21 November, 2022 06:19:00 PM
കുഫോസ് താൽക്കാലിക വിസിയെ ചാൻസലർക്ക് നിയമിക്കാമെന്ന് സുപ്രീം കോടതി
ന്യൂഡല്‍ഹി: കേരള ഫിഷറീസ്, സമുദ്ര പഠന സര്‍വകലാശാല താൽക്കാലിക വൈസ് ചാൻസലറെ ചാൻസലർക്ക് നിയമിക്കാമെന്ന് സുപ്രീം കോടതി. മുന്‍ വിസി ഡോ.റിജി ജോണിന്‍റെ നിയമനം റദ്ദാക്കി ഹൈക്കോടതി വിധി സ്റ്റേ ചെയ്തില്ല. കേസ് ജയിച്ചാല്‍ ഡോ.റിജി ജോണിനെ വീണ്ടും വിസിയായി നിയമിക്കാമെന്ന് സുപ്രീം കോടതി പറഞ്ഞു.
ഹൈക്കോടതി വിധി ചോദ്യം ചെയ്ത് ഡോ. കെ. റിജി ജോണ്‍ നല്‍കിയ അപ്പീലില്‍ എതിര്‍കക്ഷികള്‍ക്കു നോട്ടീസ് അയക്കാന്‍ കോടതി നിര്‍ദേശം നൽകി. ഹര്‍ജി രണ്ടാഴ്ച കഴിഞ്ഞു പരിഗണിക്കാന്‍ മാറ്റി.
ഹൈക്കോടതി ഉത്തരവു സ്റ്റേ ചെയ്യണമെന്ന് ഡോ. റിജി ജോണിനു വേണ്ടി ഹാജരായ സീനിയര്‍ അഭിഭാഷകന്‍ ജയദീപ് ഗുപ്തയും സംസ്ഥാന സര്‍ക്കാരിനു വേണ്ടി ഹാജരായ കെ.കെ. വേണുഗോപാലും ആവശ്യപ്പെട്ടു. എന്നാല്‍ രണ്ടാഴ്ചയ്ക്കു ശേഷം ഹര്‍ജിയില്‍ തിര്‍പ്പാക്കാമെന്ന നിലപാടാണ്, ചീഫ് ജസ്റ്റീസ് ഡിവൈ ചന്ദ്രചൂഡ് അധ്യക്ഷനായ ബെഞ്ച് സ്വീകരിച്ചത്
