05 May, 2021 04:16:39 PM
ഹെല്‍മറ്റ് ധരിച്ചില്ല: കരണത്തടിച്ച പൊലീസിനെതിരെ നിയമനടപടിക്കൊരുങ്ങി യുവാവ്
കോഴിക്കോട്: ഹെല്‍മറ്റ് ധരിക്കാത്തതിന് യുവാവിനെ പൊലീസ് മര്‍ദിച്ചതായി പരാതി. വോട്ടെണ്ണല്‍ ദിനത്തില്‍ അമ്മയ്ക്ക് മരുന്നുവാങ്ങാന്‍ പോയ ചേലക്കാട് സ്വദേശി മലയില്‍ രജിലേഷിനെ കോഴിക്കോട് നാദാപുരം കല്ലാച്ചിയില്‍വച്ച് പൊലീസ് മര്‍ദിച്ചെന്നാണ് പരാതി. പിഴയടക്കാന്‍ ആവശ്യപ്പെട്ട അഞ്ഞൂറ് രൂപ കൈവശം ഇല്ലെന്നും പിന്നീട് കൊണ്ടുവന്ന് അടയ്ക്കാമെന്ന് അറിയിച്ചെങ്കിലും പൊലീസ് ബലം പ്രയോഗിച്ച് വാഹനത്തില്‍ കയറ്റുകയായിരുന്നുവെന്നും രജിലേഷ് മാധ്യമങ്ങളോട് പറഞ്ഞു.
ഇയാളുടെ ഇടത് കരണത്ത് പൊലീസ് ഉദ്യോഗസ്ഥന്‍ അടിച്ചതോടെ രക്തം വന്നു. ഇതിന് മുന്‍പ് സര്‍ജറി നടന്ന ചെവിയായതിനാല്‍ രജിലേഷ് ആവശ്യപ്പെട്ട പ്രകാരം പിന്നീട് പൊലീസുകാര്‍ തന്നെ ആശുപത്രിയില്‍ കൊണ്ടുപോയി പ്രാഥമിക ചികിത്സ നല്‍കി. സംഭവത്തിന്‍റെ സിസിടിവി ദൃശ്യങ്ങള്‍ സമൂഹമാധ്യമങ്ങള്‍ വഴി പ്രചരിച്ചതോടെ വടകര റൂറല്‍ എസ്പി സ്‌പെഷ്യല്‍ ബ്രാഞ്ചിനോട് റിപ്പോര്‍ട്ട് ആവശ്യപ്പെട്ടിട്ടുണ്ട്. പൊലീസിനെതിരെ നിയമ നടപടിക്കൊരുങ്ങുകയാണ് താനെന്നും രജിലേഷ് പറയുന്നു.
