Obituary

കോട്ടയം: തിരുവാതുക്കല്‍ പൂവേലില്‍ പരേതനായ ചന്ദ്രശേഖരപണിക്കരുടെ ഭാര്യ നാഗ്പൂര്‍ നീരി ലേഔട്ടില്‍ രാധാ പണിക്കര്‍ (79) അന്തരിച്ചു. കാരാപ്പുഴ മാറാണില്‍ കുടുംബാംഗമാണ്. മക്കള്‍: ബീന (മുംബൈ), രമേശ് (നാഗ്പൂര്‍), മരുമക്കള്‍: അജിത് (മുംബൈ), രാജശ്രീ (നാഗ്പൂര്‍). സംസ്കാരം ചൊവ്വാഴ്ച പകല്‍ 12ന് നാഗ്പൂരില്‍ നടക്കും.

തൊടുപുഴ: മുതിര്‍ന്ന കോണ്‍ഗ്രസ് നേതാവും മുന്‍ എംഎല്‍എയും ജോസ് കുറ്റിയാനി അന്തരിച്ചു. വാര്‍ധക്യ സഹജമായ അസുഖത്തെ തുടര്‍ന്ന് കോലഞ്ചേരിയിലെ സ്വകാര്യ ആശുപത്രിയില്‍ ചികിത്സയിലായിരുന്നു. 87 വയസ്സായിരുന്നു. ഇടുക്കി ജില്ല രൂപീകരിച്ചതിനു ശേഷമുള്ള ആദ്യ ഡിസിസി പ്രസിഡന്റായിരുന്നു. ഇടുക്കിയെ പ്രതിനിധീകരിച്ച് 1980ലും 1982ലുമാണ് അദ്ദേഹം നിയമസഭയില്‍ എത്തിയത്. ഹൈക്കോടതി അഭിഭാഷകനായ അദ്ദേഹം എഐസിസി, കെപിസിസി നിര്‍വാഹക സമിതി അംഗമായും പ്രവര്‍ത്തിച്ചിട്ടുണ്ട്. നാളെയായിരിക്കും സംസ്‌കാരം നടക്കുകയെന്നാണ് വിവരം. ഇന്ന് രാവിലെ മുതിര്‍ന്ന കോണ്‍ഗ്രസ് നേതാവും ചിറ്റൂര്‍ മുന്‍ എംഎല്‍എയുമായ കെ അച്യുതനും വാര്‍ധക്യസഹജമായ അസുഖത്തെ തുടര്‍ന്ന് മരിച്ചിരുന്നു.

ആലപ്പുഴ: പ്രശസ്ത ഛായാഗ്രാഹകന്‍ ടിഎന്‍ കൃഷ്ണന്‍കുട്ടി അന്തരിച്ചു. 96 വയസ്സായിരുന്നു. വാര്‍ധക്യ സഹജമായ അസുഖത്തെ തുടര്‍ന്നായിരുന്നു അന്ത്യം. ഭാര്യ ലളിതമ്മ, മക്കള്‍ ഹരികൃഷ്ണന്‍, ജയകൃഷ്ണന്‍, ജ്യോതികൃഷ്ണ. സംസ്‌കാരം ഉച്ചകഴിഞ്ഞ് രണ്ടുമണിക്ക് വീട്ടുവളപ്പില്‍. ഹരിഹരന്‍ ആദ്യമായി സംവിധാനം ചെയ്ത ലേഡീസ് ഹോസ്റ്റല്‍ ഉള്‍പ്പടെ ഏഴുപതിലേറെ സിനിമകള്‍ക്കായി ക്യാമറ ചലിപ്പിച്ചിരുന്നു. 1960ല്‍ ഇറങ്ങിയ ഉമ്മ എന്ന ചിത്രത്തില്‍ സ്വതന്ത്ര സംവിധായകനായി.

കുഞ്ചാക്കോയുടെ ഉദയാ സ്റ്റുഡിയോ നിര്‍മിച്ച സീത, നീലി സാലി, ഉണ്ണിയാര്‍ച്ച, കൃഷ്ണ കുചേല, പാലാട്ടു കോമന്‍, ഭാര്യ, റബേക്ക, കടലമ്മ, പഴശ്ശിരാജ, ശകുന്തള, ജയില്‍, അനാര്‍ക്കലി, തിലോത്തമ തുടങ്ങി ഉദയായുടെ മിക്ക ചിത്രങ്ങള്‍ക്കും കൃഷ്ണന്‍കുട്ടിയായിരുന്നു ഛായാഗ്രാഹകന്‍. തിക്കുറുശ്ശി സുകുമാരന്‍ നായര്‍, എംഎം നേശന്‍, പിജെ ആന്റണി, ശശികുമാര്‍, എബി രാജ്, കെ നാരായണന്‍ തുടങ്ങി നിരവധി സംവിധായകരുടെ ചിത്രങ്ങളുടെ ഛായാഗ്രാഹകനായി.

മലയാളത്തിലെ ആദ്യത്തെ റോഡ് മൂവി എന്ന് വിശേഷിപ്പിക്കാവുന്ന ചിത്രമായ കണ്ണൂര്‍ ഡീലക്‌സിന്റെ ഛായാഗ്രണം അദ്ദേഹമായിരുന്നു. പത്തോളം എ ബി രാജ് ചിത്രങ്ങളില്‍ അദ്ദേഹം ഛായാഗ്രഹണം നിര്‍വഹിച്ചിട്ടുണ്ട്. ഒടുവില്‍ ഛായാഗ്രഹണം നിര്‍വഹിച്ച വിഷുപ്പക്ഷി പുറത്തിറങ്ങിയില്ല. 1973 മുതല്‍ 1978 വരെയുള്ള കാലഘട്ടത്തില്‍ മലയാള സിനിമയിലെ ഏറ്റവും തിരക്കുള്ള ക്യാമറാമാനായിരുന്നു കൃഷ്ണന്‍കുട്ടി. അമ്പതോളം നസീര്‍ ചിത്രങ്ങള്‍ക്ക് അദ്ദേഹം ഛായാഗ്രഹണം നിര്‍വഹിച്ചു. മമ്മൂട്ടി ആദ്യമായി അഭിനയിച്ച കാലചക്രം എന്ന ചിത്രത്തിന്റെ ഛായാഗ്രാഹകനും കൃഷ്ണന്‍കുട്ടി തന്നെ.

ഏറ്റുമാനൂർ: ശക്തിനഗർ ബസ് സ്റ്റോപ്പിന് സമീപമുളള ദേവാസ് ട്രേഡേഴ്സ് ഉടമ വി കെ ബി റോഡിൽ താമസിക്കുന്ന വെങ്കിടേശ്വര ഭട്ട് (ശ്രീകുമാർ - 57) അന്തരിച്ചു. ഭാര്യ: മഞ്ചു, മക്കൾ: ദേവപ്രസാദ്, ദേവപ്രിയ. ശവസംസ്ക്കാരം ശനിയാഴ്ച പുലർച്ചെ 12.30 ന് താഴത്തങ്ങാടി ഗൗഡ സാരസ്വത ബ്രാഹ്മണ ശ്മശാനത്തിൽ.

കൊച്ചി: മാതാ അമൃതാനന്ദമയീ മഠത്തിലെ മുതിർന്ന സന്യാസിവര്യനും പ്രമുഖ ആയുർവേദ പണ്ഡിതനും ഡോക്ടറുമായ സ്വാമി ശങ്കരാമൃതാനന്ദപുരി സമാധിയായി. ദേഹാസ്വാസ്ഥ്യത്തെ തുടർന്ന് കുറച്ച് നാളായി ചികിത്സയിലായിരുന്നു. 1991-ൽ മാതാ അമൃതാനന്ദമയീ മഠത്തിൽ ചേർന്ന അദ്ദേഹം, ആയുർവേദ വൈദ്യശാസ്ത്രത്തിൽ ബിരുദാനന്തര ബിരുദധാരിയാണ്.

അമൃതപുരി അമൃത സ്‌കൂൾ ഓഫ് ആയൂർവേദയുടെ ഡീനും അമൃത ആയൂർവേദ ആശുപത്രി മെഡിക്കൽ ഡയറക്ടറുമായിരുന്നു. സംസ്കൃതത്തിലും വേദാന്തത്തിലും ആയുർവേദത്തിലും ആഴത്തിലുള്ള അറിവുള്ള അദ്ദേഹം ലളിതാ സഹസ്രനാമം, സൗന്ദര്യലഹരി, അഭിരാമി അന്താദി, രാമായണം തുടങ്ങിയ ഗ്രന്ഥങ്ങളെ അധികരിച്ച് നടത്തിയ പ്രഭാഷണങ്ങളും വ്യാഖ്യാനങ്ങളും ഏറെ ശ്രദ്ധേയമാണ്.

ആധ്യാത്മിക ദർശനവും ആയുർവേദത്തിലെ ആഴത്തിലുള്ള അറിവും സമന്വയിപ്പിച്ചു കൊണ്ട് ആയുർവേദ ശാഖയുടെ വളർച്ചയെ നയിക്കുന്നതിനൊപ്പം തന്റെ അധ്യാപനത്തിലൂടെയും സേവനത്തിലൂടെയും ആയുർവേദ പാരമ്പര്യത്തിന്റെ ജ്ഞാനം പകർന്നു നൽകുകയും ചെയ്ത സന്യാസിയായിരുന്നു സ്വാമി ശങ്കരാമൃതാനന്ദപുരി.

തിരുവനന്തപുരം: മുൻ അഡീഷണൽ ചീഫ് സെക്രട്ടറിയും മുതിർന്ന ഐ.എ.എസ്. ഉദ്യോഗസ്ഥനുമായ പി.എച്ച്. കുര്യൻ (67) അന്തരിച്ചു. 1959 ജനുവരി 20-ന് ജനിച്ച അദ്ദേഹം കോട്ടയം പാമ്പാടി സ്വദേശിയാണ്. കേരള സർവകലാശാലയിൽ നിന്ന് കെമിസ്ട്രിയിൽ ബിരുദാനന്തര ബിരുദം നേടിയ ശേഷം ബെംഗളൂരു ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസിൽ (IISc) ഗവേഷണം നടത്തിവരുമ്പോഴാണ് അദ്ദേഹത്തിന് ഐ.എ.എസ്. ലഭിക്കുന്നത്. തുടക്കത്തിൽ ഒഡീഷ കേഡറിലായിരുന്ന അദ്ദേഹം, 1993-ലാണ് കേരള കേഡറിലേക്ക് മാറിയെത്തിയത്.

കേരളത്തിൽ കോട്ടയം, ഇടുക്കി ജില്ലകളിൽ കളക്ടറായി സേവനം അനുഷ്ഠിച്ചിട്ടുണ്ട്. സെക്രട്ടറി പദവിയിൽ എത്തിയ ശേഷം റവന്യൂ, വ്യവസായം, ഐ.ടി., മരാമത്ത്, തുറമുഖം തുടങ്ങി നിരവധി സുപ്രധാന വകുപ്പുകളുടെ ചുമതലകൾ അദ്ദേഹം വഹിച്ചു. കൂടാതെ, കേന്ദ്ര വ്യവസായ വകുപ്പിൽ കൺട്രോളർ ജനറൽ ഓഫ് പേറ്റന്റ്സ് ആയും അദ്ദേഹം സേവനം അനുഷ്ഠിച്ചിട്ടുണ്ട്.

ചെന്നൈ: തമിഴ്, തെലുങ്ക്, കന്നഡ, മലയാളം സിനിമാ ലോകത്ത് ഏഴ് പതിറ്റാണ്ടിലേറെ സജീവമായിരുന്ന പ്രശസ്ത മുതിർന്ന നടി 'സൗകർ' ജാനകി(94) അന്തരിച്ചു. ഇന്ന് ഉച്ചക്ക് 1.59ഓടെയായിരുന്നു അന്ത്യം. വാര്‍ധക്യസഹജമായ അസുഖങ്ങളെ തുടര്‍ന്ന് ചെന്നൈയിലെ ആശുപത്രിയില്‍ ചികിത്സയിലായിരുന്നു.

400-ലധികം ചിത്രങ്ങളിൽ വേഷമിട്ടിട്ടുള്ള അവർ ഇന്ത്യൻ സിനിമയിലെ തന്നെ എക്കാലത്തെയും മികച്ച അഭിനേത്രിമാരിൽ ഒരാളാണ്. 'സ്കൂൾമാസ്റ്റർ', 'സൂര്യമാനസം', 'പപ്പു' തുടങ്ങിയവയാണ് സൗകാർ ജാനകി അഭിനയിച്ച പ്രധാന മലയാള ചിത്രങ്ങൾ. സൂര്യമാനസത്തിലെ മമ്മൂട്ടിയുടെ അമ്മയായുള്ള പ്രകടനം മലയാളികൾക്ക് ഒരിക്കലും മറക്കാനാകാത്തതാണ്.

1950-ൽ എൽ.വി. പ്രസാദ് സംവിധാനം ചെയ്ത 'ഷാവുകാരു' എന്ന തെലുങ്ക് ചിത്രത്തിലൂടെയാണ് ജാനകി അഭിനയരംഗത്തേക്ക് അരങ്ങേറുന്നത്. ഈ ആദ്യ ചിത്രത്തിന്റെ വൻ വിജയത്തെ തുടർന്നാണ് അവർ 'സൗകർ' ജാനകി എന്ന പേരിൽ അറിയപ്പെടാൻ തുടങ്ങിയത്. പുതിയ പറവൈ, എതിർ നീച്ചൽ, ഇരു കോടുകൾ, ഉയർന്ന മനിതൻ, തില്ലു മുള്ളു തുടങ്ങിയ തമിഴ് ചിത്രങ്ങളിലെയും റോജുലു മാരായി, ഡോക്ടർ ചക്രവർത്തി, ബഡി പന്തലു തുടങ്ങിയ തെലുങ്ക് ചിത്രങ്ങളിലെയും പ്രകടനങ്ങൾ ഏറെ ശ്രദ്ധിക്കപ്പെട്ടു.

2020-ൽ പുറത്തിറങ്ങിയ 'ബിസ്‌കോത്ത്' എന്ന തമിഴ് ചിത്രത്തിലും 2023-ൽ പുറത്തിറങ്ങിയ 'അന്നി മഞ്ചി ശകുനമുലേ' എന്ന തെലുങ്ക് ചിത്രത്തിലുമാണ് അവർ അവസാനമായി വേഷമിട്ടത്. ചലച്ചിത്ര മേഖലയ്ക്ക് നൽകിയ സമഗ്ര സംഭാവനകൾ പരിഗണിച്ച് 2022-ൽ രാജ്യം പത്മശ്രീ നൽകി ആദരിച്ചു.

പേരൂർ: ഏറ്റുമാനൂർ പേരൂർ വേറക്കൽ വീട്ടിൽ പി സി രാജന്റെ ഭാര്യ സിന്ധു രാജൻ (53) അന്തരിച്ചു. സംസ്കാരം ഇന്ന് 3ന് വീട്ടുവളപ്പിൽ. മകള്‍ അമൃത രാജന്‍.

പേരൂര്‍ : ഏറ്റുമാനൂര്‍ പേരൂര്‍ തേക്കനിയില്‍ സുകുമാരന്‍ നായരുടെ ഭാര്യ സരസമ്മ സുകുമാരന്‍ (81) അന്തരിച്ചു. മക്കള്‍: പ്രഭാകരന്‍, രാധാകൃഷ്ണന്‍, അനിരുദ്ധന്‍, കുമാരി, മരുമക്കള്‍: ശ്രീകുമാരി (കുമാരനല്ലൂര്‍), ഗീതാകുമാരി (കടുത്തുരുത്തി), മിനി (മറ്റക്കര), ഹരിദാസ് (അതിരമ്പുഴ). സംസ്കാരം ഇന്ന് രാത്രി 8 മണിക്ക് പേരൂര്‍ പുളിമൂട് കവലയ്ക്ക് സമീപമുള്ള മകൻ രാധാകൃഷ്ണന്റെ വീട്ടുവളപ്പിൽ.

കോതനെല്ലൂർ : കോതനെല്ലൂർ മുകളേൽ ദാമോദരൻ അന്തരിച്ചു. സംസ്കാരം ഇന്ന് വൈകിട്ട് നാല് മണിക്ക് വീട്ടുവളപ്പിൽ. ഭാര്യ: പരേതയായ കല്യാണി. മക്കൾ : മണിയമ്മ, രാജമ്മ, മോഹിനി, സോമൻ, വിമല, ലളിത, സുജ. മരുമക്കൾ : മണിയൻ, ഗോപാലൻ, പ്രകാശൻ, കൃഷ്ണൻകുട്ടി, മോഹനൻ

മര്യാത്തുരുത്ത് : മധുനിവാസിൽ (വാലയിൽ) പരേതനായ വിജയൻ നായരുടെ ഭാര്യ സുഭദ്ര കുട്ടിയമ്മ (86) അന്തരിച്ചു. മക്കൾ : മൻമഥൻ (റിട്ട. ബി.എസ് എൻ എൽ), എം. വി. മധു (ഗുഡ് ഡേ പെസ്റ്റ് കൺട്രോൾ, കോട്ടയം), അമ്പിളി. മരുമക്കൾ : മിനി (റിട്ട ബി എസ് എൻ എൽ), ലേഖ (റിട്ട. ടീച്ചർ), ഹരിദാസ് (റിട്ട. സബ് ഇൻസ്പെക്ടർ ഓഫ് പോലീസ്). സംസ്കാരം ബുധനാഴ്ച 11 മണിക്ക് വിട്ടു വളപ്പിൽ.

ഏറ്റുമാനൂര്‍: ചൂരക്കുളങ്ങര ദേവീവിലാസം എൻ.എസ്.എസ് കരയോഗം നമ്പര്‍ 4388 അംഗവും ദീർഘകാലം പ്രസിഡൻ്റുമായിരുന്ന പത്മനാഭൻ നായർ (90) പാഞ്ചജന്യം അന്തരിച്ചു. ഭൗതിക ശരീരം നാളെ 21/07/26 രാവിലെ 8:00 മണിക്ക് ശേഷം സ്വവസതിയിൽ കൊണ്ടുവരും. സംസ്ക്കാരം നാളെ ഉച്ചകഴിഞ്ഞു 3:00 മണിക്ക് വീട്ടുവളപ്പിൽ.

മണ്ണയ്ക്കനാട് : കാഞ്ഞിരക്കാട്ട് മന (കമലാലയം) പരേതനായ കെ.എസ്.ശ്രീധരൻ നമ്പൂതിരിയുടെ ഭാര്യ ടി.എൻ ശ്രീദേവി അന്തർജ്ജനം (76) അന്തരിച്ചു. തൊടുപുഴ മൂലയിൽ മന കുടുംബാംഗമാണ് മക്കൾ: അപർണ്ണ, ഉണ്ണി നമ്പൂതിരി ( മലയാള മനോരമ, കുറവിലങ്ങാട് ) , ഹേന. മരുമക്കൾ: വിജയകുമാരൻ പോറ്റി, ഹരിത രാമചന്ദ്രൻ. സംസ്ക്കാരം ഇന്ന് വൈകിട്ട്.

കാണക്കാരി: മംഗളം ദിനപത്രം ലേഖകനായിരുന്ന കാണക്കാരി വടക്കേമറ്റപ്പള്ളിൽ ജോസ് മാത്യു (ജോസ് കാണക്കാരി – 74) അന്തരിച്ചു. സംസ്‌കാരം നാളെ ജൂലൈ 18 ശനിയാഴ്ച ഉച്ചകഴിഞ്ഞ് രണ്ടിന് ഭവനത്തിലെ ശുശ്രൂഷകൾക്ക് ശേഷം യഹോവസാക്ഷികളുടെ ചെറുവാണ്ടൂരിലുള്ള ശ്മശാനത്തിൽ. ഭാര്യ: എൽസി ജോസഫ്. മക്കൾ: എബിൻ ജോസ്, എമിലിൻ ജോസ്. മരുമകൻ അനന്തു.

കോട്ടയം: മംഗളം ദിനപത്രം അസിസ്റ്റൻ്റ് എഡിറ്റർ മാത്യൂസ് എം ജോർജ് അന്തരിച്ചു. പാത്താമുട്ടം മാളികക്കരോട്ട് എം എം ജോർജിന്റെ( റിട്ട. ഡെപ്യൂട്ടി ലേബർ കമ്മീഷണർ, മുൻ ജനറൽ മാനേജർ മംഗളം) മകൻ , മംഗളം ദിനപത്രം അസിസ്റ്റൻ്റ് എഡിറ്റർ മാത്യൂസ് എം ജോർജ് (52) അന്തരിച്ചു . മൃതദേഹം വെള്ളിയാഴ്ച രാവിലെ 9 ന് വീട്ടിൽ എത്തിക്കും. സംസ്കാരം ഉച്ചകഴിഞ്ഞ് 3 ന് വീട്ടിലെ ശുശൂഷകൾക്ക് ശേഷം നാലിന് പാത്താമുട്ടം മാർ സ്ലീബ പളളി സെമിത്തേരിയിൽ മകൻ:ഇഷാൻ ജോർജ് (ബിടെക് വിദ്യാർത്ഥി, സെൻ്റ് ഗിറ്റ്സ് കോളേജ്, പാത്താമുട്ടം ) മാതാവ് ജോളി ജോർജ് കൊല്ലാട് ചെമ്പകശേരിൽ കുടുംബാംഗം.

കോട്ടയം: പത്മശ്രീ പുരസ്‌കാര ജേതാവും നോക്കുവിദ്യ പാവകളി കലാകാരിയുമായ മൂഴിക്കല്‍ പങ്കജാക്ഷി അന്തരിച്ചു. കൂത്താട്ടുകുളത്തെ സ്വകാര്യ ആശുപത്രിയില്‍ ഇന്ന് രാവിലെയായിരുന്നു അന്ത്യം. വാര്‍ധക്യസഹജമായ അസുഖത്തെ തുടര്‍ന്ന് ചികിത്സയിലായിരുന്നു. 2020 ലാണ് രാജ്യം പത്മശ്രീ നല്‍കി ആദരിച്ചത്. പരമ്പരാഗത പാവകളി കലാരൂപത്തിന് നല്‍കിയ സംഭാവനകള്‍ മാനിച്ചായിരുന്നു പുരസ്‌കാരം.

കോട്ടയം ജില്ലയിലെ മോനിപ്പള്ളി സ്വദേശിനിയാണ് മൂഴിക്കല്‍ പങ്കജാക്ഷി. കേരള ടൂറിസത്തിന്റെ ഔദ്യാഗിക വെബ്‌സൈറ്റില്‍ പങ്കജാക്ഷി അമ്മയെ പറ്റി പരാമര്‍ശമുണ്ട്. ഫോക്ക് ലോര്‍ അക്കാദമിയുടെ അവാര്‍ഡും ഫെല്ലോഷിപ്പും ലഭിച്ചിട്ടുണ്ട്. ഫ്രാന്‍സ് ഉള്‍പ്പെടെയുള്ള വിദേശരാജ്യങ്ങളില്‍ നോക്കുവിദ്യ അവതരിപ്പിച്ചിട്ടുണ്ട് പങ്കജാക്ഷി. പതിനൊന്നാം വയസ്സുമുതല്‍ പങ്കജാക്ഷി പാവകളി അഭ്യസിച്ചിരുന്നു. അച്ഛനും അമ്മയും പാവകളി കലാകാരന്മാരായിരുന്നു

കോഴിക്കോട്: പ്രമുഖ പരിസ്ഥിതി പ്രവര്‍ത്തകന്‍ സലാം നടുക്കണ്ടി അന്തരിച്ചു. എഴുത്തുകാരനും സാമൂഹിക പ്രവർത്തകനുമായ എന്‍ എം കാരശ്ശേരിയുടെ സഹോദരനാണ്. കോഴിക്കോടുള്ള സ്വകാര്യ ആശുപത്രിയില്‍ വെച്ചായിരുന്നു അന്ത്യം. വിദ്യാഭ്യാസ-സാമൂഹിക-പരിസ്ഥിതി മേഖലകളില്‍ സജീവ സാന്നിധ്യമായിരുന്നു അദ്ദേഹം. മികച്ച അധ്യാപകനുള്ള 'ഗുരുശ്രേഷ്ഠ അധ്യാപക അവാര്‍ഡ്' ജേതാവാണ് സലാം നടുക്കണ്ടി.

ബെംഗളൂരു: പ്രശസ്ത പിന്നണി ഗായിക എസ്.ജാനകി അന്തരിച്ചു. മൈസൂരുവിലാണ് അന്ത്യം. 88 വയസ്സായിരുന്നു. ഇരുപതിലധികം ഭാഷകളിലായി ആയിരത്തിലേറേ പാട്ടുകള്‍ പാടിയിട്ടുണ്ട്. എല്ലാ ദക്ഷിണേന്ത്യൻ ഭാഷാ ചിത്രങ്ങളിലും പാടിയിട്ടുള്ള ജാനകി ഹിന്ദി, സിംഹള, ബംഗാളി, ഒറിയ, ഇംഗ്ലീഷ്‌, സംസ്‌കൃതം, കൊങ്ങിണി, തുളു, സൗരാഷ്‌ട്ര ബഡുഗ, ജർമ്മൻ ഭാഷകളിലും സ്വരസാന്നിധ്യമറിയിച്ചിട്ടുണ്ട്‌. കുട്ടികളുടെ സ്വരത്തിൽ പാടുന്നതിനുള്ള സവിശേഷമായ കഴിവും ഈ ഗായികക്കുണ്ട്‌. മലയാളത്തിൽ ഇത്തരം ചില ഗാനങ്ങളും ആലപിച്ചിട്ടുണ്ട്‌.

മികച്ച ഗായികയ്‌ക്കുള്ള ദേശീയ അവാർഡ്‌ നാലു തവണയാണ്‌ എസ്‌.ജാനകിക്ക്‌ ലഭിച്ചത്‌. 976-ൽ `പതിനാറു വയതിനിലേഎന്ന തമിഴ്‌ ചിത്രത്തിലെ സിന്ദൂര പൂവേ... എന്നു തുടങ്ങുന്ന ഗാനത്തിനാണ്‌ ആദ്യമായി ദേശീയപുരസ്‌കാരം ലഭിച്ചത്‌. 1980-ൽ ഓപ്പോൾ എന്ന മലയാളചിത്രത്തിലെ ഏറ്റുമാനൂർ അമ്പലത്തിൽ... എന്ന ഗാനത്തിനും 1984-ൽ തെലുഗു ചിത്രമായ `സിതാര'യിൽ വെന്നല്ലോ ഗോദാരി ആനന്ദം... എന്നു തുടങ്ങുന്ന ഗാനത്തിനും 1992-ൽ തമിഴ്‌ ചിത്രമായ `തേവർമകനിൽ ഇഞ്ചി ഇടുപ്പഴകാ... എന്നു തുടങ്ങുന്ന ഗാനത്തിനുമാണ്‌ ദേശീയ അവാർഡുകൾ ലഭിച്ചത്‌.

മികച്ച പിന്നണിഗായികയ്‌ക്കുള്ള കേരള സംസ്ഥാന അവാർഡ്‌ 14 തവണയും തമിഴ്‌നാട്‌ സർക്കാരിൻറെ അവാർഡ്‌ ഏഴു തവണയും ആന്ധ്രപ്രദേശ്‌ സർക്കാരിൻറെ അവാർഡ്‌ പത്തു തവണയും ഈ ഗായിക സ്വന്തമാക്കി. തമിഴ്‌നാട്‌ സർക്കാരിൻറെ കലൈമാമണി പുരസ്‌ക്കാരം 1986-ലും സുർ സിംഗർ അവാർഡ്‌ 1987-ലും കേരളത്തിൽനിന്നും സിനിമാ ആർക്കൈവർ അവാർഡ്‌ 2002-ലും സ്‌പെഷൽ ജൂറി സ്വരലയ യേശുദാസ്‌ അവാർഡ്‌ 2005-ലും ലഭിച്ചു.

1938-ൽ ഏപ്രിൽ 23-ന്‌ ആന്ധ്രപ്രദേശിലെ ഗുണ്ടൂർ ജില്ലയിൽ ജനിച്ച ജാനകി മൂന്നാം വയസിൽതന്നെ സംഗീതത്തോട്‌ ആഭിമുഖ്യ പ്രകടിപ്പിച്ചുതുടങ്ങി. പത്താം വയസിൽ പൈതി സ്വാമിയുടെ കീഴിൽ ശാസ്‌ത്രീയ സംഗീത പഠനം ആരംഭിച്ചു. ജാനകിയുടെ സംഗീത വാസന വളർത്തുന്നതിൽ അമ്മാവൻ ഡോ. ചന്ദ്രശേഖർ നിർണായക പങ്കു വഹിച്ചു. അദ്ദേഹത്തിൻറെ നിർദ്ദേശപ്രകാരം സംഗീത പഠനത്തിനായി പിൽക്കാലത്ത്‌ മദ്രാസിലെത്തി. ആകാശവാണി ദേശീയ തലത്തിൽ സംഘടിപ്പിച്ച ഗാന മത്സരത്തിൽ രണ്ടാം സ്ഥാനം നേടിയതോടെയാണ്‌ ജാനകി ശ്രദ്ധേയയായത്‌. വൈകാതെ മദ്രാസിലെ എ.വി.എം സ്റ്റുഡിയോയിൽ ജോലി ലഭിച്ചു. 1957ൽ 19ആം വയസിൽ വിധിയിൻ വിളയാട്ട്‌ എന്ന തമിഴ്‌ സിനിമയിൽ ടി. ചലപ്പതി റാവു ഈണം പകർന്ന ഗാനം ആലപിച്ചുകൊണ്ടാണ്‌ ജാനകി ചലച്ചിത്രപിന്നണിഗാനരംഗത്ത്‌ അരങ്ങേറ്റം കുറിച്ചത്‌. തെലുങ്ക്‌ ചിത്രമായ എം.എൽ.എൽ അവസരം ലഭിച്ചതിനുശേഷം ജാനകിക്ക്‌ തിരിഞ്ഞുനോക്കേണ്ടിവന്നില്ല. ഭാഷകളെ നിഷ്‌പ്രഭമാക്കിയ ആ സ്വരമാധുരി ലക്ഷക്കണക്കിനാളുകൾ ഹൃദയത്തിൽ സ്വീകരിച്ചു.

ഏറ്റുമാനൂർ : കട്ടച്ചിറ പറപ്പള്ളിൽ കൃഷ്ണൻ നായരുടെ ഭാര്യ പാറുക്കുട്ടിയമ്മ (ലീല - 76) അന്തരിച്ചു. മക്കൾ: ശ്രീകല, ശ്രീകുമാർ, മരുമക്കൾ: അനിൽകുമാർ (കൂരോപ്പട), രമ്യ (പേരൂർ). സംസ്കാരം വ്യാഴാഴ്ച രാവിലെ 11ന് കട്ടച്ചിറയിലെ വീട്ടുവളപ്പിൽ.

ഏറ്റുമാനൂർ: മലയാളത്തിന്റെ പ്രിയപ്പെട്ട എഴുത്തുകാരനും സാംസ്കാരിക പ്രവർത്തകനുമായ ഏറ്റുമാനൂർ - പുന്നത്തുറ വെസ്റ്റ് - പരയ്ക്കാട്ട് ശ്രീകൈലാസം ഗാർഡൻസിൽ ടി ജി വിജയകുമാർ ( ബാബുജി - 66) അന്തരിച്ചു. തെക്കേക്കുറ്റ് ഗോപിനാഥൻ നായർ പിതാവും കോതനെല്ലൂർ പരയ്ക്കാട്ട് ടി ജി ചെല്ലമ്മ മാതാവുമാണ്. ടി ജി ചികിത്സയിലായിരുന്നു. ടി ജി - യുടെ ഏറ്റവും ശ്രദ്ധേയമായ പുസ്തകമാണ് " മഴ പെയ്തു തോരുമ്പോൾ. ലേഖനങ്ങളുടെ സമാഹാരമാണ് ഈ പുസ്തകം. 2014 - ലെ മികച്ച ഹാസ്യ സാഹിത്യത്തിനുള്ള കേരള സാഹിത്യ അക്കാദമി അവാർഡ് ടി ജി ക്ക് ലഭിച്ചു. പ്രശസ്ത സാംസ്കാരിക നായകൻ ഡോ. സുകുമാർ അഴീക്കോട് അവതാരിക എഴുതിയ അവസാനത്തെ പുസ്തകം കൂടിയാണ് ഇത്.

തത്ത്വമസി സാംസ്കാരിക സമിതി ഡോ.സുകുമാർ അഴീക്കോടിന്റെ ആദർശങ്ങളിലും, ദർശനങ്ങളിലും വിശ്വസിക്കുന്ന എഴുത്തുകാരുടെയും സാംസ്കാരിക പ്രവർത്തകരുടെയും കൂട്ടായ്മയായ - തത്ത്വമസി - എന്ന ഓൺലൈൻ ഗ്രൂപ്പിന്റെയും , സാംസ്കാരിക അക്കാദമിയുടെയും മുഖ്യ ഭാരവാഹിയാണ് ടി ജി. എല്ലാ വർഷവും സുകുമാർ അഴീക്കോട് - തത്ത്വമസി പുരസ്കാരങ്ങൾ' നൽകിവരുന്നുണ്ട്.

പ്രവാസ ജീവിതത്തിന് ശേഷം നാട്ടിൽ തിരിച്ചെത്തിയ ടി ജി ബിസിനസ് രംഗത്ത് സജീവമായി, ജൈവകർഷകൻ കൂടിയാണ് അദ്ദേഹം. ഭാര്യ: സുജാത വിജയ് തിരുവല്ല പെരിങ്ങര കുടുംബാംഗമാണ്. മക്കൾ: അഡ്വ.അഖിൽ വിജയ് - ഹൈക്കോടതി, Dr. ഐശ്വര്യ വിജയ് - ആയുസ്സ് വെൽനെസ് ഹോസ്പിറ്റൽ കൊച്ചി. മരുമക്കൾ: അഡ്വ.ഐശ്വര്യ, ഹരി നാരായണൻ ബിസിനസ്. ഭൗതിക ശരീരം ചൊവ്വ വൈകിട്ട് 4 - മണിക്ക് വസതിയിൽ എത്തിക്കും. സംസ്കാരം ജൂലൈ - 8 ബുധൻ രാവിലെ 10 - 30 ന് വീട്ടുവളപ്പിൽ.

കോട്ടയം: മലയാള മനോരമ മുൻ സീനിയർ ഫോട്ടോഗ്രാഫർ പി ആർ ദേവദാസ് അന്തരിച്ചു. 70 വയസ്സായിരുന്നു. ഭൗതികശരീരം ഇന്ന് കോട്ടയം കാരിത്താസ് ആശുപത്രി മോർച്ചറിയില്‍ സൂക്ഷിക്കും. ബുധനാഴ്ച രാവിലെ 6മണി മുതല്‍ 7മണിവരെ കുടമാളൂരിലുള്ള തറവാട്ടില്‍ പൊതു ദർശനനത്തിനായി വയ്ക്കും. തുടർന്ന് താമസ സ്ഥലമായ തിരുവഞ്ചൂർ ചീനിക്കുഴിയിലുള്ള വീട്ടില്‍ കൊണ്ടുവരും. സംസ്കാരം ഉച്ചകഴിഞ്ഞു മൂന്ന് മണിക്ക് മാങ്ങാനം പൊതു ശ്മശാനത്തില്‍ . ഭാര്യ: ശൈലജ. മക്കൾ: വിഷ്ണുദാസ്, ദേവിക ദാസ്.

സീനിയർ ജേർണലിസ്‌റ്റ്‌സ് ഫോറം സംസ്ഥാന കമ്മിറ്റി അംഗവും ജില്ലാ ട്രഷററും ആയിരുന്നു. സ്വദേശാഭിമാനി അവാർഡും പാമ്പൻ മാധവൻ സ്മാരക അവാർഡും ഉൾപ്പെടെ നിരവധി അംഗീകാരങ്ങൾ നേടിയിട്ടുണ്ട്. 1980ൽ മലയാള മനോരമയിൽ ഡാർക്ക് റൂം അസിസ്റ്റന്റ് ആയിട്ടാണ് ഔദ്യോഗിക ജീവിതം തുടങ്ങിയത്. 2017ൽ സീനിയർ ഫോട്ടോഗ്രാഫറായി വിരമിച്ചു.

തിരുവനന്തപുരം: കവിയും നിരൂപകനുമായ പത്മശ്രീ പി നാരായണക്കുറുപ്പ് അന്തരിച്ചു. 92 വയസ്സായിരുന്നു. വാർധക്യസഹജമായ അസുഖങ്ങളെ തുടർന്ന് തിരുവനന്തപുരം പേരൂർക്കട ഇന്ദിരാനഗറിലെ വസതിയിലായിരുന്നു അന്ത്യം.സംസ്കാരം ജൂൺ 21(ഞായർ) വൈകിട്ട് മൂന്നരയ്ക്ക് തൈക്കാട് ശാന്തികവാടത്തിൽ. ഭാര്യ : വിജയലക്ഷ്മി,മക്കൾ - ഡോ.വൃന്ദ ജയകുമാർ(റിട്ട:പ്രൊഫസർ, ഡി.ബി കോളേജ് ,ശാസ്താംകോട്ട), വിജു നാരായൺ(ഡെപ്യൂട്ടി ഡയറക്ടർ,ലോക്സഭ സെക്രട്ടേറിയറ്റ്),വിവേക് നാരായൺ (മാനേജിങ്ങ് എഡിറ്റർ,നെറ്റ് വർക്ക് 18) 2022 ൽ രാജ്യം പത്മശ്രീ നൽകി ആദരിച്ചു. കേരളസാഹിത്യ അക്കാദമി,ഓടക്കുഴൽ,കേരള പാണിനി,വള്ളത്തോൾ പുരസ്കാരങ്ങൾ ലഭിച്ചിട്ടുണ്ട്.

കൊച്ചി: ശബരിമല സ്വർണ്ണക്കൊള്ള കേസിലെ പ്രതി മുരാരി ബാബു (54) അന്തരിച്ചു. ദേവസ്വം ബോർഡ് മുൻ അഡ്മിനിസ്ട്രേറ്റീവ് ഓഫീസറായിരുന്നു ബി മുരാരി ബാബു. അർബുദരോഗബാധിതനായി ചികിത്സയിലായിരുന്നു. കൊച്ചിയിലെ സ്വകാര്യ ആശുപത്രിയിലായിരുന്നു അന്ത്യം. ചങ്ങനാശേരി പെരുന്ന സ്വദേശിയാണ്.

ദ്വാരപാലക ശിൽപകേസിലും കട്ടിളപാളി കേസിലും ഒന്നിച്ച് അറസ്റ്റിലായ മുരാരി ബാബു 90 ദിവസത്തോളം ജയിൽവാസം അനുഭവിച്ചിരുന്നു. 90 ദിവസം കഴിഞ്ഞിട്ടും എസ്ഐടി കുറ്റപത്രം സമർപ്പിക്കാത്ത സാഹചര്യത്തിൽ പിന്നീട് മുരാരി ബാബുവിന് സ്വഭാവിക ജാമ്യം ലഭിക്കുകയായിരുന്നു.

പൊലീസ് കോൺസ്റ്റബിൾ ജോലി ഉപേക്ഷിച്ചാണ് മുരാരി ബാബു തിരുവിതാംകൂർ ദേവസ്വം ബോർഡിലെ ജീവനക്കാരനായത്. 1997ലാണ് ദേവസ്വം ബോർഡ് ജീവനക്കാരനായി മുരാരി ബാബു ജോലിയിൽ പ്രവേശിക്കുന്നത്. ആദ്യം താൽക്കാലിക ജീവനക്കാരനായി ജോലിയിൽ പ്രവേശിച്ച മുരാരി ബാബുവിന് പിന്നീട് ഏറ്റുമാനൂർ ക്ഷേത്രത്തിലെ ക്ലർക്കായി സ്ഥിര നിയമനം നൽകുകയായിരുന്നു. പിന്നീട് വൈക്കം, ഏറ്റുമാനൂർ, തിരുനക്കര എന്നീ ക്ഷേത്രങ്ങളിലെ ഉത്സവങ്ങൾക്ക് 'സ്പെഷൽ ഓഫിസർ' തസ്തികയിൽ സേവനമനുഷ്ഠിച്ചിരുന്നു.1994ലായിരുന്നു മുരാരി ബാബുവിന് പൊലീസിൽ ജോലി ലഭിച്ചത്. കോൺസ്റ്റബിളായി കണ്ണൂരിലായിരുന്നു ആദ്യ പരിശീലനം. എന്നാൽ മുരാരി ബാബു പരിശീലന കാലയളവ് പൂർത്തിയാക്കിയിരുന്നില്ല.

ശബരിമല സ്വ‍ർണക്കൊള്ള കേസിലെ രണ്ടാം പ്രതിയായിരുന്നു‌ മുരാരി ബാബു. സ്വർണപ്പാളി ചെമ്പാണെന്ന രേഖ ആദ്യം തയാറാക്കിയത് മുരാരി ബാബുവായിരുന്നു. രേഖ തയ്യാറാക്കിയതുമായി ബന്ധപ്പെട്ട് മുരാരി ബാബു നൽകിയ മൊഴി ദേവസ്വം ബോർഡിനെ പ്രതിക്കൂട്ടിലാക്കിയിരുന്നു. ദേവസ്വം ബോർഡ് പ്രസിഡൻ്റിൻ്റെയും ദേവസ്വം കമ്മിഷണറുടെയുമൊന്നും അനുമതിയില്ലാതെ താൻ എഴുതി നൽകിയെന്ന പേരിൽ ഒരു പ്രവ‍ൃത്തിയും നടക്കില്ലെന്നായിരുന്നു മുരാരി ബാബുവിൻ്റെ മൊഴി.

സ്വർണക്കൊള്ള കേസിൽ ആരോപണം ഉയർന്നതിന് പിന്നാലെ മുരാരി ബാബുവിനെ ദേവസ്വം ബോർഡ് സസ്‌പെൻഡ് ചെയ്തിരുന്നു. സ്വർണപ്പാളിയെ ചെമ്പുപാളി എന്നെഴുതിയതിനാണ് നടപടിയെന്നായിരുന്നു ദേവസ്വം ബോർഡിന്റെ സസ്പെൻഷൻ ഉത്തരവിൽ പറഞ്ഞിരുന്നത്. തന്ത്രിയുടെ കത്തിൻ്റെ അടിസ്ഥാനത്തിലാണ് ചെമ്പ് പാളിയെന്ന് രേഖപ്പെടുത്തിയതെന്നും ബോർഡിൻ്റെ നടപടിക്കെതിരെ നിയമനടപടി സ്വീകരിക്കില്ലെന്നുമായിരുന്നു നടപടിക്ക് പിന്നാലെ മുരാരി ബാബുവിൻ്റെ പ്രതികരണം.

ഏറ്റുമാനൂർ: ശക്തിനഗർ പ്രശാന്തിൽ (ഹൗസ് നമ്പര്‍.93, വികെബി റോഡ്) പി.കെ.പാറുകുട്ടിയമ്മ (99) അന്തരിച്ചു. ഉഴവൂർ പനന്താനത്ത് കുടുംബാംഗമാണ്. ഭർത്താവ്: അന്തിനാട് പാറപ്പുറത്ത് പരേതനായ ഭാസ്കരൻ നായർ, മകൾ: പി.കെ.ശാന്തകുമാരി അമ്മ (റിട്ട അധ്യാപിക), മരുമകൻ: പരേതനായ ലക്ഷ്മണൻ പിള്ള. സംസ്കാരം തിങ്കളാഴ്ച 2 മണിക്ക് വീട്ടുവളപ്പിൽ.

കൊച്ചി: പ്രശസ്ത മലയാളം ചലച്ചിത്ര താരം സലിം കുമാർ (56) അന്തരിച്ചു. ന്യൂമോണിയ ബാധിച്ച് കൊച്ചിയിലെ സ്വകാര്യ ആശുപത്രിയിൽ ചികിത്സയിലിരിക്കെ ശനിയാഴ്ച രാത്രി 10.43നായിരുന്നു അന്ത്യം. ഹൃദയാഘാതമുണ്ടായതാണ് മരണകാരണം.

കോമഡിലൂടെയും മിമിക്രിയിലൂടെയും1990 കളുടെ പകുതിയോടെയാണ് സലിംകുമാർ മലയാള സിനിമയിലേക്ക് എത്തിയത്. 2000ത്തോട് കൂടിയുള്ള സലിം കുമാറിന്റെ കഥാപാത്രങ്ങൾ മലയാളിയെ ഏറെ ചിരിപ്പിച്ചിരുന്നു. കോമഡി കഥാപാത്രത്തിന്റെ നിഴലിൽ നിന്ന് മാറി വളരെ സീരിയസ് ആയിട്ടുള്ള കഥാപാത്രങ്ങളിലും സലിം കുമാർ പ്രതിഭ തെളിയിച്ചിരുന്നു. മലയാള സിനിമയിലെ സലിം കുമാറിന്റെ തഗ് ഡയലോഗുകൾ ട്രോളുകളിൽ ഇപ്പോഴും സജീവമാണ്.

1969 ഒക്ടോബര്‍ ഒന്‍പതിന് വടക്കന്‍ പറവൂരിലാണ് സലിംകുമാര്‍ ജനിച്ചത്. കൊച്ചിന്‍ കലാഭവനിലും സാഗറിലുമെല്ലാം സജീവമായി മിമിക്രി അവതരിപ്പിച്ചു. ഉറ്റസുഹൃത്തായ നാദിര്‍ഷയാണ് സലിംകുമാറിനെ സിനിമയിലേക്ക് കൈപിടിച്ച് കയറ്റിയത്. ഇഷ്ടമാണ് നൂറുവട്ടമായിരുന്നു ആദ്യ ചിത്രം. 2000 ത്തില്‍ പുറത്തിറങ്ങിയ തെങ്കാശിപ്പട്ടണം സൂപ്പര്‍ഹിറ്റായതോടെ സലിംകുമാര്‍ മലയാളിയുടെ മനസിലും ഇരിപ്പുറപ്പിച്ചു. മുന്നൂറിലേറെ സിനിമകളില്‍ താരം നിറഞ്ഞുനിന്നു. കൂടാതെ കംപാര്‍ട്മെന്‍റ്, കറുത്ത ജൂതന്‍, ദൈവമേ കൈ തൊഴാം കെ.കുമാറാകണം എന്നീ സിനിമകള്‍ സംവിധാനം ചെയ്യുകയും ചെയ്തു.

അച്ഛനുറങ്ങാത്ത വീട് എന്ന ചിത്രത്തിലെ അഭിനയത്തിന് 2005ലെ മികച്ച രണ്ടാമത്തെ നടനുള്ള സംസ്ഥാന പുരസ്കാരം സലിം കുമാറിനെ തേടിയെത്തി. ആദാമിന്‍റെ മകന്‍ അബുവിലൂടെ 2010 ൽ മികച്ച നടനുള്ള ദേശീയ, സംസ്ഥാന പുരസ്കാരവും, അയാളും ഞാനും തമ്മില്‍ എന്ന സിനിമയിലൂടെ 2013ൽ മികച്ച ഹാസ്യനടനുള്ള സംസ്ഥാന പുരസ്കാരവും സലിം കുമാർ നേടിയിട്ടുണ്ട്.

കഴിഞ്ഞ കുറച്ചു വർഷങ്ങളായി കരൾ സംബന്ധമായ അസുഖങ്ങളെത്തുടർന്ന് താരം ആരോഗ്യപരമായ വെല്ലുവിളികൾ നേരിട്ടിരുന്നു. ലിവർ സിറോസിസ് ബാധിച്ചത് മദ്യപാനം കൊണ്ടല്ലെന്നും അത് പാരമ്പര്യമായി ലഭിച്ച അസുഖമാണെന്നും അദ്ദേഹം നേരത്തെ വെളിപ്പെടുത്തിയിരുന്നു. രോഗാവസ്ഥയിലായിരുന്ന കാലയളവിൽ വ്യാജ ചികിത്സകൾ തേടേണ്ടി വന്നതും അത് ആരോഗ്യനില വഷളാക്കിയതും താരം മുമ്പ് പരസ്യമായി പങ്കുവെച്ചിട്ടുണ്ട്. മുഖ്യമന്ത്രി വി ഡി സതീശന്റെ പറവൂരിലെ സ്വീകരണ പരിപാടിയിലാണ് സലിം കുമാർ അവസാനമായി പൊതുവേദിയിലെത്തിയത്.

കൊച്ചി: മുന്‍ എംപിയും കോണ്‍ഗ്രസ് നേതാവുമായ കെ പി ധനപാലന്‍ (76) അന്തരിച്ചു. ശാരീരിക അസ്വസ്ഥതകളെ തുടര്‍ന്ന് വടക്കന്‍ പറവൂരിലെ സ്വകാര്യ ആശുപത്രിയില്‍ ചികിത്സയിലിരിക്കെ ഇന്ന് പുലര്‍ച്ചെയായിരുന്നു അന്ത്യം. ഭൗതികദേഹം പൊതുദര്‍ശനത്തിന് ശേഷം പറവൂരിലെ വസതിയില്‍ സംസ്‌കരിക്കും.

എറണാകുളം ജില്ലയിലെ ശക്തനായ കോൺഗ്രസ് നേതാക്കളിലൊരാളായിരുന്നു. യൂത്ത് കോൺഗ്രസിന്റെ സംസ്ഥാന വൈസ് പ്രസിഡന്റായി സേവനമനുഷ്ഠിച്ചിട്ടുണ്ട്. 2009-ലെ നിയമസഭാ തിരഞ്ഞെടുപ്പിൽ ചാലക്കുടി മണ്ഡലത്തിൽ നിന്ന് മത്സരിച്ച് ലോക്സഭയിലേക്ക് തിരഞ്ഞെടുക്കപ്പെട്ടു. എറണാകുളം ജില്ലയിലെ എ ഗ്രൂപ്പിന്റെ അംഗമായിരുന്നു. എകെ ആന്റണിയുടെ വിശ്വസ്തരിൽ ഒരാളായിരുന്നു കെ പി ധനപാലൻ. 2001 മുതൽ ആറ് വർഷം വരെ എറണാകുളം ജില്ലാ കോൺഗ്രസ് കമ്മിറ്റിയുടെ പ്രസിഡന്റായി പ്രവർത്തിച്ചിട്ടുണ്ട്.

ആരോഗ്യപ്രശ്നങ്ങൾ നേരിട്ടിരുന്നപ്പോഴും തിരഞ്ഞെടുപ്പിന് ഉൾപ്പെടെ സജീവമായിരുന്നു. കെ.പി.സി.സിയുടെ സെക്രട്ടറിയായും ജനറൽ സെക്രട്ടറിയായും പ്രവർത്തിച്ചു. 979 മുതൽ 1984 വരെ നോർത്ത് പറവൂർ മുനിസിപ്പൽ ചെയർമാനായും 1995 മുതൽ 2000 വരെ നോർത്ത് പറവൂർ മുൻസിപ്പൽ കൗൺസിലറായും സേവനമനുഷ്ഠിച്ചിട്ടുണ്ട്. സംസ്ഥാന ക്ഷീരകര്‍ഷക ക്ഷേമനിധി ബോര്‍ഡ് ചെയര്‍മാന്‍ (2005-2006), നോര്‍ത്ത് മലബാര്‍ ഗ്രാമീണ്‍ ബാങ്ക് ഡയറക്ടര്‍ (2007-2009), കൊച്ചിന്‍ യൂണിവേഴ്‌സിറ്റി സെനറ്റ് മെമ്പര്‍ എന്നീ നിലകളില്‍ പ്രവര്‍ത്തിച്ചിട്ടുണ്ട്.

ഏറ്റുമാനൂർ: ശക്തിനഗര്‍ ഗൗരീപദ്മത്തില്‍ (മടത്തേട്ട് ലെയ്ന്‍) കെ.എസ്.ഈ.ബി റിട്ട.ജൂനിയർ സൂപ്രണ്ട് പി.വിശ്വനാഥൻ നായർ (86) അന്തരിച്ചു. ഭാര്യ P K ലളിത (കെ.എസ്.ഈ.ബി റിട്ട. സീനിയർ സൂപ്രണ്ട്). മക്കൾ ഡോ. വി. ഹേമ, ഡോ. വി. ഉമ, മരുമക്കൾ പരേതനായ ഡോ പി. ബിജു, ഡോ. അരുൺരാജ് കൈമൾ. സംസ്കാരം 29/5/2026 വെള്ളിയാഴ്ച ഉച്ചക്ക് 1 മണിക്ക് വീട്ടുവളപ്പിൽ.

പേരൂർ: പേരൂർ പായിക്കാട് മഠത്തിക്കുഴിയിൽ പരേതനായ ഗോപാലകൃഷ്ണൻ നായരുടെ ഭാര്യ രുഗ്മിണിയമ്മ (92) അന്തരിച്ചു. മക്കൾ: ഗോപകുമാർ (റിട്ട. പോലീസ് സബ് ഇൻസ്പെക്ടർ), ബിന്ദു, മരുമക്കൾ: സന്ധ്യ (ഉപ്പുതറ), ഭുവന ചന്ദ്രൻ (ചോറ്റി, കാഞ്ഞിരപ്പള്ളി). സംസ്കാരം നാളെ 11ന് വീട്ടുവളപ്പിൽ.

തിരുവനന്തപുരം: മുന്‍ ഡിജിപി ഡോ. പി ജെ അലക്‌സാണ്ടര്‍ അന്തരിച്ചു. 89 വയസായിരുന്നു. വാര്‍ധക്യ സഹജമായ അസുഖങ്ങളെ തുടര്‍ന്ന് ചികിത്സയിലായിരുന്നു. ഇന്ന് പുലര്‍ച്ചെയായിരുന്നു അന്ത്യം. 1960 ബാച്ചിലെ ഐപിഎസ് ഉദ്യോഗസ്ഥനാണ്. തിരുവനന്തപുരത്തെ സ്വകാര്യ ആശുപത്രിയിൽ ചികിത്സയിലിരിക്കെയായിരുന്നു അന്ത്യം സംഭവിച്ചത്. മൃതദേഹം കവടിയാറിലെ സ്വവസതിയിലാണ്. പൊലീസ് പരിഷ്‌കരണത്തില്‍ നിര്‍ണായക പങ്കുവഹിച്ച ഉദ്യോഗസ്ഥനാണ് വിടവാങ്ങുന്നത്. കെ കരുണാകരന്റെ കാലത്ത് സംസ്ഥാനത്തെ പല ജില്ലകളിലും പൊലീസ് മേധാവിയായി പ്രവര്‍ത്തിച്ചിരുന്നു. വിരമിച്ച ശേഷം പൊലീസ് പരിഷ്‌കരണങ്ങളെ സംബന്ധിച്ച് എഴുതുകയും പ്രഭാഷണങ്ങള്‍ നടത്തുകയും ചെയ്തിട്ടുണ്ട്.

കുമാരനല്ലൂർ : ഓണാടത്തിൽ രവീന്ദ്രമേനോൻ (78) അന്തരിച്ചു. ഭാര്യ: കുമാരനല്ലൂർ പറഞ്ഞുകാട്ട് തെക്കേപറമ്പിൽ കുടുംബാംഗം ശാന്തമ്മ. മക്കൾ : സുരേഖ (എസ്ബിഐ കസ്റ്റമർ സർവീസ് പോയിൻറ്, പേരൂർ), സുധീഷ് കുമാർ (ഗ്രീസ്)
മരുമക്കൾ : സുജിൽകുമാർ ആദിപുരം (കല്ലുപെൻസിൽ ഷോപ്പ്, പേരൂർ), ശ്രീലക്ഷ്മി പതിപ്പറമ്പിൽ (മാവിളങ്ങ്, ചിങ്ങവനം). സംസ്ക്കാരം വൈകിട്ട് 4 മണിക്ക് വീട്ടുവളപ്പിൽ.

കോട്ടയം: പൊതു പ്രവര്‍ത്തകന്‍ ഡിജോ കാപ്പന്‍ (68) അന്തരിച്ചു. പാലായിലെ സ്വകാര്യ ആശുപത്രിയിലായിരുന്നു അന്ത്യം. 2025 ഒക്ടോബറില്‍ തിരുവനന്തപുരത്ത് വച്ച് അദ്ദേഹത്തിന് ഒരു കാര്‍ അപകടത്തില്‍ പരിക്കേറ്റിരുന്നു. തുടർന്ന് മാസങ്ങളായി ചികിത്സയിലായിരുന്നു. തിരുവനന്തപുരത്തെ ഫ്‌ളാറ്റിന്റെ മുകളിലത്തെ പാര്‍ക്കിംഗ് നിലയില്‍ നിന്നും കാര്‍ താഴേയ്ക്ക് ഇറക്കുന്നതിനിടെ ബ്രേക്ക് നഷ്ടപ്പെട്ടായിരുന്നു അപകടം ഉണ്ടായത്. ഭാര്യയും ഒപ്പമുണ്ടായിരുന്നു.

അഴിമതിക്കെതിരെയുള്ള പോരാട്ടങ്ങളിലും പൊതുജനപ്രശ്‌നങ്ങളിലും സജീവമായി ഇടപെട്ടയാളാണ് ഡിജോ കാപ്പൻ. ഉപഭോക്തൃ നിയമങ്ങളെക്കുറിച്ച് സാധാരണക്കാര്‍ക്ക് അറിവ് നല്‍കുന്നതിലും അവരുടെ അവകാശങ്ങള്‍ സംരക്ഷിക്കുന്നതിലും ശ്രദ്ധേയനായ വ്യക്തിയാണ്. തുടർന്ന് സെന്‍റർ ഫോർ കണ്‍സ്യൂമർ എഡ്യൂക്കേഷൻ സ്ഥാപിച്ചു. 1982 ല്‍ കേരള സര്‍വകലാശാല ജനറല്‍ സെക്രട്ടറിയായിരുന്നു. കെഎസ് യു യൂത്ത് ഫ്രണ്ട് സംസ്ഥാന പ്രസിഡന്റായും പ്രവര്‍ത്തിച്ചു. 1998 ല്‍ സജീവ രാഷ്ട്രീയം ഉപേക്ഷിച്ച ഡിജോ കാപ്പന്‍, റോഡ് സുരക്ഷ, ഉപഭോക്താക്കളുടെ അവകാശങ്ങള്‍ തുടങ്ങിയവയ്ക്കുള്ള പോരാട്ടവുമായി പൊതുരംഗത്ത് സജീവമായിരുന്നു.

അതിരമ്പുഴ: നാൽപ്പത്തിമല മൈലം പ്ലാക്കൽ (തടത്തിൽ) എം കെ സോമൻ (82) അന്തരിച്ചു. സംസ്കാരം വ്യാഴാഴ്ച (30.04.26) രാവിലെ 11 മണിക്ക് വീട്ടുവളപ്പിൽ.

ഏറ്റുമാനൂർ: ഏറ്റുമാനൂർ നഗരസഭ ചെയർപേഴ്സണും കോൺഗ്രസ് നേതാവുമായ തെള്ളകം പുളിമാന്‍തുണ്ടത്തില്‍ (അമ്പലത്തിങ്കൽ) ടോമി കുരുവിളയുടെ ഭാര്യ മേരി ടോമി (66) അന്തരിച്ചു. സംസ്കാരം ഏപ്രിൽ 29 ന് വൈകുന്നേരം 4 മണിക്ക് ഭവനത്തിലെ ശുശ്രൂഷകള്‍ക്ക് ശേഷം തെളളകം പുഷ്പഗിരി പള്ളി സെമിത്തേരിയില്‍. മക്കൾ: ആൻ മരിയ ടോമി, ആഗ്‌നത് മരിയ ടോമി.

തിരുവനന്തപുരം: എഴുത്തുകാരനും ചിന്തകനും സന്യാസിയുമായ മുനി നാരായണ പ്രസാദ് (87) അന്തരിച്ചു. സ്വകാര്യ മെഡിക്കൽ കോളജിൽ പുലർച്ചെ 3.55നായിരുന്നു അന്ത്യം. വര്‍ക്കലയിലെ നാരായണ ഗുരുകുല ഫൗണ്ടേഷന്റെ സ്ഥാപകനാണ്. രാജ്യത്ത് അറിയപ്പെടുന്ന ആത്മീയാചാര്യനാണ് മുനി നാരായണ പ്രസാദ്. ഇന്ത്യന്‍ തത്ത്വചിന്തയെയും വേദാന്തത്തെയും കുറിച്ച് അദ്ദേഹം ധാരാളം എഴുതിയിട്ടുണ്ട്. കൂടാതെ പരമ്പരാഗത ഗ്രന്ഥങ്ങള്‍ പുതിയ തലമുറയ്ക്ക് ലഭ്യമാക്കുന്നതില്‍ അദ്ദേഹം സവിശേഷ ശ്രദ്ധ പതിപ്പിച്ചിരുന്നു.

ഇന്ത്യന്‍ തത്ത്വചിന്ത രംഗത്ത് അദ്ദേഹം നല്‍കിയ സംഭാവനകളെ മാനിച്ച് രാജ്യം 2024ൽ പത്മശ്രീ അവാര്‍ഡ് നല്‍കി ആദരിച്ചിട്ടുണ്ട്. സിവില്‍ എന്‍ജിനീയറായി പരിശീലനം നേടിയ അദ്ദേഹം കേരള സര്‍ക്കാരിന്റെ പൊതുമരാമത്ത് വകുപ്പില്‍ ജോലി ചെയ്താണ് ഔദ്യോഗിക ജീവിതത്തിന് തുടക്കമിട്ടത്. 1968ല്‍ അദ്ദേഹം രാജിവച്ചാണ് നാരായണ ഗുരുകുലത്തില്‍ ചേര്‍ന്നത്.1923ല്‍ നാരായണ ഗുരുവിന്റെ ശിഷ്യനായ നടരാജ ഗുരുവാണ് ഗുരുകുലം സ്ഥാപിച്ചത്.

1999-ല്‍ അദ്ദേഹം നാരായണ ഗുരുകുലത്തിന്റെ തലവനും ഗുരുവുമായി. അദ്ദേഹത്തിന്റെ നേതൃത്വത്തില്‍ ഗുരുകുലം ഇന്ത്യയിലും വിദേശത്തും പ്രവര്‍ത്തനങ്ങള്‍ വ്യാപിപ്പിച്ചു, കേരളം, തമിഴ്നാട്, കര്‍ണാടക , സിംഗപ്പൂര്‍ , ഫിജി , യുണൈറ്റഡ് സ്റ്റേറ്റ്‌സ് എന്നിവിടങ്ങളില്‍ കേന്ദ്രങ്ങള്‍ പ്രവര്‍ത്തിച്ചു 1989 മുതല്‍ 1991 വരെ ഫിജിയില്‍ ഗീതാശ്രമത്തിനും അദ്ദേഹം നേതൃത്വം നല്‍കി.

മുനി നാരായണ പ്രസാദ് 130ലധികം പുസ്തകങ്ങള്‍ രചിച്ചിട്ടുണ്ട് ഏകദേശം 100 എണ്ണം മലയാളത്തിലും 30 എണ്ണം ഇംഗ്ലീഷിലുമാണ്. ഐതരേയം , ഈശാവാസ്യം , കേന , പ്രശ്‌ന , മാണ്ഡൂക്യം , തൈത്തിരീയം , ശ്വേതാശ്വതാരം , ഛാന്ദോഗ്യ ഉപനിഷത്തുകള്‍ എന്നിവയുടെ വ്യാഖ്യാനങ്ങള്‍ അദ്ദേഹത്തിന്റെ കൃതികളില്‍ ഉള്‍പ്പെടുന്നു . ഭഗവദ്ഗീതയെക്കുറിച്ചുള്ള അദ്ദേഹത്തിന്റെ ഇംഗ്ലീഷ് വ്യാഖ്യാനത്തിന്റെ പേര് ലൈഫ്‌സ് പില്‍ഗ്രിമേജ് ത്രൂ ഗീത എന്നാണ് . നാരായണ ഗുരു: സമ്പൂര്‍ണ്ണ കൃതികള്‍ (നാഷണല്‍ ബുക്ക് ട്രസ്റ്റ്), നാരായണ ഗുരുവിന്റെ തത്ത്വചിന്ത തുടങ്ങിയ പുസ്തകങ്ങളും രചിച്ചതും അദ്ദേഹമാണ്. കേരള സാഹിത്യ അക്കാദമി അവാര്‍ഡ് അടക്കം നിരവധി പുരസ്‌കാരങ്ങളും അദ്ദേഹത്തിന് ലഭിച്ചിട്ടുണ്ട്.

ഏറ്റുമാനൂർ : ചെറുവാണ്ടൂർ ശ്രീപതി സി.വി.എൻ. കളരി സ്ഥാപകൻ പരേതനായ കെ.ജി മുരളീധരഗുരുക്കളുടെ മകനും മർമ്മചികിത്സകനും കളരിപ്പയറ്റ് പരിശീലകനുമായ ബിജു മുരളിധര ഗുരുക്കൾ (50) അന്തരിച്ചു. ഇൻ്റർ യൂണിവേഴ്സിറ്റി റെസലിംഗ് ചാമ്പ്യൻ, എം.ജി യൂണിവേഴ്സിറ്റി യോഗാ ചാമ്പ്യൻ, സംസ്ഥാന കളരിപ്പയറ്റ് ചാമ്പ്യൻ തുടങ്ങി ഒട്ടേറെ അംഗീകാരങ്ങൾ നേടിയിട്ടുണ്ട്. കോട്ടയം ജില്ല കളരിപ്പ അസോസിയേഷൻ ജോയിൻ സെക്രട്ടറിയയി സേവന മനുഷ്ടിച്ചു. ഇന്ത്യൻ പെൻസിങ് ടീം അംഗമായിരുന്നു. ഫ്രാൻസ് നെതര്‍ലാൻഡ് തുടങ്ങിയ രാജ്യങ്ങളിൽ കളരിപ്പയറ്റ് പ്രദർശനവും വർഷോപ്പുകളും നടത്തിയിട്ടുണ്ട്. ഭാര്യ: അശ്വതി, മകൾ: ശ്രീലക്ഷ്മി. സംസ്കാരം ചൊവ്വാഴ്ച 3 മണിക്ക് വീട്ടുവളപ്പിൽ.

അതിരമ്പുഴ: മുൻ അതിരമ്പുഴ പഞ്ചായത്ത് പ്രസിഡൻ്റ് കെ ജെ ജോർജ്ജ് കിടങ്ങയിൽ (87) അന്തരിച്ചു. സംസ്കാരം പിന്നിട്.

പേരൂർ: അമ്പനാട്ട് താഴെ പരേതനായ മാണിയുടെ ഭാര്യ ശോശാമ്മ മാണി (90) അന്തരിച്ചു. പരേത മണർകാട് പൈനിങ്കലായ പുത്തൻപുരയ്ക്കൽ പാലയ്ക്കാട്ടു കുടുംബാംഗമാണ്. സംസ്കാരം നാളെ (ശനി) ഉച്ചകഴിഞ്ഞു 3.00 മണിയ്ക്കു വീട്ടിലെ ശുശ്രൂഷകൾക്ക് ശേഷം പേരൂർ മർത്തശ്‌മൂനി യാക്കോബായ സുറിയാനി പള്ളിയിൽ. മകൾ : മിനി, മരുമകൻ: ജോണി

ഏറ്റുമാനൂർ: ഏറ്റുമാനൂർ കിഴക്കേനട പുത്തൻവീട്ടിൽ വി എൻ രാമകൃഷ്ണൻ നായർ (91) അന്തരിച്ചു. ഏറ്റുമാനൂർ സർവീസ് സഹകരണ ബാങ്ക് റിട്ടയേർഡ് അസിസ്റ്റന്റ് സെക്രട്ടറിയാണ്. ഭാര്യ പരേതയായ റിട്ട. അധ്യാപിക പി ലീലാമ്മ . മക്കൾ മിനി ( റിട്ടയേഡ് ടീച്ചർ ശ്രീശങ്കരാ കോളേജ് കാലടി ) ബീന എൽ, സജി ആർ ( ജില്ലാ പട്ടികജാതി വികസന വകുപ്പ് കോട്ടയം) മരുമക്കൾ അഡ്വക്കേറ്റ് ജി സുരേഷ് മൂവാറ്റുപുഴ. പി നടരാജൻ ആകാശവാണി കൊച്ചി. രജനി ആർ (അധ്യാപിക ഗവൺമെന്റ് ടി‌ടിഐ ഏറ്റുമാനൂർ ). സംസ്കാരം16.04.2015 വ്യാഴാഴ്ച ഉച്ചയ്ക്കുശേഷം രണ്ട് മണിക്ക് വീട്ടുവളപ്പിൽ.

മുംബൈ :വിഖ്യാത പിന്നണി ഗായിക ആശാ ഭോസ്‌ലെ (92) അന്തരിച്ചു. ഹൃദയാഘാതത്തെ തുടർന്ന് മുംബൈ ബ്രീച്ച് കാൻഡി ആശുപത്രിയിലായിരുന്നു അന്ത്യം. ശനിയാഴ്ചയാണ് ആശാ ഭോസ്‌ലയെ എമർജൻസി മെഡിക്കൽ സർവീസസ് യൂണിറ്റിൽ പ്രവേശിപ്പിച്ചത്.

സംഗീതജ്ഞനും നാടക നടനുമായ ദീനാനാഥ് മങ്കേഷ്‌കറുടെയും ശിവന്തിയുടെയും അഞ്ചു മക്കളിൽ ഒരാളായി 1933 സെപ്റ്റംബർ എട്ടിനാണ് ആശാ ഭോസ്‌ലെ ജനിച്ചത്. അന്തരിച്ച പിന്നണി ഗായിക ലതാ മങ്കേഷ്‌കർ മൂത്ത സഹോദരിയാണ്. പതിനാറാം വയസിൽ ഗണപത്രോ ഭോസ്‌ലെയെ വിവാഹം കഴിച്ചു. 1960ൽ ഇവർ വേർപിരിഞ്ഞു. പിന്നീട്, 1980ൽ പ്രശസ്ത സംഗീത സംവിധായകനായ ആർ.ഡി. ബർമ്മനുമായി വിവാഹിതയായി. ഹേമന്ത് ഭോസ്‌ലെ, വർഷ ഭോസ്‌ലെ, ആനന്ദ് ഭോസ്‌ലെ എന്നിവരാണ് മക്കൾ.

വൈവിധ്യപൂർണമായിരുന്നു ദശാബ്ദങ്ങൾ നീണ്ട ആശാ ഭോസ്‌ലെയുടെ സംഗീത യാത്ര. 20 ഭാഷകളിലായി 12,000ത്തിലധികം ഗാനങ്ങളാണ് ആലപിച്ചിട്ടുള്ളത്. ഒ.പി. നയ്യാർ, സഹൂർ ഖയ്യാം ഹാഷ്മി, ശങ്കർ-ജയ്കിഷൻ, നൗഷാദ്, ആർ.ഡി. ബർമൻ, ഇളയരാജ, എ.ആർ. റഹ്‌മാൻ തുടങ്ങി വിവിധ തലമുറയിലെ അതികായരുടെ ഗാനങ്ങൾക്ക് ശബ്ദമായി. ഈ ഗാനങ്ങൾ എല്ലാം തന്നെ എവർഗ്രീൻ ഹിറ്റുകളാണ്.

1943ൽ 'മാത്സ ബാൽ' എന്ന മറാത്തി ചിത്രത്തിലെ 'ചലാ ചലാ നവ് ബാല' എന്ന ഗാനം ആലപിച്ചുകൊണ്ടാണ് പിന്നണി ഗാനരംഗത്തേക്ക് പ്രവേശിക്കുന്നത്. പത്ത് വയസായിരുന്നു അപ്പോൾ പ്രായം. 1948ൽ 'ചുൻ‌രിയ' എന്ന ചിത്രത്തിലൂടെ ഹിന്ദി സിനിമയിൽ അരങ്ങേറ്റം കുറിച്ചു. 1949ൽ 'രാത് കി റാണി' എന്ന ചിത്രത്തിലാണ് ആദ്യ സോളോ ഗാനം ആലപിക്കുന്നത്.

2000ൽ ദാദാസാഹിബ് ഫാൽക്കെ അവാർഡും 2008ൽ പത്മവിഭൂഷണും നൽകി രാജ്യം ആദരിച്ചു. രണ്ട് തവണ മികച്ച പിന്നണി ഗായികയ്‌ക്കുള്ള ദേശീയ ചലച്ചിത്ര പുരസ്കാരം ലഭിച്ചു. 'ഉംറാവോ ജാൻ', 'ഇജാസത്ത്' എന്നീ ചിത്രങ്ങളിലെ മികച്ച ആലാപനത്തിനായിരുന്നു അംഗീകാരം. 2011ൽ ഏറ്റവും കൂടുതൽ സിംഗിൾ സ്റ്റുഡിയോ റെക്കോർഡിങ്ങുകൾക്ക് ഗിന്നസ് വേൾഡ് റെക്കോർഡും സ്വന്തമാക്കി.

ഏറ്റുമാനൂർ: വെള്ളനാട് കൊക്കുടി വീട്ടിൽ (ഗീതാഞ്ജലി, മങ്കര കലുങ്ക്) എസ്. ഗംഗാധരൻ നായർ (റിട്ട. പഞ്ചായത്ത്‌ സെക്രട്ടറി - 83) അന്തരിച്ചു. ഭാര്യ : മൂവാറ്റുപുഴ ചന്ദ്രവിലാസിൽ കെ. ഓമന (റിട്ട. സീനിയർ സൂപ്രണ്ട്, വനം വകുപ്പ്)
മകൾ : ഹേമ ജി. നായർ (അസിസ്റ്റന്റ് രജിസ്ട്രാർ, എം. ജി. സർവ്വകലാശാല) മരുമകൻ : സനിൽ പി.
(റിട്ട. ചീഫ് മാനേജർ, എസ് ബി ഐ) സംസ്കാരം ഞായറാഴ്ച (12.04.2026) പകൽ 3 മണിക്ക് ഏറ്റുമാനൂരിലെ വീട്ടുവളപ്പിൽ.