26 October, 2019 07:04:23 PM
ലൈറ്റ് ആന്‍റ് സൗണ്ട് വെല്‍ഫെയര്‍ അസോസിയേഷന്‍ ജില്ലാ സമ്മേളനത്തിന് സമാപനമായി
ഏറ്റുമാനൂര്‍: ലൈറ്റ് ആന്‍റ് സൗണ്ട് വെല്‍ഫെയര്‍ അസോസിയേഷന്‍ ആറാമത് ജില്ലാസമ്മേളനത്തിന് സമാപ്തിയായി. സമ്മേളനത്തോടനുബന്ധിച്ച് ഏറ്റുമാനൂരില്‍ നടന്ന പൊതുസമ്മേളനം അഡ്വ.കെ.സുരേഷ്‌കുറുപ്പ് എം.എല്‍.എ ഉദ്ഘാടനം ചെയ്തു. ജില്ലാ പ്രസിഡന്‍റ് വിജയന്‍ രാമപുരം അധ്യക്ഷനായിരുന്നു. വിദ്യാഭ്യാസ അവാര്‍ഡ് തിരുവഞ്ചൂര്‍ രാധാകൃഷ്ണന്‍ എംഎല്‍എ വിതരണം ചെയ്തു. നവജീവന്‍ ട്രസ്റ്റ് ചെയര്‍മാന്‍ പി.യു തോമസിനെ മോന്‍സ് ജോസഫ് എംഎല്‍എ ആദരിച്ചു.
സംസ്ഥാന നേതാക്കളായ റഹിം കുഴിപ്പുറം, കെ.വി.ബിജു, പി.എച്ച് ഇക്ബാല്‍ എന്നിവരെയും മുതിര്‍ന്ന അംഗങ്ങളെയും യോഗത്തില്‍ ആദരിച്ചു. വ്യാപാരി വ്യവസായി ഏകോപന സമിതി പ്രസിഡന്‍റ് എന്‍ പി തോമസ്, വ്യാപാരി ക്ഷേമനിധി ബോര്‍ഡ് വൈസ് ചെയര്‍മാന്‍ ഇ എസ് ബിജു, നഗരസഭാ വിദ്യാഭ്യാസകാര്യ സ്ഥിരം സമിതി അധ്യക്ഷന്‍ ഗണേശ് ഏറ്റുമാനൂര്‍, എല്‍ എസ് ഡബ്ല്യുഎകെ എറണാകുളം ജില്ലാ പ്രസിഡന്‍റ് കെ.എ വേണുഗോപാല്‍, സംസ്ഥാന സെക്രട്ടറി അനില്‍ കടമാംകുളം, സുധീഷ് മാധവ, വി.വി.റജി തുടങ്ങിയവര്‍ പ്രസംഗിച്ചു.
രാവിലെ പ്രതിനിധിസമ്മേളനം മുന്‍ സംസ്ഥാന പ്രസിഡന്‍റ് തമ്പി നാഷണല്‍ ഉദ്ഘാടനം ചെയ്തു. ജയിംസ് തോമസ് ക്‌ളാസ് നയിച്ചു. സമ്മേളനത്തിന്‍റെ ഭാഗമായി നൂതന ഉപകരണങ്ങളുടെ പ്രദര്‍ശനവും പ്രകടനവും ഗാനമേളയും ഉണ്ടായിരുന്നു. ഏറ്റുമാനൂരിലെ നഗരവീഥികള്‍ കൊടിതോരണങ്ങള്‍ക്ക് പകരം വൈദ്യുതദീപങ്ങളാല്‍ അലങ്കരിച്ചത് പരിപാടിയ്ക്ക് വ്യത്യസ്തയേകി.
