23 October, 2019 03:45:12 PM
കോരുത്തോട്ടിൽ കാട്ടാന ഇറങ്ങി: വ്യാപകമായി കൃഷി നശിപ്പിച്ചു; നാട്ടുകാര്‍ ആശങ്കയില്‍
കോരുത്തോട്: പട്ടാളക്കുന്ന് ഭാഗത്ത് ഇന്ന് വെളുപ്പിന് കാട്ടാനയുടെ ആക്രമണത്തിൽ വന്‍തോതില്‍ കൃഷിനാശം. തൈപ്പറമ്പിൽ മോഹനൻ, തൈപ്പറമ്പിൽ ശശി, വാണിപ്പുരക്കൽ സിബി എന്നിവരുടെ കൃഷിഭൂമിയിൽ കപ്പ, വാഴ, കൊടി മുതലായവ വ്യാപകമായി നശിപ്പിച്ചു. കഴിഞ്ഞ ദിവസങ്ങളിൽ പട്ടാളകുന്ന് ഭാഗത്ത് കൊച്ചുപറമ്പിൽ വിദ്യാധരൻ, കുമാരമംഗലം സുനിൽ, മൂലേകടുപ്പിൽ അമ്മിണി, കുന്നേൽപറമ്പിൽ കൃഷ്ണൻകുട്ടി എന്നിവരുടെ കൃഷിഭൂമിയിൽ ഒട്ടേറെ നാശനഷ്ടങ്ങൾ വരുത്തി.
കാട്ടാനയുടെ ആക്രമണം തടയാൻ ഫോറസ്റ്റ് അധികാരികൾ അടിയന്തരമായി ഇടപെട്ടില്ലെങ്കിൽ കോരുത്തോട് ഏരിയയിൽ ഉള്ള കൃഷിക്കാരെ മുഴുവൻ സംഘടിപ്പിച്ച് വ്യാപകമായ സമരപരിപാടിയിലേക്ക് നീങ്ങുമെന്നും ക്യഷി നശിപ്പിച്ച കർഷകർക്ക് അടിയന്തര സഹായം നൽകണമെന്നും വാർഡ് മെമ്പർ ജോജോ പാമ്പാടത്ത് സർക്കാറിനോട് അവശ്യപ്പെട്ടു
