15 June, 2022 01:39:17 AM
ചൈന തടവിലാക്കിയ മാധ്യമപ്രവർത്തകയ്ക്കു ഒരു വർഷത്തിനു ശേഷം ജാമ്യം
ബെയ്ജിംഗ്: ചൈനയിൽ തടവിൽ കഴിഞ്ഞിരുന്ന ബ്ലൂംബർഗ് മാധ്യമപ്രവർത്തക ഹാസെ ഫാന് ജാമ്യം. ഒരു വർഷത്തെ ജയിൽവാസത്തിനുശേഷമാണു ഫാന് ജാമ്യം ലഭിച്ചത്. ചൈനീസ് പൗരയായ ഫാനിനെ 2020 ഡിസംബറിൽ അവർ താമസിച്ചിരുന്ന അപ്പാർട്ട്മെന്‍റിൽനിന്നു പോലീസ് ഉദ്യോഗസ്ഥർ പിടിച്ചുകൊണ്ടു പോകുകയായിരുന്നു. കഴിഞ്ഞ വർഷം ജൂലൈയിൽ ഇവരുടെ അറസ്റ്റ് ഔദ്യോഗികമായി രേഖപ്പെടുത്തി.
ദേശസുരക്ഷ അപകടത്തിലാക്കിയെന്ന കുറ്റമാണ് ഇവർക്കെതിരേ ചുമത്തിയത്. ഫാനിന്‍റെ മോചനം സംബന്ധിച്ച് ചൈനീസ് വിദേശകാര്യ മന്ത്രാലയം ഇതേവരെ പ്രതികരിച്ചിട്ടില്ല. റോയിട്ടേഴ്സ്, സിഎൻബിസി, അൽ ജസീറ, സിബിഎസ് തുടങ്ങിയ സ്ഥാപനങ്ങളിൽ ജോലി ചെയ്തശേഷം 2017ലാണ് ഫാൻ ബ്ലൂംബർഗിലെത്തിയത്.
