21 December, 2016 04:49:19 PM
ബ്രിട്ടനെ മറികടന്ന് ഇന്ത്യ ലോകത്തെ ആറാമത്തെ സമ്പദ്‌വ്യവസ്ഥയായി
ദില്ലി: മൊത്ത ആഭ്യന്തര ഉൽപാദനത്തിൽ(ജി.ഡി.പി) ബ്രിട്ടനെ മറികടന്ന് ഇന്ത്യ ലോകത്തെ ആറാമത്തെ വലിയ സമ്പദ്‌വ്യവസ്ഥയായി. ഇന്ത്യയുടെ അതിവേഗമുള്ള സാമ്പത്തിക വളർച്ചയും യൂറോപ്യൻ യൂനിയൻ വിടാനുള്ള തീരുമാനത്തിന് ശേഷം ബ്രിട്ടന്‍റെ സമ്പദ്‌വ്യവസ്ഥയിലുണ്ടായ തകര്‍ച്ചുമാണ് ഇന്ത്യയുടെ നേട്ടത്തിന് കാരണം. യു. എസ്, ചൈന, ജപ്പാന്‍, ജര്‍മനി, ഫ്രാന്‍സ് എന്നീ രാജ്യങ്ങളാണ് ഇന്ത്യക്കു മുന്നിലുള്ളത്. കഴിഞ്ഞ നൂറു വർഷത്തിനിടെ ആദ്യമായാണ് ഇന്ത്യ ഈ നേട്ടത്തിലെത്തുന്നതെന്ന് ഫോറിന്‍ പോളിസി മാഗസിൻ റിപ്പോർട്ട് ചെയ്തു.
ഈ വര്‍ഷം ഫെബ്രുവരിയില്‍ ചൈനയെ മറികടന്ന് ഇന്ത്യ ലോകത്തെ ഏറ്റവും വേഗത്തില്‍ വളരുന്ന സമ്പദ് വ്യവസ്ഥയെന്ന നേട്ടം കൈവരിച്ചിരുന്നു. ഇൗ സ്ഥാനം ഉടൻ നഷ്ടമാവില്ലെന്നും 2017 ൽ ജിഡിപിയിൽ 7.6 ശതമാനം വളർച്ച പ്രതീക്ഷിക്കുന്നതിനാൽ ഇന്ത്യ സ്ഥാനം നിലനിർത്തുമെന്നും അന്താരാഷ്ട്ര നാണയ നിധിയും വ്യക്തമാക്കിയിരുന്നു. ബ്രിട്ടൻ 2016 ൽ 1.8 ശതമാനവും 2017 ൽ 1.1 ശതമാനവും വളർച്ച നേടുമെന്നാണ് പ്രതീക്ഷിക്കുന്നത്.
