24 November, 2025 09:51:09 AM
ഹിസ്ബുള്ള ചീഫ് ഓഫ് സ്റ്റാഫ് തബാതബിയെ വ്യോമാക്രമണത്തിൽ വധിച്ച് ഇസ്രയേൽ
ബെയ്‌റൂട്ട്: യുഎസ് മധ്യസ്ഥതയിൽ ഒരു വർഷം മുമ്പ് ഒപ്പുവെച്ച വെടിനിർത്തൽ കരാർ ലംഘിച്ച് ഇസ്രയേൽ ബെയ്‌റൂട്ടിൽ നടത്തിയ വ്യോമാക്രമണത്തിൽ ഹിസ്ബുള്ളയുടെ ചീഫ് ഓഫ് സ്റ്റാഫ് ഹയ്തം അലി തബാതബയി കൊല്ലപ്പെട്ടു. ലെബനൻ തലസ്ഥാനത്ത് നടന്ന ആക്രമണത്തിൽ അഞ്ചു പേർ കൊല്ലപ്പെടുകയും ഇരുപത്തിയെട്ട് പേർക്ക് പരിക്കേൽക്കുകയും ചെയ്തിട്ടുണ്ടെന്ന് ലെബനൻ ആരോഗ്യ മന്ത്രാലയം വ്യക്തമാക്കി.
ഹിസ്ബുള്ളയുടെ ശക്തികേന്ദ്രമായ തെക്കൻ ബെയ്‌റൂട്ടിലെ ദാഹിയയിലെ അപ്പാർട്ട്‌മെന്റ് ബ്ലോക്കിൽ ഞായറാഴ്ച നടത്തിയ ആക്രമണത്തിലാണ് തബാതബയി കൊല്ലപ്പെട്ടത്. തങ്ങളുടെ 'ധീരനായ ജിഹാദി കമാൻഡർ' കൊല്ലപ്പെട്ടുവെന്ന് പ്രസ്താവനയിലൂടെ ഹിസ്ബുള്ളയും സ്ഥിരീകരിച്ചിട്ടുണ്ട്. 2024 നവംബറിൽ ഒപ്പുവച്ച വെടിനിർത്തൽ കരാറിന് ശേഷം ഇസ്രയേൽ നടത്തുന്ന ആക്രമണത്തിൽ കൊലപ്പെട്ട സീനിയർ ഹിസ്ബുള്ള കമാൻഡറാണ് തബാതബയി. കഴിഞ്ഞ വർഷം നടന്ന യുദ്ധം മുതൽ ഇസ്രയേൽ സേന തബാതബയിയെ ലക്ഷ്യമിട്ട് നടത്തിയ മൂന്നാമത്തെ ശ്രമത്തിലാണ് ഫലം കണ്ടതെന്ന് ഇസ്രയേലി മാധ്യമങ്ങൾ റിപ്പോർട്ട് ചെയ്യുന്നു.
