02 October, 2021 09:47:05 PM
പാലായിലെ പ്രണയപാതകം: അഭിഷേക് റിമാൻഡിൽ; ഒറ്റ കുത്തിൽ വോക്കൽ കോഡ് അറ്റുപോയി
പാലാ: പാലാ സെന്‍റ് തോമസ് കോളജിൽ വിദ്യാർഥിനിയെ കഴുത്തിൽ കുത്തി കൊലപ്പെടുത്തിയ കേസിൽ പ്രതിയായ അഭിഷേക് ബൈജുവിനെ റിമാൻഡ് ചെയ്തു. ഏറ്റുമാനൂർ മജിസ്ട്രേറ്റ് കോടതിയാണ് 14 ദിവസത്തേക്ക് പ്രതിയെ റിമാൻഡ് ചെയ്തത്. തലയോലപ്പറമ്പ് കളപ്പുരയ്ക്കൽ നിതിന മോൾ (22) ആണ് കൊല്ലപ്പെട്ടത്.
പ്രണയാഭ്യർഥന നിരസിച്ചതിനെത്തുടർന്ന് സഹപാഠിയായ അഭിഷേക് പേനാക്കത്തികൊണ്ടു കുത്തുകയായിരുന്നു. ആസൂത്രിതമായ കൊലപാതകമായിരുന്നു ഇതെന്നാണ് പോലീസ് കോടതിയിൽ അറിയിച്ചത്. നിതിനയെ കൊല്ലുമെന്ന് അഭിഷേക് സുഹൃത്തിന് സന്ദേശമയച്ചിരുന്നതായും പോലീസ് റിമാൻഡ് റിപ്പോർട്ടിൽ പറയുന്നു. കൊല്ലണമെന്ന് ആഗ്രഹിച്ചിരുന്നില്ല, സ്വയം മുറിവേൽപ്പിച്ച് നിതിനയെ ഭയപ്പെടുത്താനാണ് തീരുമാനിച്ചിരുന്നതെന്നാണ് അഭിഷേക് പോലീസിന് ആദ്യം നൽകിയിരുന്ന മൊഴി.
എന്നാൽ കൊലപാകം കൃത്യമായ ആസൂത്രണത്തോടെയാണെന്നതിന് തെളിവുകൾ വിശദീകരിച്ചുകൊണ്ടാണ് പോലീസിന്‍റെ റിമാൻഡ് റിപ്പോർട്ട്. ഒറ്റ കുത്തിൽ തന്നെ നിതിനയുടെ വോക്കൽ കോഡ് അറ്റുപോയി. പഞ്ചഗുസ്തി ചാമ്പ്യനായ അഭിഷേകിന് കൃത്യ നിർവഹണത്തിന് കൂടുതൽ പണിപ്പെടേണ്ടി വന്നില്ലെന്നും റിപ്പോർട്ടിൽ പറയുന്നു.
