09 March, 2020 01:41:02 AM
കുറുപ്പന്തറയിൽ ബൈക്ക് മതിലിലും വൈദ്യുത പോസ്റ്റിലും ഇടിച്ച് രണ്ട് യുവാക്കൾ മരിച്ചു
കടുത്തുരുത്തി: നിയന്ത്രണം വിട്ട ബൈക്ക് വൈദ്യുത പോസ്റ്റിലും മതിലിലും ഇടിച്ച് രണ്ട് യുവാക്കൾ മരിച്ചു. ഇരവിമംഗലം അമ്പഴത്തുങ്കൽ ഡിജോ (22), മാഞ്ഞൂർ സൗത്ത് കുന്നത്ത് ജോമി (22) എന്നിവരാണ് മരിച്ചത്. ഞായറാഴ്ച രാത്രി 11.30നു കുറുപ്പന്തറ പുളിന്തറ വളവിലാണ് അപകടം.
കാറ്ററിംഗ് ജോലി കഴിഞ്ഞു കോതനല്ലൂർ ഭാഗത്തുനിന്ന് കുറുപ്പന്തറയിലേക്ക് വരുന്നതിനിടെയാണു യുവാക്കൾ അപകടത്തിൽപ്പെട്ടത്. ബൈക്ക് നിയന്ത്രണം വിട്ട വൈദ്യുതി തൂണിലും മതിലിലും ഇടിക്കുകയായിരുന്നു. ഗുരുതര പരിക്കേറ്റ ഇരുവരെയും തെള്ളകത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. കടുത്തുരുത്തി പോലീസ് സ്ഥലത്തെത്തി മേൽനടപടി സ്വീകരിച്ചു
