23 June, 2021 10:53:22 PM
ഇളയദളപതിയുടെ പിറന്നാൾ ദിനത്തിൽ കോട്ടയത്ത് സൗജന്യ ബസ് സർവീസ് നടത്തി മൂലവട്ടം ഫ്രണ്ട്സ്
കോട്ടയം: തമിഴ് നടന്‍ വിജയിയുടെ ജന്മദിനം 'ദളപതി വിജയ് മക്കള്‍ ഇയക്കം' കോട്ടയം ഫ്രണ്ട്സ് മൂലവട്ടം യൂണിറ്റ് ആഘോഷിച്ചത് ബസില്‍ സൌജന്യയാത്ര ഒരുക്കി. കോട്ടയം – കൊല്ലാട് റൂട്ടിലോടുന്ന പൊന്നു ബസില്‍ ഇന്നലെ രാവിലെ 7.50നു കൊല്ലാട്ടുനിന്നും പുറപ്പെടുന്നതു മുതല്‍ രാത്രി 7.30ന് കോട്ടയത്തുനിന്നുള്ള അവസാന ട്രിപ്പ് വരെയും മുഴുവന്‍ ട്രിപ്പും സൗജന്യ യാത്രയൊരുക്കിയാണ് ജന്മദിനാഘോഷം വേറിട്ടതാക്കിയത്.
വിജയ് ആരാധകന്‍ കൂടിയായ ബസ് ഉടമയുമായി സൗഹൃദത്തിലായിരുന്ന പ്രവര്‍ത്തകര്‍ ചര്‍ച്ചനടത്തിയാണ് സൗജന്യ യാത്ര തരപ്പെടുത്തിയതെന്ന് യൂണിറ്റ് പ്രസിഡന്‍റ് യു.എസ്. മനീഷ് പറഞ്ഞു. ഡയാലിസിസ് രോഗിക്ക് ചികിത്സാ സഹായം, നിര്‍ധന വിദ്യാര്‍ഥികള്‍ക്കു പഠനോപകരണ വിതരണം, രക്തദാനം എന്നിവയും ആഘോഷങ്ങളുടെ ഭാഗമായി നടത്തി. സെക്രട്ടറി അലക്‌സ് പി. ചാക്കോ, ട്രഷറര്‍ രാഹുല്‍ ആര്‍. ശിവ തുടങ്ങി മൂലവട്ടം യൂണിറ്റിലെ 30 അംഗങ്ങളാണ് ആഘോഷ പരിപാടികള്‍ സംഘടിപ്പിച്ചത്.
