29 August, 2019 02:10:41 PM
ശബരിമല: നിലപാടിൽ മാറ്റമില്ല, കോടതിവിധി നടപ്പാക്കുക തന്നെ ചെയ്യുമെന്ന് മുഖ്യമന്ത്രി പിണറായി വിജയന്‍
തിരുവനന്തപുരം: ശബരിമല വിഷയത്തിലെ സർക്കാർ നിലപാടിൽ മാറ്റമില്ലെന്ന് മുഖ്യമന്ത്രി പിണറായി വിജയൻ. കോടതി വിധി നടപ്പാക്കുക തന്നെ ചെയ്യുമെന്നും കോടതി മറിച്ചു വിധിച്ചാൽ അത് നടപ്പാക്കുമന്നും അദ്ദേഹം പറഞ്ഞു. തെരഞ്ഞെടുപ്പ് കാലത്ത് ശബരിമല വിഷയം ഉയർത്തി സർക്കാരിനെതിരെ വ്യാപകമായി നടത്തിയ പ്രചരണങ്ങളെ പ്രതിരോധിക്കാനായില്ലെന്നു മാത്രമാണ് ഇടതുപക്ഷത്തിന്‍റെയും സർക്കാരിന്‍റെയും വിലയിരുത്തലെന്നും അദ്ദേഹം വ്യക്തമാക്കി. കേന്ദ്രത്തിൽ അധികാരത്തിലെത്തിയാൽ ശബരിമല വിഷയത്തിലെ കോടതി വിധിക്കെതിരെ നിയമനിർമാണം നടത്തുമെന്ന് പറഞ്ഞവർ എവിടെയെന്നും മുഖ്യമന്ത്രി ചോദിച്ചു.
ശംഖുമുഖത്ത് ആത്മഹത്യ ചെയ്യാൻ കടലിൽ ചാടിയ പെൺകുട്ടിയെ രക്ഷിക്കുന്നതിനിടെ മരണപ്പെട്ട ലൈഫ് ഗാർഡ് ജോൺസൺ ഗബ്രിയേലിന്‍റെ കുടുംബത്തിന് സര്‍ക്കാര്‍ സഹായം നല്‍കും. ജോൺസന്‍റെ ഭാര്യക്ക് സര്‍ക്കാര്‍ ജോലി നല്‍കാനും കുടുംബത്തിന് 10 ലക്ഷം രൂപ ധനസഹായം നല്‍കാനും മന്ത്രിസഭായോഗം തീരുമാനിച്ചതായി മുഖ്യമന്ത്രി അറിയിച്ചു.
