14 December, 2020 05:27:34 PM


16കാരന്‍ കൊല്ലപ്പെട്ട നിലയിൽ; പിന്നില്‍ കാമുകിയുടെ ബന്ധുക്കളെന്ന് ആരോപണം



പാട്ന: മറ്റൊരു സമുദായത്തിൽപ്പെട്ട പെൺകുട്ടിയുമായി പ്രണയത്തിലായിരുന്ന 16കാരനെ കൊല്ലപ്പെട്ട നിലയിൽ കണ്ടെത്തി. പാട്നയിലെ പുതിയ അസീമാബാദ് കോളനിയുടെ സമീപത്തു നിന്നാണ് കഴുത്തറുത്ത നിലയിലുള്ള മൃതദേഹം കണ്ടെത്തിയത്. ഞായറാഴ്ചയാണ് മൃതദേഹം കണ്ടെത്തിയത്. സംഭവത്തിനു പിന്നിൽ പെൺകുട്ടിയുടെ ബന്ധുക്കളാണെന്നാരോപിച്ച് 16കാരന്റെ ബന്ധുക്കളും നാട്ടുകാരും പ്രതിഷേധവുമായി രംഗത്തെത്തി. അൻഷുകുമാര്‍ എന്ന 16കാരനെയാണ് മരിച്ചനിലയിൽ കണ്ടെത്തിയത്. പ്രൈവറ്റ് സ്ഥാപനത്തിൽ ജോലിനോക്കുകയാണ് ഇയാൾ. 

സമീപത്തെ സാന്താൽപൂർ സ്വദേശിയായ പെൺകുട്ടിയുമായിട്ടാണ് ഇയാൾ പ്രണയത്തിലായിരുന്നത്. ഞായറാഴ്ച ഉച്ചയ്ക്ക് ഒരുമണിയോടെ കാമുകി വിളിച്ചതിനെ തുടർന്നാണ് ഇയാൾ വീട്ടിൽ നിന്ന് പോയതെന്ന് ഇയാളുടെ ബന്ധുക്കൾ പറഞ്ഞു. രാത്രി ഏഴ് മണിയോടെ പ്രദേശവാസികളാണ് മൃതദേഹം കണ്ടെത്തിയത്. ഉടൻ വീട്ടുകാരെ വിവരം അറിയിക്കുകയായിരുന്നു. അതേസമയം യുവാവിൻറെ കൊലപാതകത്തിൽ പ്രതിഷേധം ശക്തമായി. പെൺകുട്ടിയുടെ സഹോദരൻ അർമാൻ മാലിക് യുവാവിനെ ഭീഷണിപ്പെടുത്തിയതായി യുവാവിന്റെ സഹോദരൻ ആരോപിച്ചു. 

പ്രതികളെ ഉടൻ അറസ്റ്റ് ചെയ്യണമെന്നാവശ്യപ്പെട്ട് നാട്ടുകാരും ബന്ധുക്കളും രംഗത്തെത്തി. പെൺകുട്ടിയുടെ വീടിനു നേരെ പ്രതിഷേധക്കാർ കല്ലേറു നടത്തി. പ്രാഥമിക നിഗമനത്തിൽ പ്രണയബന്ധമാണ് കൊലപാതകത്തിലേക്ക് നയിച്ചതെന്നാണ് പൊലീസ് സംശയിക്കുന്നത്. കൊല്ലപ്പെട്ട യുവാവിന്റെ ഫോൺ രേഖകളിൽ നിന്ന് കൂടുതൽ വിവരങ്ങൾ കണ്ടെത്താനാകുമെന്നാണ് പൊലീസിന്റെ നിഗമനം. പെൺകുട്ടിയെയും സഹോദരനെയും കസ്റ്റഡിയിലെടുത്ത് ചോദ്യം ചെയ്തു. സംഭവത്തിൽ അന്വേഷണം പുരോഗമിക്കുകയാണ്. 



Share this News Now:
  • Google+
Like(s): 3.7K