13 September, 2020 12:48:11 PM
എസ്.ഐയുടെ ഫേസ്ബുക്ക് അക്കൗണ്ടുണ്ടാക്കി സമ്പത്തിക തട്ടിപ്പ്; വ്യാജൻ രാജസ്ഥാനില്‍
തൃശൂർ: വരന്തരപ്പിള്ളി എസ്.ഐയുടെ പേരിൽ ഫേസ്ബുക്ക് അക്കൗണ്ടുണ്ടാക്കി പണം തട്ടിയെടുത്തയാൾ ഓൺലൈനിൽ ഇപ്പോഴും സജീവമെന്നു പൊലീസ്. വരന്തരപ്പിള്ളി എസ്.ഐ ഐ.സി. ചിത്തരഞ്ജന്റെ പേരിലാണ് തട്ടിപ്പ് നടത്തിയത്. ഇതിനായി ഉപയോഗിച്ച സിം കാർഡ് രാജസ്ഥാനിൽ ഉപയോഗത്തിലുണ്ട്. വ്യാജരേഖകൾ ഉപയോഗിച്ചാണ് സിം തരപ്പെടുത്തിയത്. ടവർ ലൊക്കേഷൻ കേന്ദ്രീകരിച്ച് പ്രതിയെ കണ്ടെത്താൻ ശ്രമം തുടങ്ങിയെന്ന് പൊലീസ് അറിയിച്ചു.
എസ്.ഐയുടെ യഥാർഥ ഫേസ്ബുക്ക് അക്കൗണ്ടിലെ ചിത്രങ്ങളും വിവരങ്ങളും ഉപയോഗിച്ചാണ് വ്യാജ പ്രൊഫൈൽ ഉണ്ടാക്കിയിരിക്കുന്നത്. ഈ പ്രൊഫൈൽ ഉപയോഗച്ച് എസ്.ഐയുടെ സുഹൃത്തുക്കളിലൊരാളിൽ നിന്ന് വ്യാജൻ 8000 രൂപ തട്ടിയെടുത്തു. എസ്.ഐ ആണെന്ന വ്യാജേന ഇയാൾ ഇപ്പോഴും ചിലരുമായി ചാറ്റിങ് നടത്തുന്നുണ്ടെന്നും പൊലീസ് കണ്ടെത്തിയിട്ടുണ്ട്. അടുത്തിടെ കണ്ണൂരിൽ മറ്റൊരു ഇൻസ്‌പെക്ടറുടെ പേരിൽ വ്യാജ ഫേസ്ബുക് അക്കൗണ്ട് ഉണ്ടാക്കി പണം തട്ടിയതും രാജസ്ഥാനിൽ ഉപയോഗിക്കുന്ന സിം കാർഡിൽ നിന്നാണെന്ന് കണ്ടെത്തിയിരുന്നു.
