19 January, 2026 04:08:47 PM
മൂന്നാം ബലാത്സംഗക്കേസ്; ജാമ്യാപേക്ഷ നല്കി രാഹുല് മാങ്കൂട്ടത്തില്
പത്തനംതിട്ട: മൂന്നാമത്തെ ബലാത്സംഗക്കേസില് രാഹുല് മാങ്കൂട്ടത്തില് എംഎല്എ പത്തനംതിട്ട ജില്ലാ സെഷന്സ് കോടതിയില് ജാമ്യാപേക്ഷ നല്കി. ഉഭയസമ്മത പ്രകാരമുള്ള ബന്ധമെന്നാണ് ഹര്ജിയില് രാഹുലിന്റെ വാദം. സെഷന്സ് കോടതി നാളെ ജാമ്യ ഹര്ജി പരിഗണിക്കും. യുവതിയെ ബലാത്സംഗം ചെയ്തിട്ടില്ലെന്നും ഉഭയസമ്മത പ്രകാരമുള്ള ലൈംഗിക ബന്ധമെന്ന് രാഹുല് ജാമ്യ ഹര്ജിയില് പറയുന്നു.
എന്നാല്, ബലാത്സംഗക്കുറ്റം നിലനില്ക്കുന്നതിനാവശ്യമായ തെളിവുകളുണ്ടെന്ന മജിസ്ട്രേറ്റ് കോടതിയുടെ നിരീക്ഷണം രാഹുലിന് തിരിച്ചടിയാണ്. ഒപ്പം, അന്വേഷണത്തോട് രാഹുല് സഹകരിക്കുന്നില്ലെന്ന വിവരം പ്രോസിക്യൂഷന് വാദം നടക്കുമ്പോള് കോടതിയെ അറിയിക്കുകയും ചെയ്യും.
രാഹുല് പുറത്തിറങ്ങിയാല് അതിജീവിതയുടെ ജീവന് ഭീഷണിയാണെന്ന് ചൂണ്ടിക്കാട്ടിയാണ് തിരുവല്ല ജുഡീഷ്യല് മജിസ്ട്രേറ്റ് കോടതി ജാമ്യം നിഷേധിച്ചത്. പരാതിയില് ഉന്നയിച്ചിരിക്കുന്ന ആരോപണങ്ങള് ഗുരുതരമാണെന്നും സമാനമായ മുന്കാല അനുഭവങ്ങള് ഉണ്ടെന്നും കോടതി ഉത്തരവില് പറയുന്നു.
