10 December, 2025 12:08:24 PM
"സുരേഷ് ഗോപിക്ക് ലോക്സഭാ തെരഞ്ഞെടുപ്പിൽ വോട്ട് തൃശൂരിൽ; തദ്ദേശ തെരഞ്ഞെടുപ്പിൽ തിരുവനന്തപുരത്ത്"; തിരഞ്ഞെടുപ്പ് കമ്മീഷന് മറുപടി പറയണം- വി.എസ്. സുനിൽ കുമാർ
തൃശൂര്: കേന്ദ്രമന്ത്രി സുരേഷ്ഗോപി വോട്ട് ചെയ്തത് ചട്ടവിരുദ്ധമായെന്ന് ആരോപിച്ച് സിപിഐ നേതാവ് വിഎസ് സുനില്കുമാര്. കഴിഞ്ഞ ലോക്സ്ഭ തിരഞ്ഞെടുപ്പില് തൃശൂരില് വോട്ട് ചെയ്ത സുരേഷ് ഗോപി തദ്ദേശ തിരഞ്ഞെടുപ്പില് വോട്ട് ചെയ്തത് തിരുവനന്തപുരത്താണ്. സ്ഥിരതാമസം എന്ന് പറഞ്ഞാണ് നേരത്തെ തൃശൂരില് വോട്ട് ചേര്ത്തത്. ഇതിന് തിരഞ്ഞെടുപ്പ് കമ്മീഷന് മറുപടി പറയണം എന്ന് വി എസ് സുനില്കുമാര് ഫേസ്ബുക്കിലൂടെ ആവശ്യപ്പെട്ടു.
മറുപടിയുണ്ടോ എന്ന തലക്കെട്ടിലാണ് കുറിപ്പ്. 2024ലെ ലോക്സഭ തിരഞ്ഞെടുപ്പില് കേന്ദ്രമന്ത്രി സുരേഷ് ഗോപിയും കുടുംബവും തൃശൂര് കോര്പറേഷനിലെ നെട്ടിശ്ശേരിയില് സ്ഥിരതാമസക്കാരാണെന്ന് പറഞ്ഞാണ് വോട്ട് ചേര്ത്തതും വോട്ട് ചെയ്തതും. ഇപ്പോള് നടന്ന തദ്ദേശസ്ഥാപനങ്ങളുടെ തിരഞ്ഞെടുപ്പില് അദ്ദേഹവും കുടുംബവും വോട്ട് ചെയ്തത് തിരുവനന്തപുരം കോര്പറേഷനിലെ ശാസ്തമംഗലം ഡിവിഷനിലും. ഇത് എങ്ങനെയാണ് സംഭവിക്കുന്നത്. ഇതിനി ഇലക്ഷന് കമ്മീഷനും കേന്ദ്രമന്ത്രിയും മറുപടി നല്കണം – സുനില്കുമാര് സോഷ്യല് മീഡിയയില് കുറിച്ചു.
