14 November, 2016 12:43:41 PM
പുതിയ നോട്ടുകൾ നാളെമുതൽ എ.ടി.എമ്മിൽ നിന്ന് ലഭിച്ചുതുടങ്ങും
ദില്ലി: രാജ്യത്തെ എ.ടി.എമ്മുകളിൽ പുതിയ നോട്ടുകൾ നാളെ മുതൽ ലഭ്യമാക്കുവാനുള്ള നടപടികള്‍ ആരംഭിച്ചതായി ധനകാര്യ സെക്രട്ടറി ശക്തികാന്ത ദാസ്. ഇതിനായി രൂപീകരിച്ച പ്രത്യേക ദൗത്യസംഘം പ്രവർത്തനം തുടങ്ങിക്കഴിഞ്ഞു. പണ ദൗർലഭ്യത്തിന് അറുതി വരുത്താൻ മൈക്രോ എ.ടി.എമ്മുകൾ പ്രവർത്തിക്കുമെന്നും അദ്ദേഹം അറിയിച്ചു.
പുന:ക്രമീകരണം പൂർത്തിയായാൽ എ.ടി.എമ്മുകളിൽ നിന്നും പിൻവലിക്കാവുന്ന കൂടിയ തുക 2,500 ആകും. ഇപ്പോൾ ഇത് 2,000 ആണെന്നും ന്യൂഡൽഹിയിൽ നടത്തിയ വാർത്താ സമ്മേളനത്തിൽ ശക്തികാന്ത ദാസ് അറിയിച്ചു. പുതിയ നോട്ടുകളും ലഭിക്കുന്ന തരത്തിൽ എ.ടി.എമ്മുകൾ പ്രവർത്തന സജ്ജമാക്കാൻ പ്രത്യേക കര്‍മസേനയെ നിയമിക്കാൻ പ്രധാനമന്ത്രിയുടെ നേതൃത്വത്തിലുള്ള പ്രത്യേക യോഗത്തില്‍ തീരുമാനമെടുത്തിരുന്നു.
