28 February, 2020 11:37:55 PM
ഏറ്റുമാനൂരില്‍ കെഎസ്ആര്‍ടിസി മിന്നല്‍ ബസ് ഇടിച്ച് ബൈക്ക് യാത്രികന് മരിച്ചു
ഏറ്റുമാനൂര്‍: എം സിറോഡില്‍ ഏറ്റുമാനൂര്‍ മഹാദേവക്ഷേത്രത്തിന്‍റെ പടിഞ്ഞാറെനടയില്‍ കെഎസ്ആര്‍ടിസി മിന്നല്‍ ബസ് ബൈക്കില്‍ ഇടിച്ച് ബൈക്ക് യാത്രികന് ദാരുണാന്ത്യം. ഏറ്റുമാനൂർ ഗോകുലം ചിട്ടി ഫണ്ടിലെ ജീവനക്കാരനും നീണ്ടൂർ റോഡിൽ സിയോൺ കവലയ്ക്ക് സമീപം താമസക്കാരനുമായ വയനാട് മീനങ്ങാടി വളവയിൽ പേപ്പതയിൽ ഷിബു പി.എം (44) ആണ് മരിച്ചത്. അപകടത്തില്‍ ബൈക്ക് നിശേഷം തകര്‍ന്നു. വെള്ളിയാഴ്ച രാത്രി 11.15 മണിയോടെ ആയിരുന്നു അപകടം.
ദിശതെറ്റിവന്ന ബസ് വഴിയരികില്‍ നിര്‍ത്തിയിരുന്ന ബൈക്കില്‍ ഇടിക്കുകയായിരുന്നു. ഇടിയുടെ ആഘാതത്തില്‍ ബൈക്ക് യാത്രികന് ബസിന്‍റെ മുന്‍വശത്തെ ചില്ലില്‍ ഇടിച്ച് വഴിയരികിലേക്ക് തെറിച്ചു വീണു. ബൈക്കുമായി ബസ് 50 മീറ്ററോളം മുന്നോട്ട് പോയി. പരിക്കേറ്റ ഷിബുവിനെ കോട്ടയം മെഡിക്കല്‍ കോളേജ് ആശുപത്രിയിലേക്ക് കൊണ്ടുപോയെങ്കിലും യാത്രാമധ്യേ മരണം സംഭവിക്കുകയായിരുന്നു.
