19 December, 2019 08:57:56 PM
പൊൻകുന്നം പെട്രോൾ പമ്പിന് മുന്നിൽ സ്വകാര്യ ബസിന് തീപിടിച്ചു; ഒഴിവായത് വൻദുരന്തം
പൊൻകുന്നം: കെ.കെ റോഡിൽ കോട്ടയം പൊൻകുന്നം പെട്രോൾ പമ്പിന് മുന്നിൽ സ്വകാര്യ ബസിന് തീപിടിച്ചു. നിറയെ യാത്രക്കാരുണ്ടായിരുന്ന സെന്‍റ് തോമസ് വാക്കയിൽ എന്ന സ്വകാര്യബസിനാണ് വ്യാഴാഴ്ച വൈകിട്ട് ആറരയോടെ പൊൻകുന്നം കെ.വി.എം.എസ് ജംഗ്ഷനു സമീപത്ത് നടുറോഡിൽ വെച്ച് തീപിടിച്ചത്. യാത്രക്കാരെ ഉടൻ ബസിനുള്ളിൽ നിന്നും ഇറക്കിയതിനാൽ വൻ ദുരന്തം ഒഴിവായി.
കോട്ടയത്തു നിന്നും കട്ടപ്പനയ്ക്കു പോകുകയായിരുന്ന ബസ് പൊൻകുന്നം ബസ് സ്റ്റാൻഡിൽ നിന്നും പുറത്തിറങ്ങി കെ.വി എം എസിനു സമീപത്തെത്തിയപ്പോൾ ഓഫായി പോയി. തുടർന്ന് ബസിന്‍റെ മുന്നിൽ നിന്നും തീയും പുകയും ഉയർന്നു. ഉടന്‍ ബസ് നിർത്തി യാത്രക്കാരെ പുറത്തിറക്കി. റോഡിൽ ഉണ്ടായ ഗതാഗതക്കുരുക്ക് ഒഴിവാക്കുന്നതിനായി ബസ് മുന്നോട്ടു നീക്കിയതിനിടെ കൂടുതൽ തീയും പുകയും ഉയരുകയായിരുന്നു. പമ്പിൽ നിന്നും അഗ്നിരക്ഷാ ഉപകരണങ്ങളുമായി എത്തിയ ജീവനക്കാരും, നാട്ടുകാരും അഗ്നിരക്ഷാ സേനാംഗങ്ങളും ചേർന്ന് നടത്തിയ ശ്രമത്തിനൊടുവിൽ തീ നിയന്ത്രണ വിധേയമായി.
