13 April, 2020 03:04:58 PM
ഇറ്റലിയില്‍നിന്നുള്ള 45 പേർ ദില്ലിയിൽ നിന്നും ഇന്ന് കേരളത്തിലെത്തി
പാലക്കാട്: കേരളത്തിലേക്ക് ഇറ്റലിയിൽ നിന്നുള്ള 45 യാത്രക്കാരുമായി ദില്ലിയില്‍നിന്ന് രണ്ടു ബസുകളെത്തി. ഇറ്റലിയില്‍നിന്നു ദില്ലിയിലെത്തി അവിടെ 20 ദിവസത്തെ ക്വാറന്‍റൈനില്‍ കഴിഞ്ഞവരാണ് ഇവര്‍. കേരളത്തിലെ വിവിധ ജില്ലകളില്‍ നിന്നുള്ള 45 പേരാണ് ബസിലുള്ളത്. ഇന്നുരാവിലെയാണ് സംഘം കേരളത്തിലേക്ക് പ്രവേശിച്ചത്. ദില്ലിയില്‍നിന്ന് ഇവരുടെ സ്രവം പരിശോധിച്ച് കോവിഡ് 19 ബാധയില്ലെന്ന് സ്ഥിരീകരിച്ചിട്ടുണ്ട്. നെഗറ്റീവ് ആയിട്ടുള്ളവര്‍ മാത്രമാണ് ബസിലുള്ളതെന്ന് അധികൃതര്‍ പറയുന്നു.
ബസിലുള്ളവർ അവരവരുടെ വീടുകളിൽ നിരീക്ഷണത്തിൽ കഴിയണമെന്ന് ആരോഗ്യവകുപ്പ് നിർദ്ദേശിച്ചിട്ടുണ്ട്. ബസിൽ നിന്നിറങ്ങുന്നവരെ ആംബുലൻസിൽ ആരോഗ്യവകുപ്പ് തന്നെ വീട്ടിലെത്തിക്കും. ദില്ലിയില്‍നിന്ന് കേരളം വരെയുള്ള ബസ് യാത്രക്കിടെ കോവിഡ് സ്ഥിരീകരിച്ച പലയിടങ്ങളിലും ഇവര്‍ ഭക്ഷണം കഴിക്കാനും മറ്റുമായി ഇറങ്ങിയിട്ടുണ്ടാകാമെന്ന നിഗമനത്തിലാണ് വീടുകളില്‍ ക്വാറന്‍റൈനില്‍ കഴിയാന്‍ നിര്‍ദ്ദേശിച്ചിരിക്കുന്നത്. സംസ്ഥാനത്തെ എല്ലാ ആരോഗ്യവകുപ്പ് അധികൃതര്‍ക്കും ഇതു സംബന്ധിച്ച് അറിയിപ്പ് നല്‍കിയിട്ടുണ്ട്.
