08 September, 2020 07:35:54 PM


മയക്കുമരുന്ന്​ മാഫിയയുമായി 25 ബോളിവുഡ്​ താരങ്ങള്‍ക്ക്​ ബന്ധം; പട്ടിക തയാറാക്കി എന്‍.സി.ബി



മുംബൈ: മയക്കുമരുന്ന്​ മാഫിയയുമായി ബന്ധപ്പെട്ട അന്വേഷണം ബോളിവുഡിലെ 25ഓളം താരങ്ങളിലേക്ക്​. സുശാന്ത്​ സിങ്​ രാജ്​പുതി​ന്‍റെ മരണവുമായി ബന്ധപ്പെട്ട മയക്കുമരുന്ന്​ കേസില്‍ അറസ്​റ്റിലായ കാമുകിയും നടിയുമായ റിയ ചക്രബര്‍ത്തി നാര്‍ക്കോട്ടിക്​ കണ്‍ട്രോള്‍ ബ്യൂറോ​​യോട്​ താരങ്ങളുടെ പേരുകള്‍ വെളിപ്പെടുത്തി. റിയയുടെ സഹോദരന്‍ സൗവിക്ക്​ ചക്രബര്‍ത്തിയും മയക്കുമരുന്ന്​ മാഫിയയുമായി ബന്ധമുള്ള ചില താരങ്ങളുടെ പേരുകള്‍ വെളിപ്പെടുത്തിയിരുന്നു.


ബോളിവുഡ്​ താരങ്ങളുടെ മയക്കുമരുന്ന്​ മാഫിയയുമായുള്ള ബന്ധം തുറന്നുകാണിക്കുന്ന ഒ​​ട്ടേറെ ഡിജിറ്റല്‍ തെളിവുകള്‍ എന്‍.സി.ബി കണ്ടെടുത്തിരുന്നു. 25 പേര്‍ക്കും എന്‍.സി.ബി ഉടന്‍ നോട്ടീസ്​ അയക്കുമെന്നാണ്​ വിവരം.​ താരങ്ങളുടെ പട്ടിക മുതിര്‍ന്ന ഉദ്യോഗസ്​ഥര്‍ക്ക്​ കൈമാറും. റിയയെ ചൊവ്വാഴ്​ച മൂന്നാംതവണയും ചോദ്യംചെയ്​തതിനുശേഷമാണ്​ അറസ്​റ്റ്​ ചെയ്​തത്​. താന്‍ കഞ്ചാവ്​ ഉപയോഗിക്കാറില്ലെന്നും രാസവസ്​തുക്കളാണ്​ ഉപയോഗിക്കുന്നതെന്നും മൊഴി നല്‍കിയതായാണ്​ വിവരം.


മയക്കുമരുന്ന്​ ഉപയോഗിച്ചിരുന്ന ബോളിവുഡ്​ പാര്‍ട്ടികളെക്കുറിച്ചും റിയ എന്‍.സി.ബിയോട്​ പറഞ്ഞു. സുശാന്തി​ന്‍റെ ഒരു സിനിമയുടെ സെറ്റില്‍ വെച്ചാണ്​ മയക്കുമരുന്ന്​ ഉപയോഗിച്ച്‌​ തുടങ്ങിയതെന്നും റിയ പറഞ്ഞു. സുശാന്തി​ന്‍റെ സിനിമയില്‍ ഒപ്പം അഭിനയിച്ചവര്‍ക്കും നോട്ടീസ്​ അയച്ചതായാണ്​ വിവരം. മയക്കുമരുന്ന്​ കേസുമായി ബന്ധപ്പെട്ട്​ റിയയുടെ സഹോദരന്‍ സൗവിക്ക്​, സുശാന്തി​ന്‍റെ മാനേജര്‍ സാമുവല്‍ മിറാന്‍ഡ, പാചകക്കാരന്‍ ദീപേഷ്​ സാവന്ത്​ എന്നിവരെ എന്‍.സി.ബി അറസ്​റ്റ്​ ചെയ്​തിരുന്നു. ഇവരെ സെപ്​റ്റംബര്‍ ഒമ്പതിന്​ വീണ്ടും കോടതിയില്‍ ഹാജരാക്കും.



Share this News Now:
  • Mail
  • Whatsapp whatsapp
Like(s): 5.5K