14 March, 2025 05:56:04 PM
ലഹരിമരുന്ന്: പാലക്കാട് ജില്ലയില്‍ 20 ദിവസത്തിനിടെ പിടിയിലായത് 333 പേര്‍
28.09 ഗ്രാം മെത്താഫെറ്റമിനുമായി എറണാകുളം, തിരുവനന്തപുരം സ്വദേശികൾ പാലക്കാട് പിടിയില്‍
പാലക്കാട് : ഓപ്പറേഷൻ " ഡി ഹണ്ട് " ന്‍റെ ഭാഗമായി മയക്കുമരുന്നിനെതിരെ നടത്തിയ പരിശോധനയിൽ രണ്ട് പേര്‍ പിടിയില്‍. പാലക്കാട് ജില്ലാ പോലീസ് മേധാവി അജിത്ത്കുമാറിൻ്റെ നിർദ്ദേശകാരം മണപ്പുള്ളിക്കാവില്‍ നടന്ന പരിശോധനയില്‍ മാരക മയക്കുമരുന്നായ 28.09 ഗ്രാം മെത്താഫെറ്റമിനുമായി തിരുവനന്തപുരം കോവളം പാച്ചലൂർ കിഴക്കേക്കുപ്പത്തിൽ സുനിലിന്‍റെ മകന്‍ അജിത്ത് ( 23), എറണാകുളം മൂവാറ്റുപുഴ നോര്‍ത്ത് പിറമഠം കിഴക്കേപുരയ്ക്കല്‍ രാജുവിന്‍റെ മകന്‍ രാജേഷ് (23) എന്നിവരാണ് പിടിയിലായത്.
ബാംഗ്ലൂരിൽ നിന്നാണ് പ്രതികൾ മയക്കുമരുന്ന് എത്തിച്ചത്. പ്രതികൾ ഉൾപ്പെടുന്ന മയക്കുമരുന്ന് സംഘത്തെക്കുറിച്ച് പോലീസ് അന്വേഷണം ശക്തമാക്കി. പാലക്കാട് എ എസ്.പി. രാജേഷ് കുമാർ, പാലക്കാട് നാർക്കോട്ടിക് സെൽ ഡി.വൈ.എസ്.പി അബ്ദുൾ മുനീർ എന്നിവരുടെ നേതൃത്വത്തിൽ സബ്ബ് ഇൻസ്പെക്ടർ ഹേമലതയുടെ നേതൃത്വത്തിലുള്ള പാലക്കാട് ടൗൺ സൗത്ത് പോലീസും പാലക്കാട് ജില്ലാ ലഹരി വിരുദ്ധ സ്ക്വാഡും ചേർന്നാണ് പരിശോധന നടത്തി മയക്കുമരുന്നും പ്രതികളേയും പിടികൂടിയത്.
20 ദിവസത്തിനിടെ പൊലീസ് പിടിയിലായത് 333 പേര്‍
ലഹരി മരുന്ന് കടത്തും വിപണനവും ഉപയോഗവുമായി ബന്ധപ്പെട്ട് പാലക്കാട് ജില്ലയില്‍ നിന്നും കഴിഞ്ഞ 20 ദിവസത്തിനിടെ പൊലീസ് പിടികൂടിയത് 333 പേരെ. 2025 ഫെബ്രുവരി 22 മുതല്‍ മാര്‍ച്ച് 12 വരെയുള്ള കണക്കാണിത്. ലഹരി കണ്ടെത്തുന്നതിനായി പൊലീസ് ആരംഭിച്ച സ്‌പെഷ്യല്‍ ഡ്രൈവിന്റെ ഭാഗമായാണ് ഇവര്‍ പിടിയിലായത്. ലഹരിയുമായി ബന്ധപ്പെട്ട് 328 കേസുകളാണ് ഈ കാലയളവില്‍ റിപ്പോര്‍ട്ട് ചെയ്തത്. 123 കിലോ കഞ്ചാവ്, 196 ഗ്രാം എം.ഡി.എം.എ, 122 ഗ്രാം മെത്താഫെറ്റാമൈന്‍, 9.2 ഗ്രാം ഹാഷിഷ് ഓയില്‍, ലഹരിക്കായി ഉപയോഗിക്കുന്ന വേദന സംഹാരി ട്രമഡോള്‍ ടാബ്‌ലറ്റ് (Pyeevon Spas Plus capsule tablets contains Tramadol HCI) 148.75 ഗ്രാം, ആല്‍പ്രസോളം (Alprapal capsule tablet contains Alprazolam tablets IP 0.5 mg) 11.78 ഗ്രാം എന്നിവയാണ് ഈ കാലയളവില്‍ പൊലീസിന്‍റെ നേതൃത്വത്തില്‍ പിടികൂടിയതെന്ന് നാര്‍ക്കോട്ടിക് സെല്‍ ഡിവൈ.എസ്.പി അറിയിച്ചു.
