗുരുവായൂര്‍ ദേവസ്വം അഡ്മിനിസ്‌ട്രേറ്ററായും, കൂടല്‍മാണിക്യം ദേവസ്വം അഡ്മിനിസ്‌ട്രേറ്ററായും സേവനമനുഷ്ഠിച്ചിരുന്നു. അഗ്രിക്കള്‍ച്ചറല്‍ യൂണിവേഴ്സിറ്റിയില് നിന്നാണ് അഗ്രോണമിയില്‍ ഡോക്ടറേറ്റ് നേടിയത്. 2013 ല്‍ തൃശൂരിലെയും, 2015 ല്‍ കാസര്‍കോട്ടെയും സേവനത്തിനു മികച്ച ഡെപ്യൂട്ടി കളക്ടറെന്ന അംഗീകാരം ഡോ. ജയശ്രീ നേടിയിരുന്നു. കാസർകോട് പെരിയ സ്വദേശിയും എസ്ബിഐ കോഴിക്കോട് ശാഖാ മാനേജരുമായിരുന്ന സി വി രവീന്ദ്രനാണ് ഭര്‍ത്താവ്. മക്കള്‍: ഡോ. ആരതി, അപര്‍ണ്ണ.
