16 June, 2016 05:10:58 PM


സ്കൂള്‍ ഓഫീസില്‍ മദ്യപാനവും മദ്യവില്‍പ്പനയും ; ഹെഡ്മാസ്റ്റര്‍ അറസ്റ്റില്‍



മലപ്പുറം: വില്‍പ്പനക്കായി സ്കൂള്‍ ഓഫീസ് മുറിയില്‍ വിദേശ മദ്യം സൂക്ഷിച്ച അണ്‍ എയ്ഡഡ് സ്കൂള്‍ ഹെഡ്മാസ്റ്റര്‍ അറസ്റ്റില്‍. വെള്ളച്ചാല്‍ ലിറ്റില്‍ ഫ്ളവര്‍ മോഡല്‍ സ്കൂളിലെ പ്രധാനാധ്യാപകനായ ചന്ദ്രനെയാണ് നാട്ടുകാരുടെ സഹായത്തോടെ താനൂര്‍ പൊലീസ് പിടികൂടിയത്.


താനൂര്‍ ഒഴൂര്‍ പഞ്ചായത്തിലെ വെള്ളച്ചാലില്‍ ഇന്നലെ അര്‍ദ്ധരാത്രിയോടെയാണ് സംഭവം. ഇയാള്‍ കഴിഞ്ഞ ഏതാനും വര്‍ഷമായി ഒഴൂരില്‍ സ്ഥിരതാമസമാണ്. സ്കൂളില്‍ വച്ച്‌ മദ്യപിക്കുകയും വില്‍പ്പന നടത്തുകയും ചെയ്യുന്നതായി നാട്ടുകാര്‍ക്ക് നേരത്തെ വിവരം ലഭിച്ചിരുന്നു.

ഇതനുസരിച്ച്‌ പ്രദേശവാസികളില്‍ ചിലര്‍ കുറച്ചു നാളായി ഇയാളെ നിരീക്ഷിച്ചു വരികയായിരുന്നു. തുടര്‍ന്ന് സംഭവം ബോധ്യപ്പെട്ടതിന്റെ അടിസ്ഥാനത്തില്‍ വിവരം പൊലീസില്‍ അറിയിക്കുകയായിരുന്നു. ബുധനാഴ്ച രാത്രി പന്ത്രണ്ടോടെയാണ് പൊലീസ് ചന്ദ്രനെ പിടികൂടിയത്. സ്കൂളിലെ ഓഫീസ് മുറിയില്‍ നിന്നും ഒരു കുപ്പി വിദേശ മദ്യവും കാലിയായ കുറച്ചു കുപ്പികളും കണ്ടെത്തി. തുടര്‍ന്ന് ഇയാളെ കസ്റ്റഡിയില്‍ എടുത്ത് അറസ്റ്റ് രേഖപ്പെടുത്തി.

അധ്യാപകനെ കസ്റ്റഡിയിലെടുത്ത വിവരം അറിഞ്ഞതോടെ ഇയാളെ സംരക്ഷിക്കാനായി പൊലീസില്‍ സമ്മര്‍ദം ശക്തമായതായാണ് അറിയുന്നത്. നാട്ടുകാരുടെ പ്രതിഷേധം കണക്കിലെടുത്ത് അറസ്റ്റ് രേഖപ്പെടുത്തിയെങ്കിലും അദ്ധ്യാപകനുമേല്‍ കടുത്ത വകുപ്പ് ചുമത്താതിരിക്കാന്‍ മാനേജ്മെന്റ് അടക്കമുള്ളവവരുടെ ഭാഗത്ത് നിന്നും സമ്മര്‍ദം തുടരുകയാണ്. അതേസമയം ഈ അദ്ധ്യാപകനെ ഇനി ഈ സ്കൂളില്‍ തുടരാന്‍ അനുവദിക്കില്ലെന്ന നിലപാടിലാണ് നാട്ടുകാര്‍.

തൊട്ടടുത്തുള്ള ഹൈസ്കൂളുകള്‍ കേന്ദ്രീകരിച്ച്‌ കഞ്ചാവും മദ്യവും വില്‍പന നടക്കുന്നതായും ഇതിനായി വന്‍ മാഫിയകള്‍ പ്രവര്‍ത്തിക്കുന്നതായും വാര്‍ത്തകളുണ്ട്. ഇതിനെതിരെ നാട്ടുകാരുടെയും പൊലീസിന്റെയും നേതൃത്വത്തില്‍ ബോധവല്‍ക്കരണ ക്ലാസുകളും നടത്തി വരികയാണ്. എന്നാല്‍ ഈ പശ്ചാത്തലത്തില്‍ സ്കൂളിലെ ഹെഡ്മാസ്റ്റര്‍ ചുമതലയുള്ള അദ്ധ്യാപകന്‍ തന്നെ ഓഫീസ് മുറിയില്‍വച്ച്‌ മദ്യപിക്കുകയും വില്‍പ്പന നടത്തുകയും ചെയ്തിരിക്കുകയാണ്.


വിദ്യാര്‍ത്ഥികള്‍ക്ക് ലഹരി എത്തിക്കുന്ന മാഫിയകളുമായി ബന്ധം ഇയാള്‍ക്കുണ്ടോയെന്ന് പരിശോധിക്കണമെന്ന് നാട്ടുകാര്‍ ആവശ്യപ്പെട്ടു. അതേസമയം വിദ്യാര്‍ത്ഥികള്‍ക്ക് മദ്യം വില്‍പ്പന നടത്തിയ വിവരം പരിശോധിച്ചു വരികയാണെന്നും നിരവധി മദ്യ കുപ്പികള്‍ ഓഫീസ് മുറിയില്‍ നിന്നും പിടികൂടിയത് സംശയം ജനിപ്പിക്കുന്നതായും താനൂര്‍ എസ്.ഐ മറുനാടന്‍ മലയാളിയോടു പറഞ്ഞു.



Share this News Now:
  • Google+
Like(s): 356