18 December, 2019 12:02:09 PM
മധുരപ്രതികാരവുമായി ജോസ് കെ മാണി; തദ്ദേശ ഉപതെരഞ്ഞെടുപ്പിൽ ജോസഫ് പക്ഷത്തിന് പരാജയം
കോട്ടയം: കേരള കോൺഗ്രസ് എമ്മിൽ ജോസഫ് - ജോസ് വിഭാഗങ്ങൾ തമ്മിലുള്ള പോര് ശക്തമായി തുടരവെ പി.ജെ.ജോസഫിന് മധരപ്രതികാരവുമായി ജോസ് കെ മാണി. കോട്ടയം അകലക്കുന്നം ഗ്രാമപഞ്ചായത്തിലെ ആറാം വാര്‍ഡില്‍ നടന്ന തദ്ദേശ ഉപതെരഞ്ഞെടുപ്പിൽ ജോസ്.കെ മാണി പക്ഷത്തിന് വിജയം. പി.ജെ ജോസഫ് ഔദ്യോഗിക ചിഹ്നമായ രണ്ടിലയില്‍ മത്സരിപ്പിച്ച സ്ഥാനാര്‍ഥിയെ തോല്‍പിച്ചാണ് ജോസ്.കെ മാണി വിഭാഗം വിജയം നേടിയത്.
ജോസ്.കെ മാണിയുടെ സ്ഥാനാര്‍ഥി ജോര്‍ജ് മൈലാടി 63 വോട്ടിന് ജോസഫ് പക്ഷത്തെ ബിബിന്‍ തോമസിനെ പരാജയപ്പെടുത്തി. 320 വോട്ട് ജോര്‍ജ് തോമസ് മൈലാടിക്കും ബിബിന്‍ തോമസിന് 257 വോട്ടുമാണ് ലഭിച്ചത്. ഫുട്‌ബോള്‍ ചിഹ്നമായിരുന്നു ജോർജ് തോമസിന്. അതേസമയം സിപിഎം സ്ഥാനാര്‍ഥിക്ക് 29 വോട്ടും ബിജെപിക്ക് 15 വോട്ടും മാത്രമെ നേടാനായുള്ളൂ. ഇരുവിഭാഗത്തിന് വേണ്ടിയും പ്രചാരണത്തിനിറങ്ങാതെ കോൺഗ്രസ് മന:സാക്ഷി വോട്ടിന് ആഹ്വാനം ചെയ്തിരുന്നു.
