14 February, 2021 10:42:46 AM
'കനത്ത വില നല്‍കേണ്ടിവരും'; ടോള്‍ പ്ലാസ കടക്കാന്‍ നാളെ മുതല്‍ ഫാസ്ടാഗ് നിര്‍ബന്ധം
ദില്ലി: കോവിഡ് വ്യാപനം ഉള്‍പ്പെടെയുള്ള വിവിധ കാരണങ്ങളാല്‍ തുടര്‍ച്ചയായി നീട്ടിവെച്ചശേഷം തിങ്കളാഴ്ച മുതൽ ഫാസ്ടാഗ് നിർബന്ധമാക്കുന്നു. ദേശീയപാതയിലെ ടോള്‍ പ്ലാസ കടക്കണമെങ്കില്‍ ഫാസ്ടാഗ് ഇനി നിര്‍ബന്ധം. അല്ലാത്തപക്ഷം കനത്ത പിഴ ഒടുക്കേണ്ടതായി വരും.
2020ന്‍റെ തുടക്കത്തില്‍ നടപ്പാക്കാനാണ് കേന്ദ്രസര്‍ക്കാര്‍ തീരുമാനിച്ചിരുന്നത്. എന്നാല്‍ വിവിധ കാരണങ്ങളാല്‍ ഫാസ്ടാഗ് നിര്‍ബന്ധമാക്കുന്നത് നീട്ടിവെയ്ക്കുകയായിരുന്നു. അവസാനമായി 2021 ജനുവരി ഒന്നുമുതല്‍ നടപ്പാക്കാനാണ് തീരുമാനിച്ചത്. പിന്നീട് ഇത് ഫെബ്രുവരി 15 വരെ നീട്ടുകയായിരുന്നു. ദേശീയപാതകളിലൂടെ ശേഖരിക്കുന്ന ടോളിന്‍റെ 80 ശതമാനവും ഫാസ്ടാഗ് വഴിയായി മാറികഴിഞ്ഞു.
ഫാസ്ടാഗ് - കൂടുതല്‍ അറിയാം
വാഹനത്തിന്റെ വിന്‍ഡ് സ്‌ക്രീനില്‍ ഒട്ടിക്കുന്ന ഒരു സ്റ്റിക്കര്‍ അല്ലെങ്കില്‍ ടാഗ് ആണ് ഫാസ്ടാഗ്. ടോള്‍ പ്ലാസയില്‍ ഇന്‍സ്റ്റാള്‍ ചെയ്ത സ്‌കാനറുമായി ആശയവിനിമയം നടത്താന്‍ ഉപകരണം റേഡിയോ ഫ്രീക്വന്‍സി ഐഡന്റിഫിക്കേഷന്‍ (ആര്‍എഫ്‌ഐഡി) സാങ്കേതികവിദ്യ ഉപയോഗിക്കുന്നു. വാഹനങ്ങള്‍ക്ക് ടോള്‍ പ്ലാസകളിലൂടെ നിര്‍ത്താതെ വാഹനമോടിക്കാം എന്നതാണ് പ്രധാന ഗുണം. എൻ‌എച്ച്‌‌എ‌ഐയുടെ 615ഓളം ടോൾ പ്ലാസകളും കൂടാതെ 100 ദേശീയ ടോൾ പ്ലാസകളും ടോൾ ശേഖരണത്തിനായി ഫാസ്ടാഗുകൾ ഉപയോഗിക്കുന്നു. എണ്ണം ക്രമേണ വർധിക്കും.
വാഹനം ടോള്‍ പ്ലാസ കടന്നുകഴിഞ്ഞാല്‍ ആവശ്യമായ ടോള്‍ തുക ഒരു ബാങ്ക് അക്കൗണ്ടില്‍ നിന്നോ ഫാസ്ടാഗിലേക്ക് ലിങ്ക് ചെയ്ത പ്രീപെയ്ഡ് തുകയില്‍ നിന്നോ ഓട്ടോമാറ്റിക്കായി ടോള്‍ ഇനത്തിലേക്കു പോവും. ടാഗ് ഒരു വാലറ്റ് അല്ലെങ്കില്‍ ഡെബിറ്റ് / ക്രെഡിറ്റ് കാര്‍ഡ് പോലുള്ള പ്രീപെയ്ഡ് അക്കൗണ്ടുമായി ലിങ്കുചെയ്തിട്ടുണ്ടെങ്കില്‍, ഉടമകള്‍ ടാഗ് റീചാര്‍ജ് / ടോപ്പ് അപ്പ് ചെയ്യേണ്ടതുണ്ട്. ഇത് ഒരു സേവിങ്‌സ് അക്കൗണ്ടുമായി ലിങ്ക് ചെയ്തിട്ടുണ്ടെങ്കില്‍, ബാക്കി തുക മുന്‍കൂട്ടി നിര്‍വചിച്ച പരിധിക്ക് താഴെയായിക്കഴിഞ്ഞാല്‍ പണം ഓട്ടോമാറ്റിക്കായി കുറയ്ക്കും. ഒരു വാഹനം ടോള്‍ പ്ലാസ കടന്നുകഴിഞ്ഞാല്‍, പണം കുറഞ്ഞതായി ഉടമയ്ക്ക് ഒരു എസ്എംഎസ് അലര്‍ട്ട് ലഭിക്കും. അക്കൗണ്ടുകളില്‍ നിന്നോ വാലറ്റുകളില്‍ നിന്നോ പണം ഡെബിറ്റ് ചെയ്യുന്നത് പോലെയാണ് അലര്‍ട്ട് വരുന്നത്. ആമസോണ്‍, പേടിഎം, സ്‌നാപ്ഡീല്‍ തുടങ്ങിയ എല്ലാ പ്രധാന റീട്ടെയില്‍ പ്ലാറ്റ്‌ഫോമുകളിലും ഫാസ്ടാഗ് ഓണ്‍ലൈനില്‍ ലഭ്യമാണ്.
ഫാസ്ടാഗ് നിരക്കുകള്‍?
എല്ലാ നികുതികളും അടക്കം 200 രൂപ വരെ ഫാസ്‌ടാഗിനായി ബാങ്കുകൾക്ക് ഈടാക്കാൻ അനുവാദമുണ്ടെന്ന് ഐ‌എച്ച്‌എം‌സി‌എൽ പറയുന്നു. സെക്യൂരിറ്റി ഡെപ്പോസിറ്റ് ഈടാക്കും. സാധാരണയായി മിക്ക കാറുകൾക്കും ഏകദേശം 200 രൂപയാണ് ഇത്. ഇത് വാഹന തരത്തെ ആശ്രയിച്ചിരിക്കുന്നു. ടാഗ് ആക്ടീവ് ആയി നിലനിർത്തുന്നതിന് മിനിമം തുക റീചാർജ് ചെയ്യണം. സാധാരണയായി 100 രൂപയാണിത്. കൂടാതെ, ഓരോ റീചാർജിനും ബാങ്കുകൾ അധിക ഇടപാട് ഫീസ് ഈടാക്കാം. ബാങ്കിന്റെയോ പ്രീപെയ്ഡ് വാലറ്റിന്റെയോ വെബ്‌സൈറ്റുകൾ നോക്കി എത്രയാണ് നിരക്ക് ഈടാക്കുന്നതെന്ന് പരിശോധിക്കുന്നത് നല്ലതാണ്. ടോൾ അടയ്‌ക്കാൻ നിലവിൽ സെക്യൂരിറ്റി ഡെപ്പോസിറ്റ് നൽകിയ പണം ഉപയോഗിക്കാൻ കഴിയില്ല. പിന്നീട് ഈ തുക ടോൾ ഇനത്തിലേക്ക് മാറ്റാവുന്ന തരത്തിൽ ഭേദഗതി വരാനും സാധ്യതയുണ്ട്.
ഫാസ്ടാഗ് ലഭിക്കുന്നതിന് / ആക്ടിവേറ്റ് ചെയ്യുന്നതിന് ഡ്രൈവിങ് ലൈസൻസിന്റെ പകർപ്പ് (അഡ്രസ് പ്രൂഫ്, ഫോട്ടോ ഐഡി എന്നീ നിലകളിൽ), വാഹനത്തിന്റെ രജിസ്ട്രേഷൻ സർട്ടിഫിക്കറ്റ്. ബാങ്കുകൾക്ക് ആധാർ അല്ലെങ്കിൽ പാസ്‌പോർട്ട് അല്ലെങ്കിൽ പാൻ പോലുള്ള കെ‌വൈ‌സി രേഖകൾ ആവശ്യമാണ്.
ഫാസ്ടാഗ് ഇല്ലെങ്കിൽ ?
ഒരു ഫാസ്ടാഗ് പാതയിലേക്ക്, അതില്ലാത്ത വാഹനങ്ങൾ പ്രവേശിക്കാൻ അനുവാദമില്ല. പിടിച്ചാൽ ടോൾ തുകയുടെ ഇരട്ടി നൽകണം. ആർ‌എഫ്‌ഐ‌ഡിയുടെ ചില കേടുപാടുകൾ കാരണം നിങ്ങളുടെ ഫാസ്ടാഗ് പ്രവർ‌ത്തിക്കുന്നില്ലെങ്കിലും അല്ലെങ്കിൽ മതിയായ ബാലൻ‌സ് ഇല്ലെങ്കിലും, ടോൾ തുകയുടെ ഇരട്ടി നൽകാൻ നിങ്ങൾ ബാധ്യസ്ഥമാവും. അത്തരം സന്ദർഭങ്ങളിൽ ഉപയോക്താവിന് പണം അടയ്ക്കാനും ടാഗ് ഒരു പേയ്മെന്റ് ഗേറ്റ്‌വേയിലൂടെ (ഭാരത് ബിൽ പേയ്മെന്റ് സിസ്റ്റം പോലുള്ളവ) റീചാർജ് ചെയ്യാനുമുള്ള സംവിധാനം ബാങ്കുകളുടെ സഹായത്തോടെ ഒരുക്കുന്നത് സംബന്ധിച്ച് ചർച്ച നടക്കുന്നുണ്ട്.
വാഹനം ഹൈവേകളിലേക്ക് കൊണ്ടുപോകുന്നില്ലെങ്കിലും ഫാസ്ടാഗ് ആവശ്യമാണ്. കാരണം ഈ വർഷം ഏപ്രിൽ മുതൽ തേർഡ് പാർട്ടി ഇൻഷുറൻസിനായി ഫാസ്ടാഗ് നിർബന്ധമാക്കാൻ സർക്കാർ ശ്രമം നടത്തുകയാണ്. എല്ലാ കാറുകൾക്കും മിനിമം ഇൻഷുറൻസ് പരിരക്ഷ ലഭിക്കാൻ തേഡ് പാർട്ടി ഇൻഷുറൻസ് നിർബന്ധമാണ്. ഹൈവേകളിലെയും പാർക്കിങ് സ്ഥലങ്ങളിലെയും വഴിയോര കേന്ദ്രങ്ങളിലെ ഉൽപന്നങ്ങൾക്കും സേവനങ്ങൾക്കും ഫാസ്ടാഗ് സംയോജിപ്പിച്ചുള്ള പേയ്മെന്റ് സംവിധാനമൊരുക്കാനും സർക്കാർ പദ്ധതിയിടുന്നു, അതിനാൽ ഒരു മൾട്ടി-യൂട്ടിലിറ്റി പേയ്മെന്റ് ഉപകരണമായി ഫാസ്ടാഗ് മാറും.
