23 November, 2021 02:24:55 PM
പാളത്തിൽ സാഹസിക വീഡിയോ ഷൂട്ട്: ട്രയിൻ ഇടിച്ചു യുവാവിന് ദാരുണാന്ത്യം
ഭോപ്പാൽ: സമൂഹ മാധ്യമങ്ങളിൽ വൈറലാകാൻ വേണ്ടി ട്രെയിന്‍ കടന്നു പോകുമ്പോള്‍ പാളത്തോട് ചേര്‍ന്ന് വീഡിയോക്ക് പോസ് ചെയ്ത യുവാവിന് ദാരുണാന്ത്യം. മധ്യപ്രദേശിലെ ഹോഷന്‍ ഗബാദ് ജില്ലയിലാണ് സംഭവം. യുവാവിനെ കണ്ട ട്രെയിനിന്‍റെ ലോക്കോ പൈലറ്റ് പലതവണ ഹോൺ മുഴക്കിയിട്ടും യുവാവ് ഇത് ശ്രദ്ധിച്ചില്ല.
ഇതോടെ പാളത്തോട് ചേർന്ന് നിന്നിരുന്ന യുവാവിനെ ട്രെയിന്‍ ഇടിച്ചുതെറിപ്പിച്ചു. സുഹൃത്തു പകർത്തിയ വിഡിയോയിലും ഈ ദൃശ്യങ്ങളുണ്ട്. ചരക്കു തീവണ്ടിക്ക് മുന്നിൽ നിന്നായിരുന്നു ഈ അപകടം. യുവാവ് തൽക്ഷണം മരിച്ചതായാണ് റിപ്പോർട്ട്. സമൂഹമാധ്യമങ്ങളിൽ വീഡിയോ വൈറലാകുന്നതിന് വേണ്ടിയായിരുന്നു യുവാവിന്‍റെ ശ്രമമെന്ന് സുഹൃത്തുക്കൾ പറഞ്ഞു.
