25 January, 2020 10:21:22 AM
കൊറോണ വൈറസ് ഫ്രാൻസിലും; രണ്ടു പേർക്ക് കൊറോണ വൈറസ് ബാധ സ്ഥിരീകരിച്ചു
പാരീസ്: ഭീതി വിതച്ച് അതിവേഗം പടരുന്ന കൊറോണ വൈറസ് ഫ്രാൻസിലും എത്തി. ഫ്രാൻസിൽ രണ്ടു പേർക്ക് കൊറോണ വൈറസ് ബാധ സ്ഥിരീകരിച്ചു. വാർത്ത ഏജൻസിയായ എഎഫ്പിയാണ് ഇക്കാര്യം റിപ്പോർട്ട് ചെയ്തത്. യൂറോപ്പിൽ ഇതാദ്യമായാണ് കൊറോണ വൈറസ് ബാധ സ്ഥിരീകരിക്കുന്നത്. ചൈനയിലെ വുഹാൻ നഗരത്തിൽ ഡിസംബറിലാണ് വൈറസ് ബാധ ആദ്യം കാണപ്പെട്ടത്. ചൈനയിൽ കൊറോണ വൈറസ് ബാധിച്ച് 26 പേർ മരിച്ചതായാണ് റിപ്പോർട്ട്.
830 പേർ ചികിത്സയിലുണ്ട്. ബെയ്ജിംഗിൽ മാത്രം 34 പേർക്കു രോഗം സ്ഥിരീകരിച്ചു. ക്വിൻഹായ്, ഇന്നർമംഗോളിയ, സ്വയംഭരണമേഖലയായ ടിബറ്റ് എന്നിവ ഒഴികെയുള്ള മുഴുവൻ ചൈനീസ് പ്രവിശ്യകളിലേക്കും രോഗം പടർന്നിട്ടുണ്ടെന്നാണു റിപ്പോർട്ട്. ചൈനയിലെ വിവിധ നഗരങ്ങൾക്കു പുറമേ തായ്‌വാൻ, ജപ്പാൻ, സിംഗപൂർ, നേപ്പാൾ ദക്ഷിണ കൊറിയ, തായ്‌ലൻഡ്, വിയറ്റ്നാം, യുഎസ് തുടങ്ങിയ രാജ്യങ്ങളിലേക്കും പടർന്നിട്ടുണ്ട്. ജപ്പാനിൽ വെള്ളിയാഴ്ച രണ്ടാമത്തെ വ്യക്തിക്കും കൊറോണ വൈറസ് ബാധ സ്ഥിരീകരിച്ചിട്ടുണ്ട്.
