09 May, 2021 11:10:06 PM
കുറ്റ്യാടിയില്‍നിന്ന് മോഷ്ടിച്ച സ്വകാര്യബസുമായി കൊയിലാണ്ടി സ്വദേശി കുമരകത്ത് പിടിയിൽ
കോട്ടയം: കോഴിക്കോട് കുറ്റ്യാടിയില്‍നിന്ന് മോഷ്ടിച്ച സ്വകാര്യബസുമായി കൊയിലാണ്ടി സ്വദേശിയെ കുമരകത്ത് പൊലീസ് പിടികൂടി. കവണാറ്റിന്‍കരയില്‍ ഞായറാഴ്ച രാവിലെ പൊലീസ് നടത്തിയ പരിശോധനയിലാണ് ബസും മോഷ്ടാവും കുടുങ്ങിയത്. കൊയിലാണ്ടി ചെറുകൊല്ലിമിത്തല്‍ ബിനൂപാണ് (30) പിടിയിലായത്.
നാല് ജില്ല കടന്നെത്തിയ ബസ് റാന്നിയില്‍നിന്ന് അന്തര്‍ സംസ്ഥാന തൊഴിലാളികളെ കയറ്റാന്‍ പോകുകയാണെന്നാണ് പറഞ്ഞത്. സംശയം തോന്നിയ പൊലീസ് കൂടുതല്‍ ചോദ്യം ചെയ്തതോടെ മോഷ്ടിച്ചതാണെന്ന് മനസ്സിലായി. ഉടമയെ ബന്ധപ്പെട്ടപ്പോഴാണ് ബസ് മോഷണംപോയ വിവരം അദ്ദേഹം അറിയുന്നത്. KL18 Q 1107 നമ്പറിലുള്ള പീപീ എന്ന ബസ് ലോക്ഡൗണിനെ തുടര്‍ന്ന് കുറ്റ്യാടി ബസ് സ്റ്റാന്‍ഡില്‍ നിര്‍ത്തിയിട്ടിരിക്കുകയായിരുന്നു.
