12 March, 2016 12:45:53 PM
പാന്‍മസാല പരസ്യം ; നടന്‍ അജയ് ദേവ്ഗണിന് ദില്ലി സര്‍ക്കാരിന്‍റെ നോട്ടീസ്
ദില്ലി : പുകയില ഉല്‍പന്നങ്ങളുടെ പരസ്യത്തില്‍ പ്രത്യക്ഷപ്പെട്ടതിന് ബോളിവുഡ് നടന്‍ അജയ് ദേവ്ഗണിന് ദില്ലി സര്‍ക്കാരിന്‍റെ ആരോഗ്യവകുപ്പ് നോട്ടീസ് അയച്ചു. കാന്‍സറിന് കാരണമാകുന്ന പാന്‍മസാല ഉല്‍പന്നങ്ങളുടെ പരസ്യങ്ങളില്‍നിന്ന് പിന്മാറാന്‍ ആവശ്യപ്പെട്ട് അജയ് ദേവ്ഗണ്‍ ഉള്‍പ്പെടെ നടന്മാരായ ഷാറൂഖ് ഖാന്‍, സൈഫ് അലി ഖാന്‍, ഗോവിന്ദ, അര്‍ബാസ് ഖാന്‍, സണ്ണി ലിയോണ്‍ എന്നിവര്‍ക്കും നേരത്തെ മഹാരാഷ്ട്ര സര്‍ക്കാര്‍ ആരോഗ്യവകുപ്പ്ക ത്തയച്ചിരുന്നു.
പുകയില ഉല്‍പന്നങ്ങള്‍ക്ക് പ്രചാരം നല്‍കുകയും ആളുകളെ വഴിതെറ്റിക്കുകയും ചെയ്യുന്ന ഇത്തരം പരസ്യങ്ങളില്‍ അഭിനയിക്കാതിരിക്കാന്‍ വേണ്ടിയാണ് നോട്ടീസ് അയക്കുന്നത്. പൊതുജനാരോഗ്യത്തിന് മേലുള്ള കടന്നാക്രമണത്തിന് പുകയില കമ്പനികളെപോലെ അവരുടെ ഉല്‍പന്നത്തിന്‍െറ പരസ്യത്തില്‍ പ്രത്യക്ഷപ്പെടുക വഴി നടനും ഉത്തരവാദി ആണെന്ന് നോട്ടീസില്‍ പറയുന്നു.
ആരോഗ്യവകുപ്പിലെ അഡീഷനല്‍ ഡയറക്ടര്‍ എസ്.കെ. അറോറയാണ് നോട്ടീസ് അയച്ചത്. വായിലെ കാന്‍സറിന് കാരണമായ പുകയില ഉല്‍പന്നങ്ങളുടെ ഉപയോഗത്തില്‍ നിന്ന് ലക്ഷക്കണക്കിന് ജനങ്ങളെ രക്ഷിക്കാനുള്ള പുകയില വിരുദ്ധ കാമ്പയിനില്‍ പങ്കാളികളാകാന്‍ സര്‍ക്കാര്‍ താരങ്ങളോട് ആവശ്യപ്പെട്ടു.
